1 Tèsàlonikà 5 - Ikan feg

Mbə̀ chuʼri nyɔd ghɔ̀m nyumə̀ we ne Anɔŋisəg biri ywiri yeʼe

¹ Ìmba məfi fɔrɔ ìta njàbi, chəyi aton mɔ̀ʼɔ ni ŋwàʼrì inug inən imbə̀ʼ nyumə̀ kə̀ imbə̀ʼ ineg mbe ne Anɔŋisəg biri ywiri yeʼe.

² Chəyi aton mɔ̀ʼɔ imbə̀ʼ icheg ne mbə̰ fə kyeri àzən aghi gha aneg ze ne Anɔŋisəg biri ywiri yeʼe biri yaʼ kwàʼ icheg ne iji we yèʼe izimi.

³ Anyumə̀ ne bəd biri ya ghà gha, “Tì we awa ane àbɔrɔ̀bɔd. Chəyi aton ni bɔ aghi mɔ̀ʼɔ,” ngəʼ kyen biri sàʼa nyi igun inɔb kwàʼ icheg ne tibuʼ te sàʼa se àyi ne nɔ̀mbɔ ni gwi. Chəyi bəd biri nɔʼ bu inga ngəʼ kyen ze.

⁴ Àsi awən, ìmba məfi fɔrɔ ìta njàbi, tesiʼ ne angu ya gha, chəyi mbə̰ mbe ghìyə̀ inug tibɔ̀ŋ icheg bəd mbe ne ghìyə̀ inug izimi, ne aneg ze biri sàʼa yeʼe igun inən icheg ne iji we yèʼe.

⁵ Mbə̰ məjìm ya ghìyə̀ inug ne koʼi kwàʼ icheg bəd mbe ne ghìyə̀ inug tisi ne isiŋi mbe zḛ. Chəyi tì yaʼi bəd ne ghìyə̀ inug tibɔ̀ŋ icheg bəd mbe ne ghìyə̀ inug izimi ne chəyi tì wə̀d bad.

⁶ Ane, imbə̀ʼ tì ya gwḛ awa icheg mə̀mbin ne chəyi mbi kyeri Ŋwiye. Tì yaʼ ikyèʼi, kyeri inug ne chè bə̀ nyìmbi ìwa nyɔd.

⁷ Bəd ne gwḛ ya gwḛ izimi. Bəd ne no be ya bə̀ no be izimi.

⁸ Àsi mba ne ghìyə̀ inug ne koʼi, tì ya nyìmbe ìwa nyɔd, zì fìŋ igun Kristo bə̀ ya kɔ̀ŋɔ̀ ìmba məfi fɔrɔ ìta njàbi. Tì mə̀ ya ghìyə̀ ane, ze biri yaʼ ina icheg atə̰-igo ne sogyì we zìyè ni kəndi ìwi igo. Tì bə nɔ̀ŋì ikɔndi ni ghɔ̀m icheg ne Anɔŋisəg biri chì awa inga ngəʼ. Tì mə nɔ̀ŋì ikɔndi ane, ze biri yaʼ ina icheg aghi atog atə̰ ne sogyì we zìyè ni kəndi àzi atog.

⁹ Chəyi Ŋwiye ya chɔʼi awa ni zì ngəʼ igun ina. Wì ya chɔʼ awa yaʼ ni chì awa inga ngəʼ anjìm Anɔŋisəg Yeso Kristo.

¹⁰ À ya məd ne ya ku igun ìmba itog ni ghì gha, kə̀ tì yaʼ izɔm kə̀ tì ku, anyumə̀ ne wì yèʼe, tì biri ywiri yaʼi izɔm tì məd.

¹¹ Ane, mbə̀ nəri fìŋ abə ìmbən məfi fɔrɔ ìtən njàbi ghì gha ibḛfiŋ wə̀d imɔʼ imɔʼ təm kà. Mbə̀ che imbìghè ni nəri wə̀d imɔʼ imɔʼ kwàʼ icheg ne mbə̰ mbe ghìyə̀ amad anìŋ.

Tikə ne si nwìyḛ̀

¹² Ìmba məfi fɔrɔ ìta njàbi, tì we bòʼo ibo inən gha, mbə̀ ya ghùmnə itog bəd mbe ne taŋ fàʼà ni kyèʼì awən bə̀ chwìte icheg ne mbə̀ kòʼi ni chughi icheg bəd Kristo.

¹³ Mbə̀ taŋ ghùmni awɔb bə̀ chwi inɔb gha mbə̰ kɔ̀ŋ awɔb imbə̀ʼ àfàʼì ze ne mbɔb mbe fàʼà inən. Mbə̀ chughi ane àbɔrɔ̀bɔd tì mə̀mbin.

¹⁴ Ìmba məfi fɔrɔ ìta njàbi, tì we bòʼo ibo inən gha mbə̀ pati məgwed. Mbə̀ bə nəri fìŋ abə bəd ne màmà, bə̀ wètì bəd mbe ne koʼi gha mbe wete awɔb. Mbə̀ ya bə̀ nyìmbe fìŋ tì wə̀d ijìm.

¹⁵ Mbə̀ kirə ika gha, imbə̀ʼ wə̀d ywìtì yi anug tibɔ̀ŋ igun anug tibɔ̀ŋ. Mbə̀ ya bèrè yaʼ fìŋ chɔm igun wə̀d imɔʼ imɔʼ inga ìwən ifeti fɔrɔ igun bəd ndəŋ məjìm.

¹⁶ Mbə̀ chughi ane igyendi mà nyumə̀ ijìm.

¹⁷ Mbə̀ ya chàʼrà Ŋwiye mà nyumə̀ ijìm.

¹⁸ Mbə̀ ya nàʼà məyakà abə Ŋwiye ane inug ijìm mà nyumə̀ ijìm. Aŋa ya anug ne Ŋwiye kə̀bi inən icheg ne mbə̀ yaʼi ane ifɔti tì Yeso Kristo.

¹⁹ Imbə̀ʼ mbə̰ si kə̰ awən àfàʼì ze ne Azwighi Ŋwiye ze fàʼà inga inən.

²⁰ Imbə̀ʼ mbə̰ si wèghe awən tikən Ŋwiye te ne bəd mbe ghà.

²¹ Mbə̀ kwàʼra tikən te tijìm, si niŋ te ne yaʼi tesiʼ.

²² Mbə̀ sìkə tiku inug tibɔ̀ŋ ijìm.

²³ Məd Ŋwiye we ne ghìyə̀ bəd chùghə ane àbɔrɔ̀bɔd, wì ghiyə mbə̀ zen mànì. Ŋwiye ghiyə gha àzən azwighi tì ìtən fìŋ fɔrɔ ìtən nyàmnyɔd ya ghìyə̀ inug ne koʼi. Ane, chəyi anug tibɔ̀ŋ mɔ̀ʼɔ ne tì wə̀d mɔ̀ʼɔ ghà imbə̀ʼ awən anyumə̀ ne Anɔŋisəg Yeso Kristo biri ywiri yeʼe.

²⁴ Məd we ne kàri awən ya ghìyə̀ inug mbe ne wì ya kàʼi. Wì biri ghì inug mbo̰.

²⁵ Ìmba məfi fɔrɔ ìta njàbi, mbə̀ ya chàʼrà Ŋwiye ina.

²⁶ Mbə̀ chaʼra ìmba məfi məjìm fɔrɔ ìta njabi tijìm ne tì yaʼi ane ifɔti tì Kristo kwàʼ icheg chɔm. Mbə̀ chaʼra ane chwi àkɔ̀ŋì ze ne yaʼi inga bəd Kristo.

²⁷ Mə ghà inən ane ikum Anɔŋisəg gha, mbə̀ ghiyə wə̀d mɔ̀ʼɔ abɔ̀ʼ inən, wì fɔŋ àŋwàʼrì azo̰ abə bəd Kristo məjìm.

²⁸ Ìwa Anɔŋisəg Yeso Kristo ghiyə ìchɔ̀mì inən.