1 Timotì 4 - Ikan feg

Bəd ne chwìte inug ako

¹ Azwighi Ŋwiye ya fə ghà ze dù zen gha, inga ineg mbe ne yèʼe, bəd mɔ̀ʼɔ biri waʼ ìwɔb ibḛfiŋ se bène yaʼ abɔ̀ʼ izwighi ne ghàmà inug ako fɔrɔ anjìm abə inug ne izwighi tibɔ̀ŋ mbe chwìte.

² Bəd ne chwìte tiku inug ìto̰ ya bəd ne bèmnè inug tì bəd inug ako. Ìtɔb fìŋ fə ku icheg ni gha mbi tɔ̀n ane anyaŋì.

³ Mbɔb ya gha, imbə̀ʼ bəd nama awɔb, bə̀ gha, imbə̀ʼ bəd jəghə awɔb tiku tijəg mɔ̀ʼɔ. Ŋwiye ya tangi ighi mbo̰ ijìm gha bəd mbe ne bḛ aməd bə̀ kyèri tesiʼ, mbe jəg, nàʼ məyakà ibo.

⁴ Ighi ijìm mbe ne Ŋwiye ya tangi ya ìmbi chɔm. Chəyi wə̀d kòʼi ni ton aghi mɔ̀ʼɔ. Ane, bəd bèrì ni nàʼ məyakà ibo imbə̀ʼ ighi mbe ne wì nàʼi inɔb.

⁵ Aton ya gha, Ìngam Ŋwiye fɔrɔ ichaʼri Ŋwiye fə ghì ighi mbe zen.

Wə̀d àfàʼì chɔm ne fàʼà abə Yeso Kristo

⁶ Àghò mə chwìti inug mbo̰ abə bəd Ŋwiye, àghò biri yaʼ wə̀d àfàʼì chɔ̀m ne fàʼà abə Yeso Kristo. Àghò biri yaʼ wə̀d àfàʼì ne təmi kà inga tesiʼ ane anug Ŋwiye fɔrɔ inga inug chɔm mbe ne mbi ya chwiti ine.

⁷ Imbə̀ʼ àghò bere awe anug mɔ̀ʼɔ ni ghì tì tìmùghì twaŋi ne chəyi te ghìyə̀ gha bəd kyeri Ŋwiye. Nɔ̀ŋɔ àze atog ni kyeri inug mbe ne biri ghì gha àghò taŋ zì fìŋ ane anug Ŋwiye.

⁸ Anug ni sèmbì nyɔd ze bɔ̀ŋ. Si ya gha, anug ni kyeri Ŋwiye bɔ̀ŋ chè inug ijìm imbə̀ʼ icheg ne Ŋwiye kàʼ inug ina inga nyùmə̀ isəg gho̰ fɔrɔ inga nyùmə̀ isəg we ne yèʼe.

⁹ Aŋa ya ajiʼi anug ne tì beri ni niŋ bə̀ bḛ.

¹⁰ Tì ya ghìyə̀ ika ijìm ni taŋ fàʼ imbə̀ʼ icheg ne tè nɔ̀ŋì ìwa ikɔndi igun Ŋwiye ne yaʼi izɔm. Məd ya Ŋwiye we ne pùmnə bəd məjìm. Wì ya taŋ zìyè atog ni pumni bəd mbe ne bḛ aməd.

¹¹ Àghò naʼa tikə ìto̰ abə bəd mbe ne bḛ Kristo bə̀ chwìti inug mbo̰ ijìm inɔb gha mbe ya fàʼà.

¹² Imbə̀ʼ àghò saŋa awe gha wə̀d mɔ̀ʼɔ chapa awe imbə̀ʼ icheg ne àghò yaʼi ŋwan kwa. Àghò bèrì ni yaʼ icheg aməgrì abə bəd mbe ne bḛ Kristo ane ìwe ìngam ichug fɔrɔ ane ìwe ikuchèg fɔrɔ ane icheg ne àghò we kɔ̀ŋɔ̀ bəd fɔrɔ ane ikuchèg ne àghò tə̀mi kà inga ìwe ibḛfiŋ fɔrɔ ane icheg ne àghò we bə̀ ghìyə̀ inug ne zḛ.

¹³ Nḛ gha àghò zì atog ni ya fɔ̀ŋɔ Ìngam Ŋwiye abə bəd, bə̀ taŋ ghàmà Ìngam Ŋwiye abə bəd bə̀ taŋ chwìte Ìngam Ŋwiye abə bəd anene ghò pè ane nyumə̀ ne mə̀ biri yeʼe.

¹⁴ Imbə̀ʼ àghò waʼra awe ineʼi we ne Ŋwiye nàʼi ine. Ŋwiye ya nàʼ ineʼi ine anjìm Azwighi məd anyumə̀ ne bədkə̀n Ŋwiye ya gha inug imbə̀ʼ awe, itog bəd Kristo bə̀ nɔŋi ìmbɔb ibo igun ine, chàʼra Ŋwiye ine.

¹⁵ Àghò taŋ zì atog igun inug mbo̰ bə̀ ya fàʼà mbiwən. Àghò ghiyə ane imbə̀ʼ wə̀d ijìm bàri gha àghò we kwèghe ane àze àfàʼì.

¹⁶ Àghò we awe imbə̀ʼ ìwe ikuchèg fɔrɔ imbə̀ʼ inug mbe ne àghò we chwìte. Nyimbi fìŋ ane inug mbo̰ imbə̀ʼ icheg ne àghò mə ghì ane, àghò biri pumni ìwe nyɔd bə̀ pùmni bəd mbe ne àghò we chwìte inug inɔb.