2 Kɔrèn 4 - Ikan feg

Ighi àka inun ne mbi zi inga mbè akwiye ìseg

¹ Icheg ne Ŋwiye chwi àzi àsɔ̀mnəfiŋ ina bə̀ nàʼ àfàʼì azo̰ ina, chəyi ìta fìŋ biri bɔd.

² Tì fə ton awa inug mbe ne bəd mbe ghìyə̀ inə̀mbi. À ya inug ne nàʼà tìnìrètog abə bəd. Chəyi mba mbe ghìyə̀ inug ne tàmba bəd. Chəyi mba mbe bə̀ kɔ̀pɔ anug ne yaʼi inga Ìngam Ŋwiye. Tì we chwìte inug tesiʼ asaŋ asaŋ. Tì we chwìye gha bəd bara gha inug mbe ne mba mbe ghìyə̀ mbe kòʼ imbìghè abə Ŋwiye.

³ Ane, àmə yaʼ aghi ne ndwi kəndi ikən chɔm gho̰ ne te chètè, nji zè kə̀ndi yaʼ abə bəd ne nìme.

⁴ À ya Sàtàn we ne sàʼa isəg gho̰ fə ghùpì fìŋ abə bəd mbe ne chəyi mbi bḛ Kristo. Wì fə ghùpì ìtɔb fìŋ ni ghì gha imbə̀ʼ mbi nɔ̀ʼ bàd ìzḛzḛ we ne yaʼi inga ikən chɔm imbə̀ʼ Kristo. Kristo ya kwàʼ icheg Ŋwiye.

⁵ Chəyi tì ya chètè inug imbə̀ʼ ìwa nyɔd. Tì ya chètè yaʼ gha Yeso Kristo ya Anɔŋisəg, mba ya bəd àfàʼì inən imbə̀ʼ Yeso.

⁶ Ŋwiye ne ya gha, “Ìzḛzḛ zuʼ, afub kye!” Wè ghì ìzḛzḛ we yaʼ ina inga fìŋ. Wì ghì ane ni gha tì kyeri ìzḛzḛ njandi njandi Ŋwiye we ne zùʼə igun ìfe abə Kristo.

⁷ Si ya gha, tè bèrì ighi àka inun mbo̰ inga ìta nyàmnyɔd ne yaʼi icheg mbè akwiye ìseg. Àzo̰ chwi gha ika kyen gho̰ ya nɔ̀ʼɔ̀ abə Ŋwiye kayi ina.

⁸ Ngəʼ ze nyḭ̀yḛ igun ina iba ijìm, si ya gha, chəyi zì zwète awa. Ìmba itog mbe bùrə̀, si ya gha, chəyi ìta fìŋ bɔri.

⁹ Bəd mbe chɔ̀ʼɔ ìmba ibɔʼì ighog, si ya gha, chəyi Ŋwiye waʼi awa. Bəd mbe gwìyè awa tùmə aseg, si ya gha, chəyi tì ku.

¹⁰ Ngəʼ ne te chè inga ya icheg ne Yeso ya bə zə̰ ngəʼ ku. Tì we zə̰ iku ngəʼ gho̰ ane ni ghì gha bəd ya bàrà ìtḛ̀ məd inga ina.

¹¹ Mba mbo̰ ne yaʼi izɔm ya bəd ne yaʼi ichug iwu mà ineg ijìm imbə̀ʼ Yeso ni ghì gha bəd ya bàrà ìtḛ̀ ìwi Yeso inga ìta nyàmnyɔd ìto̰ ne tì ti ku.

¹² Ane, tì we ichug iwu mà nyumə̀ ijìm ni ghì gha mbə jəg ìtḛ̀ ighə̀m imɔ̀.

¹³ Tì bèrì ibḛfiŋ imɔʼ tì wə̀d we ne ya ŋwàʼri inga Àŋwàʼrì Ŋwiye gha, “Mə bḛ, ane, mə fə bə̀ ghàm.” Mba ina bə̀ bḛ, ane, tì we bə̀ ghàmà.

¹⁴ Tè kyèri gha icheg ne tì yaʼi ane anug amɔʼ tì Anɔŋisəg Yeso, Ŋwiye biri bə zwemni awa iwu icheg ne wì ya zwemni aməd. Wì biri ghì ane, si niŋ awa tì ìnen tì fɔrɔ təm ibo imbìghè.

¹⁵ Inug mbo̰ ijìm ya ni wètì awən. À ya ni ghì gha icheg ne bəd nɔʼ nɔʼ fə jəghi ane ìchɔ̀mì Ŋwiye, mbi biri taŋ nàʼ məyakà fɔrɔ ighumni nɔ̀ʼ nɔ̀ʼ abə Ŋwiye.

¹⁶ À ya aton ze ne chəyi ìta fìŋ te bɔ̀rɔ, ka ìta nyàmnyɔd te kùyə ghò. Ŋwiye we nàʼà ìtḛ̀ feg ina ineg ijìm.

¹⁷ Ngəʼ kwa kwa ìzo̰ ne te chè inga, chəyi zì biri tàndì. Zì ya chùʼrə awa ni nyi inga nyùmə̀ ighumni ne chəyi wì biri nɔʼ mèg. Nyumə̀ ighumni we taŋ bɔ̀ŋ chè ngəʼ izo̰.

¹⁸ Ane, chəyi tì zi ìta fìŋ igun ighi ne te bàrà. Tè zì ìta fìŋ yaʼ igun ighi ne chəyi te bàrà. Aton ya gha, ighi mbe ne te bàrà, chəyi mbe tàndà. Àsi ighi mbe ne chəyi te bàrà, à ya ighi ne yaʼi ane ighə̀m imɔʼ.