2 Kɔrèn 12 - Ikan feg

Inug ne Anɔŋisəg ya chwi abə Pɔl

¹ Mə bèrì ikɔmi igo, ka chəyi jiʼì chùd mɔ̀ʼɔ inga. Mbə̀ si mə̀ məti inug ne Anɔŋisəg ya chwi inum inga anatì njə̀m fɔrɔ mbe ne wì ya ghi mə kyeri.

² Mə kyèri wə̀d mɔ̀ʼɔ ne yaʼi wə̀d Kristo. Ŋwiye ya ghì wì kɔʼ ghò nyi inga àbɔ̀ŋɔ ze ne pè ane itad. Kə̀ wì ya ghò nyi ane nyàmnyɔd kə̀ kayi ane nyàmnyɔd, chəyi mə̀ kyeri. Tèchɔ̀ŋ ya fə si tituʼ ìghum chɔ̀b ikwe ne anug azo̰ ya du.

³ Kə̀ wì ya ghò ane inga nyàmnyɔd kə̀ inga azwighi njiʼ, chəyi mə̀ kyeri. À ya məyi Ŋwiye kyèri.

⁴ Si ya gha, wì ya nyi inga paràdayìs, zug inug ne che ibo, ne chəyi tì wə̀d mə̀tì ane ichug.

⁵ Mə bèrì ikɔmi igo imbə̀ʼ iku wə̀d gho̰. Si ya gha, chəyi mə̀ biri kɔm igo imbə̀ʼ amə nyɔd mo mo ka. Mə biri kɔm igo imbə̀ʼ ighi mbe ne chwìye gha mə bɔd.

⁶ Ka mə bì kə̀b ni kɔ̀m igo, mo kayi anen imbə̀ʼ icheg ne mə̀ biri ya ghà tesiʼ. Si ya gha, mə biri kɔ̀m igo imbə̀ʼ icheg ne chəyi mə̀ kəbi gha wə̀d mɔ̀ʼɔ niŋ inug mbe ne mə ghìyə̀ kə̀ inug mbe ne mə ghà se kɔ̀ndɔ gha mə faŋ chè wə̀d ne mə̀ yaʼi ìwiwən.

⁷ Ŋwiye ya sàŋì gha Sàtàn ziye aghɔn igun inum ni ghì gha imbə̀ʼ mə nɔ̀ʼ ya nɔ̀ nyɔd imbə̀ʼ iyeti inug kyen kyen mbe ne Ŋwiye ya chwi inum.

⁸ Mə ya boʼ ibo aghəm atad abə Anɔŋisəg gha wì chi aghɔn ze inum ane nyɔd.

⁹ Si ya gha, aghəm atad ze ajìm, wì ya ywìtì gha, “Ìchɔ̀mì we ne mə ghi ine we kòʼ. Aton ya gha, wə̀d ya taŋ bàrà ìmə ika anyumə̀ ne wì bɔ̀ri.” Ane, mə gyen ni kɔ̀m igo imbə̀ʼ inug mbe ne chwìye gha mə bɔd. Anìŋ ya ni ghì gha ika Kristo se fàʼà inga inum.

¹⁰ À ya aton ze ne mə niŋi inug mɔ̀ʼɔ imbə̀ʼ Kristo kwàʼ ane igyendi. Inug mbe ya: inug ne ghìyə̀ mə bɔrɔ, tì tizɔmbì, tì inug ne kà, tì icheg ne bəd mbe chɔ̀ʼɔ ìmbum ibɔʼì ighog, fɔrɔ tiku ngəʼ tijìm. Ane, anyumə̀ ne mə̀ bɔri, Kristo ya ghìyə̀ mə kà.

Pɔl zì fìŋ igun ifeti bəd Ŋwiye we a Kɔrèn

¹¹ Mə we ghìyə̀ inug icheg anen. À ya mbə tḭ amə gha mə se ghìyə̀ inug icheg anen. À ya mbə̰ ya beri ni chwi gha mə we ghìyə̀ inug ne koʼi. Ka mə̀ ya aghi ako, chəyi mə̀ kə chè bəd mbe ne bəd mɔ̀ʼɔ mbe kàrà ane “bədtɔm kyen kyen”.

¹² Inug ne ghìyə̀ bəd kyere gha wə̀d ya wə̀dtɔm Kristo ya iyeti inug kyen kyen fɔrɔ ineni. Mə ya ghì inug mbo̰ inən bə̀ bèrì inyimbifiŋ ni chwi gha mo ya wə̀dtɔm Kristo.

¹³ Aton ne mbə̀ kɔndi gha tifeti bəd Kristo ndəŋ bèrì ati chè awən àkə gha? Chèyi gha chəyi mə̀ ya yaʼi icheg mbèʼ igun. Àze mə bə, mbə̀ waʼ àmə anug tibɔ̀ŋ.

¹⁴ Mə fə kweʼì yèʼe mùg awən aghəm abe. Mə biri ywiri yeʼe mùg awən ighəm ndəŋ. Chəyi mə̀ bìre gha mbə̀ naʼa aghi mɔ̀ʼɔ inum. Chəyi mə̀ bə̀ kə̀bə̀ ìmbən ighi. Mə ya kə̀bə̀ yaʼ awən. Chəyi bɔn kwa mbe nɔ̀ŋɔ̀ ighi abə ìmbɔb mə̀mbaʼ. À ya mə̀mbaʼ mbe nɔ̀ŋɔ̀ ighi abə ìmbɔb bɔn.

¹⁵ Mə biri gyen ni nàʼ ighi ijìm ne mə beri bə̀ nàʼ àmə atog imbə̀ʼ awən. Mə mə̀ taŋ kɔ̀ŋ awən anìŋ, mbə wa biri si kɔ̀ŋ amə məyi iki piʼì?

¹⁶ Mbə̰ mɔ̀ʼɔ kyeri àzən aghi gha chəyi mə̀ ya zi mbèʼ mɔ̀ʼɔ igun inən. Mə̀mbin mbe kiri nè kɔ̀ndɔ gha mə yaya ghi inug iji iji, bə̀ mə̀tì inug ako ni jəg awən.

¹⁷ Ze wa chwi gha, mə̀ ya chè anjìm wə̀d mɔ̀ʼɔ abɔ̀ʼ bəd mbe ne mə̀ ya cha inən jəg awən?

¹⁸ Mə ya boʼ ibo abə Tayitùs gha wì yèʼe mùg awən. Mə ya bə̀ chà ìwa ifi tì məd. Mə kyèri gha chəyi Tayitùs ya jəg awən. Imbə̀ʼ mba tì Tayitùs yaya fɔrɔ fàʼà ane fìŋ imɔʼ?

¹⁹ Mbə kə anìŋ kɔ̀ndɔ gha tì ya tàŋà ìwa nyɔd inən imbìghè? Indèʼ! Tì ya ghàmà anug ne koʼi abə Ŋwiye icheg ne tì yaʼi ane ifɔti tì Kristo. Ìmba mə̀sə̀ʼ ne tì taŋ kɔ̀ŋ, inug ijìm ne te ghìyə̀ ya ni wètì awən gha mbə̀ təm kà.

²⁰ Ane, mə we bɔ gha anyumə̀ ne mə̀ biri yeʼe, ighəm mɔ̀ʼɔ chəyi mə̀ biri pè kɔ̀ti awən icheg ne mə̀ kəbi gha mbə̀ yaʼ. Ighəm mɔ̀ʼɔ chəyi mbə̰ inən biri bə kɔ̀ti mə icheg ne mbə̰ mbe kə̀bə̀ gha mə yaʼ. Aton ne mə bɔ ya gha, mə biri pè kɔ̀ti bəd ne chɔ̀bɔ, tì bəd ne ghìyə̀ àdeg, tì bəd ne nɔ̀ŋɔ̀ agaŋ, tì bəd ne sìyè, tì bəd ne chìkə̀ tikum abə mə̀mbin, tì bəd ne ghìyə̀ mənìghe, tì bəd ne nɔ̀ nyɔd fɔrɔ bəd ne bùrə̀ isiŋi.

²¹ Mə we bɔ gha, anyumə̀ ne mə̀ ywirì yèʼe, Ŋwiye biri swi amə aseg inən imbìghè. Ŋwiye biri ghì mə dèg imbə̀ʼ bəd nɔʼ nɔʼ ne chəyi mbi kiri bəŋi fìŋ sìkì inug tibɔ̀ŋ. Chəyi mbi kiri bəŋi ìtɔb fìŋ chì ane àfànì tì anug ni nɔ̀kì mə̀yi kə̀ mbaŋà abu abu.