2 Kɔrèn 8 - Ikan feg

Bəd Kristo bèrì ni ya ghàpà ighi

¹ Ìmba məfi fɔrɔ ìta njàbi, tì kə̀b gha mbə̀ kyeri ìchɔ̀mì we ne Ŋwiye ghi abə tifeti bəd Ŋwiye te aba aben ze a Màsèdonìyà.

² Mbi ya chè inga ngəʼ ne taŋ kà, si ya gha, igyendi ya sweg inga ìtɔb fìŋ. Àze ya ghì gha mbɔb ya ghàpà ìmbɔb ighi, ka mbɔb ya yaʼ bəd ne chəyi àzɔb.

³ Mə gha tesiʼ gha mbɔb ya nàʼ ighi chè icheg ne mbi ya bèrì. Chəyi mbi ya paʼi awɔb paʼi gha mbe naʼa ighi. Mbɔb ya nàʼ ighi icheg ne mbɔb ya kɔ̀ŋi.

⁴ Mbɔb ya boʼ ibo ina ywìrì boʼ gha tì naʼa apan inɔb mbɔb wete bəd Ŋwiye mbe a Jùdeyà.

⁵ Mbɔb ya ghì anug azo̰ chè icheg ne tì yaya kɔ̀ndɔ. Mbɔb ya bì bḛ ni zugri Anɔŋisəg. Mbɔb ya bə̀ bḛ ni zugri awa icheg ne Ŋwiye ya kə̀bi.

⁶ Ane, tì ya boʼ ibo abə Tayitùs we ne ya ko àfàʼì azo̰ gha wì chè imbìghè ghì mbə̀ mana anug ni feti ighi mbe ne mbə̀ beri ni nàʼ.

⁷ Mbə̀ nḛ gha mbə̰ mbe kwèghe ane inug ijìm: kə̀ àkə ane ibḛfiŋ, kə̀ ane ìwən ìngam ichug, kə̀ ane anug ni kyeri inug, kə̀ ane anug ni nɔ̀ŋɔ̀ fìŋ ni wètì bəd, fɔrɔ ane icheg ne mbə kɔ̀ŋɔ̀ awa. Mbə̀ bə kweg ane anug ni ya nàʼà ighi wètè bəd.

⁸ Chəyi mə̀ ghà anug azo̰ inən anìŋ icheg ni gha à ya nɔ̀ʼɔ̀. Mə ya kə̀bə̀ ni nèn gha kə̀ mbə̰ kɔ̀ŋ ni wètì bəd icheg ne tifeti bəd Kristo ìtin bə kɔ̀ŋ?

⁹ Mbə kyèri ìchɔ̀mì we ne Anɔŋisəg Yeso Kristo ya ghì. Wì ya taŋ bèrì ighi, si ya gha, wì ya bə̀ŋə si wə̀d ne chəyi àzi məd. Wì ya bə̀ŋə ane imbə̀ʼ awən ni ghì gha mbə̀ si yaʼ bəd ne beri ighi anjìm icheg ne chəyi wì beri ighi.

¹⁰ Ikə ne mə̀ biri nàʼ ya gha: Ze biri bɔ̀ŋ gha mbə mana anug ze ne mbə̰ ya ko fituʼ. Mbə̰ ya yaʼ bəd mbègtog ni yaya kə̀bə̀ ni wètì wə̀d ijìm. Mbə̰ ya bə̀ yaʼ bəd mbègtog ni ghì ane.

¹¹ Ane, mbə mana fèti ighi mbe icheg ne mbə̰ ya fə nɔŋi inga ìtən fìŋ ni wètì bəd. Wə̀d imɔʼ imɔʼ naʼa ighi icheg ne abo məd chwi.

¹² Ane, wə̀d mə bèrì fìŋ chɔm ni wètì bəd bə̀ nàʼ ighi icheg ne abo məd chwi, Ŋwiye biri niŋ ighi mbe ne wì nàʼi. Chəyi Ŋwiye we kə̀bə̀ gha wə̀d naʼa ighi ane mbe ne chəyi wì bèri.

¹³ Ìwa ikɔndi kayi ni zì mbèʼ ni nìri igun inən ne mə̀mbin yaʼi awɔb icheg chɔm. Tì ya kə̀bə̀ gha nji wə̀d ijìm yaʼ andəŋ andəŋ.

¹⁴ Mbə̰ bèrì ighi nɔʼ nɔʼ ne tì mbə̰ wètì awɔb. Anyumə̀ ne mbə̰ inən biri bə̀ yaʼ inga ngəʼ mbɔb biri bə̀ wètì awən. Ze mə yaʼ ane, nji wə̀d ijìm biri yaʼ andəŋ andəŋ.

¹⁵ Icheg ne mbi ŋwaʼri inga Àŋwàʼrì Ŋwiye gha, “Wə̀d ne ya taŋ feti ze nɔʼ, chəyi tengàŋ ya beri ze nɔʼ chè. Wə̀d ni ya feti ze kə, chəyi tengàŋ ya beri ze kə chè.”

Mbe tɔm Tayitùs tì bəd àfàʼì ndəŋ a Kɔrèn

¹⁶ Mə we nàʼà məyakà abə Ŋwiye imbə̀ʼ icheg ne wì ghì Tayitùs se kɔ̀ŋɔ̀ awən icheg ne mə bə kɔ̀ŋ.

¹⁷ Tì ya bòʼ ibo abə Tayitùs gha wi yèʼe mùg awən, wì bḛ. Wì ya kɔ̀ŋ bə̀ niŋ isɔb anug zìye ni yèʼe mùg awən.

¹⁸ Tì we bə cha ìwa ifi ndəŋ tì Tayitùs. Ìwa ifi gho̰ ya wə̀d ne mbe ghùmnə aməd inga tifeti bəd Ŋwiye tijìm, gha məd we chètè ikən chɔm.

¹⁹ À ya tifeti bəd Ŋwiye chɔʼi aməd gha we yaʼ abɔ̀ʼ ina icheg ne tì niŋi ighi mbe ne mbə nàʼi ni ghò a Jerusalèm. Aŋa ya àfàʼì ne nàʼà ighumni abə Anɔŋisəg. Ighi mbo̰ ne mbə naʼi ya bə̀ chwìye gha tè bèrì fìŋ chɔm ni wètì bəd.

²⁰ Chəyi tì kəbi ni ghì gha àghàmbì nyi inga anug azo̰ imbə̀ʼ ikuchèg ne tì nyimi ighi mbe ne mbə nàʼi.

²¹ Aton ya gha tì we chè inga ngəʼ ni fàʼ anug ne koʼi imbìghè abə Anɔŋisəg fɔrɔ abə bəd ijìm.

²² Tì we chà ìwa ifi ndəŋ abɔ̀ʼ mbi Tayitùs. Tè fə zweʼri aməd inga inug nɔʼ nɔʼ bə̀ bàd gha wì bèrì fìŋ chɔm ni wètì bəd. Məd we se kə̀bə̀ ni wètì awən imbə̀ʼ icheg ne məd kyeri bəd ne mbə̀ yaʼi mbiwən.

²³ Tayitùs ya yi wə̀d ne tè fɔrɔ fàʼà ni wètì awən. Àsi məfi mbin ne yaʼi abɔ̀ʼ məd, mbɔb ya bəd ne ìwɔb ikuchèg kòʼi imbìghè abə Kristo. À ya tifeti bəd Ŋwiye bə chà awɔb.

²⁴ Ane, mbə̀ chwi abə bəd mbo̰ gha mbə̰ kɔ̀ŋ awɔb. Mbə mə ghì ane ze biri chwi abə tifeti bəd Ŋwiye gha tì ya bèrì ni kɔ̀m igo imbə̀ʼ awən.