2 Kɔrèn 5 - Ikan feg

Nyàmnyɔd feg

¹ Tè kyèri gha ìta nəb te ne tì yaʼi inga igun isəg aŋa, ne ya ìta nyàmnyɔd, ti mə̀ bùʼə, Ŋwiye biri nàʼ ìti feg ina ikaŋ àbɔ̀ŋɔ ne biri tèn ane ighə̀m imɔʼ. À ya nəb ne məd kɔri kwàʼ zìye zìye.

² Ane, tì we chwèmè, sɔ ichug kə̀bə̀ gha nji Ŋwiye nàʼ nyàmnyɔd feg ina ikaŋ àbɔ̀ŋɔ.

³ Tì mə beri nyàmnyɔd te ikaŋ àbɔ̀ŋɔ, chəyi tì biri ywìrì yaʼ tì ìkyèri ikye.

⁴ Icheg ne tì beri nyàmnyɔd ìto̰ igun isəg, tì we chwèmè tì mbèʼ ni nìri. Kayi gha tì kə̀b ni chìkì ìta nyàmnyɔd ìto̰ igun isəg. À ya gha tì kə̀b ni bèrì nyàmnyɔd feg. Ìta nyàmnyɔd feg te biri niŋ ati abə ìto̰ ne tì ti ku.

⁵ À ya Ŋwiye fə chuʼri awa nɔ̀ŋì abə ikɔpi gho̰ ne biri ghum yaʼ. Wì fə nàʼ àzi Azwighi ina ane aneni ni chwi gha wì biri nàʼ ighi ijìm mbe ne wì nɔŋi ina.

⁶ Ane, chəyi te jə̀mə̀ inug mbo̰. Tè kyèri kwàʼ tesiʼ gha, icheg ne tì yaʼi izɔm inga nyàmnyɔd igun isəg aŋa, agha ne tì yaʼi ane Anɔŋisəg ze sà.

⁷ Aghi ne nɔ̀ŋɔ̀ awa ya ibḛfiŋ, kayi ighi mbe ne te bàrà.

⁸ Tè kyèri kwàʼ tesiʼ tesiʼ gha, ze bɔ̀ŋ ni yaʼ abɔ̀ʼ Anɔŋisəg chè icheg ni yaʼ inga nyàmnyɔd ìzo̰ igun isəg aŋa.

⁹ Ane, kə̀ tì kə inga nyàmnyɔd ìzo̰ igun isəg aŋa, kə̀ abɔ̀ʼ Anɔŋisəg, tì ya ghìyə̀ ìwa ika ijìm gha Anɔŋisəg ya gyènde tì ina.

¹⁰ Tì ya ghìyə̀ ane imbə̀ʼ icheg ne mba məjìm biri ghum təm imbìghè abə Kristo ane isaʼi. Wì biri saʼ awa, wə̀d imɔʼ imɔʼ si niŋ ìwi ineʼi ane icheg ne wì ya fàʼi inug igun isəg aŋa, kə̀ àkə inug chɔm kə̀ inug tibɔ̀ŋ.

Ŋwiye chè anjìm Kristo mànì achɔb tì bəd

¹¹ Tè kyèri aton ni ghumni Anɔŋisəg. Ane, tì we kìrə ika ni ghì gha bəd ndəŋ bə kyèri aton ze. Ŋwiye fə kyeri awa mànì, ane, mə kyèri gha mbə fə bə̀ bḛ anug azo̰ kwàʼ ane fìŋ ìzḛzḛ.

¹² Chəyi tì kə̀bi ni ywiri ghà inən gha mba ya bəd àfàʼì chɔm. Si ya gha, tì we nàʼà apan inən gha mbə̀ ya kɔ̀mɔ̀ igo imbə̀ʼ awa. Tì nàʼ ane ni gha mbə̀ ywiti ìngam abə bəd mbe ne kɔ̀mɔ̀ igo yaʼ imbə̀ʼ inug mbe ne bəd mbe bàrà, ne nji mbi ya kɔ̀mɔ̀ igo yaʼ igun inug mbe ne yaʼi inga fìŋ.

¹³ Àmə yaʼ aghi ne chəyi ìmba itog yaʼ inga icheg chɔm, nji à ya imbə̀ʼ Ŋwiye. Ìmba itog mə yaʼ inga icheg chɔm, nji à ya imbə̀ʼ awən.

¹⁴ Aghi ze ne tḭ̀yḛ awa chà imbìghè ya igyendi imbə̀ʼ icheg ne Kristo kɔ̀ŋi awa. Tè kyèri ane imbə̀ʼ icheg ne wə̀d imɔʼ ya ku igun atog abə bəd məjìm. Ane, bəd məjìm fə bə̀ ku.

¹⁵ Wì ya ku igun atog abə bəd məjìm. Wì ya ku ni gha imbə̀ʼ bəd mbe ne yaʼi izɔm ywiri chùghi awɔb ane ìwɔb ighəm. Mbe si chùghi yaʼ imbə̀ʼ aməd we ne ya ku Ŋwiye zwèmni.

¹⁶ Ane, ni ko tèchɔ̀ŋ, chəyi te ywìrè nḛ̀ wə̀d icheg ne wə̀d-aku we nḛ̀. Ka tì ya bì kweʼì nèn Kristo icheg ne bəd-aku mbe nḛ̀, chəyi te ywìrè nḛ̀ aməd ane.

¹⁷ Àze chwi gha wə̀d mɔ̀ʼɔ mə̀ yaʼ ane ifɔti tì Kristo, məd ya si wə̀d feg. Inug anun fə chè, ìmbi feg fə yeʼe.

¹⁸ Inug mbo̰ ijìm nɔ̀ʼ abə Ŋwiye. Wì ya chè anjìm Kristo mànì achɔb tì ina. Wì fə zì àfàʼì ze ni mànì achɔb ina gha tì se fàʼà.

¹⁹ Ane ya gha, Ŋwiye ya chè anjìm Kristo mànì achɔb tì bəd ni gha tì yaʼ bəd məd. Chəyi wì ya taŋi inug tibɔ̀ŋ bəd zì igun inɔb. Wì ya zì ikən imbə̀ʼ anug ni mànì achɔb inga ìta tikye ibo gha tì se ghà abə bəd.

²⁰ Mba ya bəd ne təmi ane ikum Kristo. À ya icheg ni gha Ŋwiye we chè anjìm ina bòʼo ibo abə bəd. Ane tì we bòʼo ibo inən ane ikum Kristo gha mbə̀ mànì achɔb tì Ŋwiye.

²¹ Ŋwiye ya ghì gha Kristo yaʼ wə̀d inug tibɔ̀ŋ ne chəyi wì ya beri anug tibɔ̀ŋ. Ŋwiye ya ghì ane ni gha tì we tì tì təm kòʼ imbìghè abə Ŋwiye anyumə̀ ne tì yaʼi ane ifɔti tì Kristo.