2 Kɔrèn 6 - Ikan feg

¹ Mbə̰ ya bəd ne fɔrɔ fàʼà tì Ŋwiye. Ane, tì ya bòʼo ibo inən gha imbə̀ʼ mbə̰ sàŋa awən gha ìchɔ̀mì we ne wì ghi inən we chè ako.

² Imbə̀ʼ mbə̰ nɔ̀ʼ sàŋì imbə̀ʼ icheg ne Ŋwiye ghà gha, “Anyumə̀ ne nyùmə̀ ya kòʼi inum ni ghì ìchɔ̀mì, mə ya zug anug ne àghò yaya ghà. Aneg ze ne mə̀ yaya pùmnə bəd, mə ya pumni awe.”

³ Chəyi te kə̰ inɔnjì abə wə̀d, ni gha imbə̀ʼ wə̀d mɔ̀ʼɔ nɔ̀ʼ ghàm anug tibɔ̀ŋ imbə̀ʼ àfàʼì ze ne te fàʼà.

⁴ Si ya gha, icheg bəd àfàʼì Ŋwiye, tì ya chwìye ane iku inɔnjì ijìm gha, mba ya bəd àfàʼì chɔm: kə̀ àkə inga nyùmə̀ ni nyìʼ, kə̀ nyùmə̀ tiku ngəʼ ijìm, kə̀ nyùmə̀ ne inug mbe kà, kə̀ nyùmə̀ ibəʼ,

⁵ kə̀ nyùmə̀ ne mbe ywìre awa, kə̀ nyùmə̀ ne mbi zi awa inga nəb ndəŋ, kə̀ nyùmə̀ ne mbi bughi ndum ni zweti awa, kə̀ nyùmə̀ ne àfàʼì ze kà bə̀ nɔ̀ʼ, kə̀ nyùmə̀ ni neg ikyèʼi, kə̀ nyùmə̀ njèg.

⁶ Tì we chwìye gha tè zen. Tì we chwìye gha tè kyèri inug. Tì we nyìmbe fìŋ bə̀ ghìyə̀ inug ne chwìye gha tè kɔ̀ŋ bəd. Tì ya ghìyə̀ inug mbo̰ ijìm anjìm Azwighi Ŋwiye ne yaʼi inga ina fɔrɔ anjìm icheg ne tì kɔŋi bəd ane fìŋ ifibì.

⁷ Tì ya bə̀ ghàmà ìngam tesiʼ bə̀ fàʼà inug ane ika ne Ŋwiye nàʼi ina. Ìmba inug mbe ne təmi kòʼ ya ighi ibid ne te nyìme ane aba abo jəghi ni zɔ̀ŋ, fɔrɔ ane aba abo təŋ ni kən nyɔd angu.

⁸ Bəd mɔ̀ʼɔ mbe ghùmnə awa, mə̀mbin mbe wèghè awa. Bəd mɔ̀ʼɔ mbe ghà inug tibɔ̀ŋ imbə̀ʼ awa, mə̀mbin mbe ghà inug chɔm imbə̀ʼ awa. Mba ya bəd ne ghàmà tesiʼ, si ya gha, bəd ya nìŋə awa ane bəd ne ghàmà inug ako.

⁹ Bəd kyèri awa kwàʼ icheg chɔm, se ghìyə̀ inug tì ina icheg ni gha chəyi mbi kyeri awa ka iki piʼì. Mba ya icheg bəd ne fə ku, si ya gha, tì we kiri izɔm. Bəd mɔ̀ʼɔ ya sɔmɔ awa, si ya gha, chəyi mbi ya zweti awa.

¹⁰ Bəd mɔ̀ʼɔ ya nḛ̀ awa kɔ̀ndɔ gha tì we sɔ̀mnɔ̀, si ya gha, tì ya gyènde awa mà nyumə̀ ijìm. Bəd mɔ̀ʼɔ ya nìŋə awa ane bəd ne chəyi àzɔb, si ya gha, mba ya bəd ne ghìyə̀ bəd ndəŋ faŋà bèrè ighi. Bəd mɔ̀ʼɔ ya nìŋə awa icheg ni gha chəyi tì beri aghi, si ya gha, tè bèrì ighi ijìm.

¹¹ Ìmba mə̀sə̀ʼ a Kɔrèn! Tì fə ghàm inən asaŋ asaŋ. Tì fə fìʼì ìta fìŋ inən.

¹² Àkɔ̀ŋì ze ne tì beri inən, chəyi ze biri nɔʼ mèg. Si ya gha, chəyi mbə̰ mbe kɔ̀ŋɔ̀ awa icheg ne te kɔ̀ŋɔ̀ awən.

¹³ Mə ya ghàmà inən amad anìŋ icheg ne mə ghàmà abə ìmbum bɔn. Ane, icheg ne tì fiʼi ìta fìŋ inən, mbə̀ bə fìʼì ìtən fìŋ ina.

Ipati imbə̀ʼ anug ni ya jə̀grə̀ tì bəd ne chəyi mbi kyeri Ŋwiye

¹⁴ Imbə̀ʼ mbə̰ ya jə̀grə awən tì bəd mbe ne chəyi mbi kyeri Ŋwiye. Àkə iku ifɔti weg ne anug ni təm kòʼ beri tì anug ni ghì inug tibɔ̀ŋ? Àkə bə̀ iku ifɔti weg ne ìzḛzḛ beri tì afub?

¹⁵ Anug ne tì Kristo fɔti fàʼ ane inɔn tì Bèliyà àkə aza? Àkə anug zeg ne wə̀d ne bḛ Kristo beri tì wə̀d ne chəyi wì bḛ Kristo?

¹⁶ Àkə anug zeg ne mbàn Ŋwiye beri tì mə̀ŋwiye? Mba ya mbàn ne Ŋwiye we ne yaʼi izɔm we chùghə inga. Ŋwiye zìye fə ghà gha, “Mə biri chughi tì inɔb bə̀ yèn abɔ̀ʼ inɔb. Mə biri yaʼ ìwɔb Ŋwiye, mbɔb bə̀ yaʼ ìmbum bəd.”

¹⁷ Anɔŋisəg ghà gha, “Mbə̀ duwə inga inɔb yaʼ awən icha. Imbə̀ʼ mbə̰ bète awən aghi ne chəyi ze zḛ, mə biri niŋ awən ane inum.”

¹⁸ “Mə biri yaʼ Mbaʼ inən, mbə̰ si yaʼ ìmbum bɔn mbaŋà tì ìmbum bɔn àyi. Aŋa ya anug ne Anɔŋisəg Ŋwiyekɔʼ gha.”