2 Kɔrèn 7 - Ikan feg

¹ Ìmbum mə̀sə̀ʼ ne mə̀ taŋ kɔ̀ŋ, icheg ne Ŋwiye kàʼi ni fàʼ inug mbo̰ ina, tè chiye ìwa nyɔd fɔrɔ àza azwighi ane inug ijìm mbe ne ghìyə̀ ghà wə̀d ghiyə inug tibɔ̀ŋ se fàʼà inug ijìm inga ìzḛzḛ bə̀ bɔ Ŋwiye.

² Mbə̀ fiʼi ìtən fìŋ ina. Chəyi tì gùghi anug abə wə̀d. Chəyi tì tambi wə̀d mɔ̀ʼɔ. Chəyi tì nyəʼi wə̀d mɔ̀ʼɔ jəg aghi məd.

³ Kayi mə ghàmà anìŋ ni gaŋ awən. Mə kə̀ fə gha mbə̰ bèrì àzən ati inga ìmə fìŋ, kə̀ àkə ìtḛ̀ kə̀ iwu, tì ya tì inən.

⁴ Chəyi mə̀ jə̀mə̀ awən kà. Mə ya bə̀ kɔ̀mɔ̀ ìmə igo imbə̀ʼ awən. Anyumə̀ ne tì yaʼi inga ngəʼ, mbə̰ ya nəri ìmə fìŋ bə̀ ghi mə taŋ gyènde.

⁵ Anyumə̀ ne tì ya pe a Màsèdonìyà, chəyi tì ya beri àzwètì. Ngəʼ yaya nyḭ̀yḛ igun ina ane iba ijìm. Bəd yaya chɔ̀bɔ tì ina. Tì yaya bə̀ taŋ bɔ.

⁶ Si ya gha, Ŋwiye we ne nə̀rə fìŋ abə bəd ne beri ibəʼ ya nəri ìta fìŋ anyumə̀ ne Tayitùs ya yèʼe.

⁷ Aghi ni ya ghi awa tì gyèndi kayi məyi icheg ne məd ya yèʼe, à ya fɔrɔ imbə̀ʼ icheg ne məd ya pe ghà ina gha mbə̰ ya nɔ̀ri fìŋ məd. Tayitùs ya mə̀tì ina gha: Mbə̰ mbe taŋ kə̀bə ni bàd amə. Mbə̰ mbe sɔ̀mnɔ̀ imbə̀ʼ amə. Mbə̰ fə bə̀ chùʼri ìwən nyɔd ni zugrə mə. Ane, mə we taŋ gyènde amad anìŋ.

⁸ Ka àŋwàʼrì ka ka ze ne mə̀ ya cha inən ya ghì awən mbə gaŋ, chəyi mə̀ gha, kyere mə̀ ya sàŋì angu. Ka mə jiʼì gha, kyere, mə kyèri gha àŋwàʼrì ze ghì mbə gaŋ məyi ane iki nyumə̀ kwa kwa.

⁹ Mə we gyènde amad anìŋ. Kayi mə gyènde gha mə ghi awən mbə se sɔ̀mnɔ̀. Mə ya gyènde gha àzən àsɔ̀mnì ghi awən mbə bəŋi ìtən fìŋ sìkì inug tibɔ̀ŋ. Àsɔ̀mnì ze ya Ŋwiye ya ghi. Ane, chəyi tì ghi anug tibɔ̀ŋ mɔ̀ʼɔ inən.

¹⁰ Tesiʼ ya gha, àsɔ̀mnì ze ne Ŋwiye ghi ya ni ghì gha bəd bəŋə ìtɔb fìŋ sìkì inug tibɔ̀ŋ si pum. Ane, chəyi kyere mɔ̀ʼɔ inga iku àsɔ̀mnì we. Àsi àsɔ̀mnì ne à ya wə̀d-aku ghi, ze ya ghìyə̀ wə̀d kùyə.

¹¹ Mbə̀ nḛ aghi ne Ŋwiye fàʼi anjìm àsɔ̀mnì ze ne wì ghi mbə beri. Amad anìŋ mbə nɔ̀ŋì atog ane àfàʼì, nɔ̀ŋì atog ni ghì inug ne koʼi, kyèri icheg ni sɔ̀mnɔ̀ imbə̀ʼ inug tibɔ̀ŋ, bə̀ kyèri icheg ni kwìtì inug tibɔ̀ŋ. Mbə̰ mbe se ghɔ̀mɔ̀ ni bàd amə, bə̀ nɔ̀ŋì fìŋ ni zugri amə, bə̀ kyèri icheg ni saʼ inug ane icheg ne koʼi. Mbə̰ mbe chwìye ane inug ijìm gha chəyi mbə̀ gughi anug.

¹² Aton ne mə̀ ya ŋwàʼri àŋwàʼrì ze chà inən ya kayi ni ghàm anug mɔ̀ʼɔ imbə̀ʼ wə̀d ne gughi anug kə̀ imbə̀ʼ wə̀d ne mbi gughi anug ibo. À yaya ni ghì gha anyumə̀ ne mbə̀ yaʼi imbìghè abə Ŋwiye, mbə biri chwi icheg ne mbə̰ mbe zùgrə awa.

¹³ À ya anug ne taŋ nə̀rə ìta fìŋ ya aze. Ni yètì abɔ̀ʼ anug azo̰ ne nə̀rə ìta fìŋ, tì ya taŋ gyèndi ane icheg ne mbə̰ ya niŋi Tayitùs, ghì aməd wì se gyènde bə̀ ghì fìŋ məd zùtì.

¹⁴ Mə ya fə kɔ̀m igo ibo imbə̀ʼ awən. Ze bɔ̀ŋ icheg ne chəyi mbə ghi mə beri tìnìrètog. Inug mbe ne tì gha inən ijìm fə dù ane tesiʼ. Mbə fə bə̀ chwi gha inug mbe ne mə̀ ya kɔ̀mi igo igun abə Tayitùs imbə̀ʼ awən fə bə̀ dù ane tesiʼ.

¹⁵ Ane, anyumə̀ ne Tayitùs wèndi icheg ne mbə̀ ya niŋə aməd, bə̀ taŋ ghumni aməd, bə̀ zùgri aməd, wì ya ywìrè taŋ kɔ̀ŋɔ̀ awən.

¹⁶ Mə gyen ako imbə̀ʼ awən imbə̀ʼ icheg ne mə we tì mə nɔ̀ŋì àmə fìŋ ijìm igun inən.