2 Kɔrèn 11 - Ikan feg

Pɔl pàti bəd Kristo imbə̀ʼ bəd inug ako

¹ Mə kə̀b gha mbə̀ ywirì bèrì inyimbifiŋ sàŋì amə mə ghama iki piʼì icheg anen. Mbə̀ bere inyimbifiŋ!

² Mə we ghə̀ʼrə̀ awən, icheg ne Ŋwiye we bə̀ ghə̀ʼrə̀. Aton ya gha mbə̰ ya icheg fɔ̀d ŋwan àyi zḛ zḛ ni mə nàʼi ane inam abə inɔm fìbì. Inɔm we ya Kristo.

³ Si ya gha, mə we bɔ gha icheg ne jo ya ghum tàmbi If ane iwe mənaŋ, mbi biri bə tambi awən ghì mbə chì ìwən ikɔndi chɔm we ne mbə̀ bèrì ni kɔ̀ŋ Kristo bə̀ zì ìzən fìŋ ijìm igun məd.

⁴ Aton ya gha, mbə̰ ya zàmbà niŋ inug ijìm ne bəd mbe yèʼe pè ghà inən. Kə̀ àkə mbi ghà inug imbə̀ʼ Yeso ndəŋ ne kayi ìwe ne tì ya gha inən, ka mbi yèʼe tì Azwighi ndəŋ ne kayi àze ne mbə̀ ya niŋi ina, ka mbi chètì ikən chɔm ndəŋ ne kayi we ne mbə̀ ya zughi ina, mbə̰ ya zàmbà bḛ witì kɔ̀ndi.

⁵ Chəyi mə̀ kɔndi gha bəd mbe ne bəd mɔ̀ʼɔ mbe nìŋə ane “bədtɔm Kristo kyen kyen” mbe bèrì ati chè amə.

⁶ Ka chəyi mə̀ taŋ kyèri icheg ni ghàm inga bəd, tesiʼ ya gha, mə kyèri inug. Tì fə taŋ tòʼri inug mbo̰ inən ane ikuchèg ijìm.

⁷ Icheg ne mə̀ ya swi ìmə nyɔd aseg ni nàʼ ighumni inən anyumə̀ ne mə̀ yaya chètì ikən chɔm inən ne nɔʼi abə Ŋwiye, à wa kə anug ne mə̀ ya gùghi?

⁸ Anyumə̀ ne mə̀ yaya fàʼà inən, à ya ifeti bəd Ŋwiye ndəŋ yaya nàʼà ighi inum. Ze ya yaʼ icheg ni gha mə̀ ya ji ighi inɔb ni wètì awən.

⁹ Anyumə̀ ne mə̀ ya yaʼi mbə inən chəyi mə̀ ya biri àwètì inən ane nyumə̀ ne mə̀ yaya kə̀bə̀ àwètì. Aton ya gha, ìmba məfi fɔrɔ ìta njàbi ne ya nɔ̀ʼi a Màsèdonìyà ya nàʼ ighi ijìm ne tì yaya kə̀bə̀. Icheg ne chəyi mə̀ ya zi mbèʼ igun inən, chəyi mə̀ biri si zì amad anìŋ.

¹⁰ Mə mə̀ chè imbìghè ni ghà tesiʼ imbə̀ʼ Yeso, chəyi wə̀d mɔ̀ʼɔ inga aba aben Akìyà ne tì wì ghì gha imbə̀ʼ mə kɔ̀m ìmə igo.

¹¹ Mə kə ghàmà anìŋ imbə̀ʼ icheg ne chəyi mə̀ kɔ̀ŋɔ̀ awən? Indèʼ! Ŋwiye kyèri gha mə kɔ̀ŋ awən.

¹² Mə biri chè imbìghè ni kiri fàʼ àfàʼì azo̰ ne mə fàʼà ni wùbi ichug abə bəd mbe ne bəd mɔ̀ʼɔ mbe nìŋə gha à ya “bədtɔm Kristo kyen kyen.” Ane, chəyi mbɔb biri ywìri bèrì apan ni kɔ̀m igo gha mbɔb mbe bə̀ fàʼà àfàʼì ze ne te fàʼà.

¹³ Bəd inug ako mbe ne gha mbɔb ya bədtɔm Kristo ya chwìye ìfe icheg bəd ne ghà tesiʼ, si ya gha, mbɔb ya tàmbà bəd.

¹⁴ Kayi anug ni jə̀m imbə̀ʼ icheg ne Sàtàn ya bə̀ chwìye ìwi ìfe icheg angirə̀ ìzḛzḛ.

¹⁵ Kayi bə̀ anug ni jə̀m gha bəd àfàʼì Sàtàn mbe chwìye ìfe icheg bəd ne fàʼà inug ne təmi kòʼ. Ìwɔb ìnwḭ biri yaʼ icheg ne àzɔb àfàʼì chwi.

Icheg ne Pɔl ya zə̰ ngəʼ

¹⁶ Mbə̀ si mə ywirì kɔ̀mbì inən gha, imbə̀ʼ wə̀d nìŋə yi awum ane anen. Àmə yaʼ aghi ne gha mbə̰ ya nìŋə mə ane anen, nji ze yaʼ ane imbə̀ʼ mə kɔmɔ ìmə igo iki piʼì.

¹⁷ Tesiʼ ya gha, anug azo̰ ne mə ghàmà amad anìŋ ya kayi anug ne Anɔŋisəg gha inum gha mə ghama. Ane anug ni kɔ̀m igo, mə ya ghàmà kwàʼ icheg anen.

¹⁸ Icheg ne bəd nɔʼ nɔʼ mbe kɔ̀mɔ̀ igo icheg bəd igun isəg, mə biri bə kɔ̀m igo.

¹⁹ Icheg ne mbə̀ kɔndi gha mbə bèrì iwe, mbə̰ mbe kɔ̀ŋɔ̀ ni ya zùghə inug ne inen mbe ghà.

²⁰ Tesiʼ ya gha, mbə̰ mbe kɔ̀ŋɔ̀ bəd ne nìŋə awən ane məfeg, kə̀ bəd ne jə̀ghə awɔb igun inən, kə̀ bəd ne nyə̀ʼə̀ awən, kə̀ bəd ne chwìye nyɔd, kə̀ bəd ne nìbè awən kwàʼ igun ìfe.

²¹ À ya tìnìrètog inum ni bḛ gha chəyi tì ya beri fìŋ ni ghì ane. Wə̀d mɔ̀ʼɔ mə̀ kə̀ bèrì anug ne tì wì təm kɔ̀m igo igun, nji mo inum bə̀ bèrì. Mbə̀ si mə̀ ghàmà mə anìŋ icheg anen.

²² Mbɔb kə mə̀Ju? Mo inum ya bə̀ Ju. Mbɔb kə mə̀Izre? Mo inum ya bə̀ wə̀d Izre. Mbɔb kə bɔn ane aghaŋ inəbi Abràham? Mo inum ya bə̀ ŋwan ane aghaŋ inəbi Abràham.

²³ Mbɔb kə bəd àfàʼì Kristo? Mo inum ya bə̀ wə̀d àfàʼì Kristo ne beri ati chè awɔb. Mə ya ghàmà anìŋ icheg atəd: Mə kirə ika ane ìfàʼì chè awɔb. Mə nyi ndəŋ aghəm nɔʼ nɔʼ. Mbe bə̀ ywìri mə aghəm nɔʼ nɔʼ. Mə bə̀ ghò pè ichug iwu aghəm nɔʼ nɔʼ.

²⁴ À ya aghəm ata̰ ne mə̀Ju ya ywiri mə ane ngwàn aghəm ìghum itad chɔ̀b àbɔg.

²⁵ MəRom ya boʼ mə ane mbàŋì aghəm atad. Mbi ya tumbi mə ane ateg ighə̀m imɔʼ. Mə ya chwed iwu ne abaŋ igyi ya sanda tì inum inga aghəm atad. Mə ya zi zi ni nəŋ igun igyi tìbà bə̀ neg ighə̀m imɔʼ.

²⁶ Mə yḛ tigha̰ nɔʼ nɔʼ. Mə ya ŋa kùwə inga tigyi kyen kyen. Məji ya bə̀ kùg mə. Ìmbum tìbəd ya ŋa zwète mə. Bəd ne kayi mə̀Ju ya bə̀ ŋa zwète mə. Mbi ya fə ŋa zwète amə inga ikye aben fɔrɔ inga tibad zɔbi. Mə ya chwed iwu inga ngəʼ inga tìbà. Mə ya bə̀ chè inga ngəʼ fɔrɔ ikye abo abə bəd ne bèmnè inug ne ya chwi ìwɔb ìfe icheg bəd Kristo.

²⁷ Mə faʼ ìfàʼì ka ka. Mə neg ikyeʼi aghəm nɔʼ nɔʼ. Mə chùghi njèg. Mə dèg adɔʼ mənib aghəm nɔʼ nɔʼ. Mə chùghi aghəm nɔʼ nɔʼ ne chəyi taŋ ighijəg. Mə bə̀ chùghi inga ifə ne chəyi ndwi ni kəndi nyɔd.

²⁸ Inug ndəŋ mbe kiri angu, ni yètì abɔ̀ʼ inug mbo̰. Mə we kɔ̀ndɔ ze nìrè inum inga fìŋ ineg ijìm gha, “Kə̀ tifeti bəd Kristo ti iye?”

²⁹ Wə̀d ne bɔri ne chəyi ibɔri bə gwì mə, àkə we? Wə̀d ne gughi anug ne chəyi ze se amə, àkə we?

³⁰ Àmə yaʼ ni gha mə mənyìʼ kɔ̀m igo, nji mə biri kɔm igo imbə̀ʼ inug mbe ne chwìye gha chəyi mə̀ beri ika.

³¹ Ŋwiye ne yaʼi Mbaʼ abə Anɔŋisəg Yeso, məd we ne kòʼi ni niŋ ighumni ane ighə̀m imɔʼ, məd kyèri gha chəyi mə̀ ghà inug ako.

³² Anyumə̀ ne mə̀ ya yaʼi a Dàmaskòs, gɔbnà we ne yaya fàʼà aton ifɔn Àretàs ya nɔ̀ŋì mə̀sogyì inuʼ ikam aben gha mbe ghɔmɔ mə gwì.

³³ Si ya gha, mbi ya zì amə inga fiko, chà ane windò ne yaʼi ibəm ikam, si swi amə aseg, mə nòrò bu ibo ikye abo.