2 Kɔrèn 10 - Ikan feg

Pɔl ghàm chwi gha àfàʼì məd kòʼ

¹ Mo Pɔl, mə boʼ ibo inən ane ikum Kristo we ne bɔ̀tɔ ane ikuchèg bə̀ bɔ̀tɔ ane fìŋ. Bəd mɔ̀ʼɔ abɔ̀ʼ inən mbe ghà gha, mo ya swìye àmə nyɔd aseg anyumə̀ ne mə̀ yaʼi abɔ̀ʼ inən, se bèrè fìŋ ne kà anyumə̀ ne chəyi mə̀ yaʼi abɔ̀ʼ inən.

² Mə boʼ ibo inən, imbə̀ʼ mbə̰ kɔ̀ndi awən gha, anyumə̀ ne mə̀ yeʼe abɔ̀ʼ inən, mə biri niŋ fìŋ ne ka ni ghàm inən. Mə kyèri gha mə we tì mə niŋ fìŋ ne ka ni ghàm anyumə̀ ne mə̀ yaʼi inga bəd mbe ne kɔ̀ndɔ gha mba ya ghìyə̀ inug icheg ne bəd-aku mbe ghìyə̀.

³ Ka tì jiʼì yaʼ inga isəg, chəyi te màʼà ibid icheg ne bəd inga isəg mbe màʼà.

⁴ Ìmba ighi ibid ya kayi icheg ighi ibid bəd-aku. À ya ighi ibid Ŋwiye ne beri ika ni chìkì isiŋi mbe ne bəd ìpàb məd yaʼi angu.

⁵ Tì ya nìŋə ighi ibid mbe ni nimni inug mbe ne bəd mbe tàŋà inug imbə̀ʼ mbiwən bə̀ nimni inug ijìm mbe ne kə̰ gha imbə̀ʼ bəd si nɔ̀ʼ kyèri Ŋwiye. Tì ya bə̀ nìŋə ighi ibid mbe ni kɔd tikɔndi tijìm te ne bəd beri, si ghì gha te zugri Kristo.

⁶ Anyumə̀ ne mbə̀ fə chwi gha mbə̰ mbe zùgrə Kristo ane inug ijìm, tì biri si kòʼ ni chə bəd mbe ne ghìyə̀ tìzughə̀ abə Kristo.

⁷ Mbə̰ ya nḛ̀ ighi məyi asaŋ asaŋ. Wə̀d ne kyeri gha zìye ya wə̀d Kristo, wì bə kyèri gha mba ya bə̀ bəd Kristo kwàʼ icheg məd.

⁸ Ka mə bì kɔ̀m igo imbə̀ʼ ika we ne Anɔŋisəg nàʼi ina, chəyi tì mə bèrì tìnìrètog. Ika we ya ni ghì gha mbə̀ təm kà, kayi ni ghì gha ìtən fìŋ bɔd.

⁹ Imbə̀ʼ mbə̰ kɔndi awən gha mə̀ ya fàŋà awən ane ìŋwàʼrì mbe ne mə chà inən,

¹⁰ imbə̀ʼ icheg ne bəd mɔ̀ʼɔ mbe ghà gha, “Ìŋwàʼrì məd ya kà ako bə̀ tɔ. Si ya gha, anyumə̀ ne wì yaʼi abɔ̀ʼ ina, wì ya bɔ̀rɔ, chəyi ìngam məd we bə̀ gwìyè mənib.”

¹¹ Tiku bəd te kyèri gha, inug mbe ne tì ŋwàʼri ne chəyi awa abɔ̀ʼ inən, tì biri bə fàʼ anyumə̀ ne tì yaʼi abɔ̀ʼ inən.

¹² Chəyi tì biri mə̀grì ìwa nyɔd ka iki piʼì, kə̀ bì sìmnè ìkyen tì bəd mbe ne kɔ̀mɔ̀ igo gha mbɔb mbe fàʼà chè bəd ndəŋ. Mbɔb ya inen imbə̀ʼ icheg ne mbɔb ya mə̀grə̀ ìwɔb nyɔd bə̀ sìmnè ìkyen mbɔb mbɔb.

¹³ Àsi awa, chəyi tì biri kɔ̀m igo chè icheg ne tì tì kɔm. Tì mə kə̀b ni kɔ̀m igo, tì biri kɔ̀m yaʼ imbə̀ʼ àfàʼì ze ne Ŋwiye zi ina ikye abo. Àfàʼì ze ya bə̀ fɔrɔ ni fàʼ inən.

¹⁴ Icheg ne te kɔ̀mɔ̀ igo gha tì ya yeʼe fàʼ inən, chəyi tì kɔmi igo chè ati. Tì ya kɔ̀mɔ̀ igo gha mba ya bəd mbègtog ne yeʼe ghà ikən chɔm imbə̀ʼ Kristo inən.

¹⁵ Chəyi te chè ati se kɔ̀mɔ̀ igo imbə̀ʼ àfàʼì ne bəd ndəŋ faʼi. Ìwa ikɔndi ya gha, icheg ne ìwən ibḛfiŋ igun Ŋwiye we kwèghe, àza àfàʼì ne tì beri ni fàʼ inən biri yètè.

¹⁶ Ze mə̀ yaʼ ane, tì we tì tì bə ghà ikən chɔm gho̰ inga iba iben ndəŋ. Chəyi tì kəbi ni kɔ̀m igo imbə̀ʼ àfàʼì ne wə̀d ndəŋ fə fàʼi inga ìwɔb ichug àfàʼì.

¹⁷ A ze inga Àŋwàʼrì Ŋwiye gha, “Wə̀d ne kɔ̀mɔ̀ igo, tengàŋ kɔmɔ igo yaʼ ane àfàʼì ne Anɔŋisəg fàʼi.”

¹⁸ Chəyi Anɔŋisəg we bḛ wə̀d ne gha zìye fàʼ icheg chɔm. Anɔŋisəg ya bḛ yaʼ wə̀d ne məd zìye gha gha wə̀d we fàʼ icheg chɔm.