1 Tèsàlonikà 3 - Ikan feg

¹ Icheg ne chəyi tì tì ya ywìrì nyìʼ ni chughi witì zə̰ awən, tì ya kɔndi gha ze bɔ̀ŋ ina ni chughi awa a Atèns mba mba.

² Ane, Tì ya chà Timotì ne yaʼi ìwa ifi bə̀ yaʼ wə̀d àfàʼì Ŋwiye ne bə̀ fàʼà icheg ina ni chètì ikən chɔm imbə̀ʼ Kristo, gha wì yeʼe nə̀ri awən, ghì ìwən ibḛfiŋ we təm kà.

³ Tì ya chà aməd gha wì yeʼe nə̀ri awən imbə̀ʼ ìwən ibḛfiŋ nɔ̀ʼ bɔd icheg ne mbe chɔʼɔ ìmbən ibɔʼì ighog. Mbə̰ kyèri àzən aghi gha mbi mənyìʼ chɔʼ ìmba ibɔʼì ighog.

⁴ Mbə̰ kyèri àzən aghi gha, anyumə̀ ne tì ya yaʼi abɔ̀ʼ inən, tì ya fə ghà inən gha mbi biri chɔʼ ìmba ibɔʼì ighog. Anug azo̰ fə dù məyi icheg ne tì ya bə ghà inən.

⁵ À ya aton ne mə̀ ya cha Timotì gha wì yeʼe nwendi icheg ne ìwən ibḛfiŋ igun Yeso yaʼi. Chəyi tì mə ya ywìrì nyìʼ. Mə yaya bɔ gha imbə̀ʼ wə̀d we ne kwàʼrà bəd nɔ̀ʼ kwàʼrì awən ghì àza àfàʼì inən ze chè ako.

Timotì bə̀ndì tì ikən chɔm

⁶ Timotì chere pè abɔ̀ʼ ina icheg ne wì nɔ̀ʼi abɔ̀ʼ inən. Wè ghà inug chɔm ina imbə̀ʼ ìwən ibḛfiŋ fɔrɔ icheg ne mbə̰ mbe kɔ̀ŋɔ̀ ìmbən məfi fɔrɔ ìtən njàbi. Wì bə̀ mə̀tì icheg ne mbə̰ mbe kɔ̀ndɔ awa bə̀ wènde ìmba inug chɔm. Wè mə̀ti icheg ne mbə̰ mbe kə̀bə̀ ni bàd awa icheg ne mba mbe bə̀ kə̀bə̀ ni bàd awən.

⁷ Ane, ìmba məfi, ìwən ibḛfiŋ we nə̀rə ìta fìŋ inga nyùmə̀ ijìm ne mbe chɔ̀ʼɔ ìmba ibɔʼì aghog fɔrɔ inga nyùmə̀ ijìm ne te zə̰ ngəʼ.

⁸ Amad anìŋ ne tì kyeri gha ìwən ibḛfiŋ igun Anɔŋisəg we təm kà, ìta fìŋ fə zùtì.

⁹ Tì we nàʼà məyakà abə Ŋwiye imbə̀ʼ awən. Chəyi tì tì təm imbìghè abə Ŋwiye nàʼ məyakà ne koʼi imbə̀ʼ icheg ne tì we taŋ gyènde imbə̀ʼ awən.

¹⁰ Tì we chàʼrà Ŋwiye mà nyumə̀ ijìm, tisi fɔrɔ tizimi ane ìza fìŋ ijìm gha wì naʼa apan ina ni ywiri bàd awən imbə̀ʼ ghì mbə̀ kyeri inug mbe ne chəyi mbə kiri kyeri icheg ne mbə̀ zi ìwən ibḛfiŋ igun Yeso Kristo.

¹¹ Ŋwiye zìye ne yaʼi ìwa Mbaʼ tì Anɔŋisəg Yeso, mbe ghiyə inɔnjì fiʼe tì yeʼe bàd awən.

¹² Anɔŋisəg Yeso ghiyə àkɔ̀ŋì ze ne mbə̰ mbe chwiye abə ìmbən məfi bə̀ fɔrɔ abə bəd məjìm ze sweg gwètè icheg ne àza àkɔ̀ŋì inən bə̀ sweg gwètè.

¹³ Anɔŋisəg Yeso ghiyə ìwən ibḛfiŋ təm kà bə̀ ghì mbə̀ zen mànì imbìghè abə Ŋwiye ne yaʼi ìwa Mbaʼ. Wì ghiyə gha imbə̀ʼ wə̀d mɔ̀ʼɔ bere yi anug tibɔ̀ŋ mɔ̀ʼɔ ni gha imbə̀ʼ awən anyumə̀ ne məd biri yeʼe tì ìmbi bəd ìzḛzḛ.