2 Kɔrèn 2 - Ikan feg

¹ Chəyi mə̀ ya kə̀bi ni ywiri chìkì ìtən fìŋ. À ya aton ne mə̀ ya niŋi isɔb anug ni kṵ̀ igha̰ we ni ywìri yeʼe mug awən.

² Àkə aghi ne mə̀ ya yeʼe pè chìkì ìtən fìŋ, nji bəd ndəŋ ni biri si ghì mə gyendi àkə mə̀we, ne mə fə ya chìkì ìtən fìŋ? Chəyi bəd ndəŋ angu ne tì mbi ghì mə gyendi chèyi ane inən.

³ Aton ne mə̀ ya ŋwàʼri àŋwàʼrì ze inən ane ya gha, à ya mbə̰ koʼi ni ghì gha mə̀ gyendi. Ane, chəyi mə̀ ya kə̀bi ni yeʼe mbə̀ chìkì ìmə fìŋ. Anug ne mə̀ kyeri kwàʼ icheg chɔm ya gha, anyumə̀ ne mə̀ gyènde, mbə̰ məjìm mbe bə̀ gyènde.

⁴ Anyumə̀ ne mə̀ yaya ŋwàʼrà àŋwàʼrì ze inən mə yaya sɔ̀mnɔ̀, ibəʼ ya bə̀ yaʼ inum inga fìŋ, mə se dèghè. Chəyi mə̀ ya ŋwàʼri ni chìki ìtən fìŋ. Mə ya ŋwàʼrì ni chwi icheg ne mə̀ taŋ kɔ̀ŋ awən mbə̰ məjìm.

Anug ni waʼ inug tibɔ̀ŋ bəd ndəŋ

⁵ Wə̀d mɔ̀ʼɔ mə̀ ghì wə̀d ndəŋ gaŋ, kayi məyi mo ne tengàŋ chìkì ìmə fìŋ, wì chìkì fìŋ abə wə̀d ijìm chè ìzum. Chəyi mə̀ biri ghàm ako imbə̀ʼ anug azo̰.

⁶ Icheg we ne bəd nɔʼ nɔʼ abɔ̀ʼ inən fə chə aməd, ze kòʼ ane.

⁷ Nyùmə̀ fə kòʼ ni waʼ inug tibɔ̀ŋ məd bə̀ nə̀ri aməd. Àmə chəyi ane, nji wì biri sɔ̀mnɔ̀, ibḛfiŋ məd se bɔ̀rɔ.

⁸ Ane, mə boʼ ibo nàʼ inən, mbə̀ chwi ibo gha mbə kiri kɔ̀ŋ aməd.

⁹ Mə ya chà àŋwàʼrì ze inən ni nèn gha kə̀ mbə biri zùgrə tikə te tijìm ne mə̀ nàʼà inən.

¹⁰ Mə biri bə waʼ inug tibɔ̀ŋ abə wə̀d ne mbə̀ fə waʼi inug tibɔ̀ŋ məd. Àmə yaʼ aghi ne anug tibɔ̀ŋ mɔ̀ʼɔ yaʼi angu ni waʼ, nji mə biri ghì ane imbə̀ʼ awən imbìghè abə Yeso Kristo.

¹¹ Tì ya ghìyə̀ ane ni gha imbə̀ʼ Sàtàn beri yi apan mɔ̀ʼɔ ni tambi awa. Tè kyèri inug ijìm nə aməd we chùʼrə ya məyi inug tibɔ̀ŋ.

Anug ne ya chìki fìŋ abə Pɔl a Truwàs

¹² Anyumə̀ ne mə̀ ya gho a Truwàs ni chètì ikən chɔm imbə̀ʼ Kristo, mə̀ ya pè bàd gha Anɔŋisəg fə nàʼ apan inum ni fàʼ ibo angu.

¹³ Icheg ne chəyi mə̀ ya pe bàd ìmə ifi Tayitùs, ze ya chìkì ìmə fìŋ. Ane, mə̀ ya nàʼrì inɔb, jəg inɔnjì ghò amə a Màsèdonìyà.

¹⁴ Tesiʼ ya gha, tè nàʼ məyakà abə Ŋwiye imbə̀ʼ icheg ne tì yaʼi ane ifɔti tì Kristo. Məd we chè ina imbìghè mà nyumə̀ ijìm ghìyə̀ awa tì yḛ ane iwaŋ icheg mə̀sogyì ne maʼi ibid chè. Məd we ghìyə̀ tì chetè ikən chɔm imbə̀ʼ Anɔŋisəg mà isiŋi ijìm ne te ghò. Ikən chɔm gho̰ ya kwàʼ icheg ifɔ chɔm abə wə̀d ijìm.

¹⁵ Mba ya icheg aghi ze ne nyòʼro ifɔ chɔm ne Kristo we nàʼà abə Ŋwiye. Tì ya nyòʼro ifɔ chɔm abə bəd mbe ne Ŋwiye we pùmnə fɔrɔ abə bəd mbe ne nìme.

¹⁶ Abə bəd mbe ne nìme, ifɔ gho̰ ya nyòʼo, zwète awɔb. Àsi abə bəd mbe ne pùmə, ifɔ gho̰ ya nyòʼro nàʼà ìtḛ̀. Àkə we ne taŋ kòʼ ni fàʼ iku àfàʼì gho̰?

¹⁷ Chəyi mba yaʼi icheg bəd nɔʼ nɔʼ mbe ne nìŋə anug ni ghàm Ìngam Ŋwiye ane iywin ni bèrì chùd. Mba ya ghà yaʼ tesiʼ ane ìza fìŋ ijìm imbìghè abə Ŋwiye icheg ne tì yaʼi ane ifɔti tì Kristo. À ya Ŋwiye zìye tɔmi awa gha tì ghama.