1 Pità 4 - Ikan feg

Icheg ne bəd Ŋwiye beri ni chughi

¹ Icheg ne Kristo ya zə̰ ngəʼ, à ya bə̀ icheg ne mbə̀ koʼi ni chùʼri ìwən nyɔd ni bèrì ikuchèg we ne məd ya bèri. Aton ya gha wə̀d we ne fə zə̰ ngəʼ inga nyàmnyɔd chəyi wì ya ywìrè ghìyə̀ inug tibɔ̀ŋ.

² Ane, mbə̰ kòʼ ni se ghìyə̀ inug mbe ne Ŋwiye we kə̀bə̀ ane nyumə̀ gho̰ ne mbə̀ kiri yaʼi igun isəg. Kayi ni ya ywìrè ghìyə̀ inug tìbɔŋ mbe ne nyàmnyɔd ze ghə̀ʼrə̀.

³ Mbə̰ ya fə chìkì nyumə̀ ni ya ghìyə̀ inug mbe ne bəd ne chəyi mbi kyeri Ŋwiye mbe ghìyə̀. Mbə̰ yaya nɔ̀kɔ̀ mə̀yi kə̀ mbaŋà abu abu, ghə̀ʼrə̀ ighi, no be, ghìyə̀ izṵ inug, jə̀grə inug, bə̀ ghùmnə mə̀ŋwiye ne chəyi mə̀nɔ̀ʼɔ̀ Ŋwiye bḛ.

⁴ À ya imbə̀ʼ inug mbo̰ ne bəd mbe ne chəyi mbi kyeri Ŋwiye mbe kɔ̀ndɔ ze se chè awɔb gha nji mbə̰ fɔ̀ti abɔ̀ʼ inɔb ni ghì inug tìbɔŋ. À ya aton ze ne mbɔb mbe se zɔ̀mbɔ̀ awən.

⁵ Ane, mbi biri ghum mə̀tì aton ane ìtɔb tìghinùg tijìm abə Ŋwiye. À ya Ŋwiye biri saʼ bəd məjìm mbe ne yaʼi izɔm fɔrɔ bəd mbe ne ya fə ku.

⁶ À ya aton ne Kristo ya chèti ikən chɔm abə bəd məjìm fɔrɔ abə bəd mbe ne ya fə ku. Wì ya ghì ane ni gha Ŋwiye bə saʼ awɔb icheg ne we sàʼa bəd məjìm imbə̀ʼ inug mbe ne mbi faʼi igun isəg. Ka mbɔb fə jiʼì ku icheg ne bəd mbe kùyə, mbɔb biri ghum yaʼ izɔm icheg Ŋwiye.

Ikuchèg bəd Kristo

⁷ Nyùmə̀ fə tinde ne inug ijìm biri nwḭ̀yḛ̀. Ane, mbə̀ ghiyə ìtən tikɔndi te zen bə̀ ya nyìmbe nyɔd imbə̀ʼ kyeri icheg ni chàʼra Ŋwiye.

⁸ Anug kyen ne chè inug ijìm ya gha, mbə̀ ya taŋ kɔ̀ŋɔ̀ wə̀d imɔʼ imɔʼ. Àkɔ̀ŋì ya kùbrə inug tibɔ̀ŋ nɔʼ nɔʼ.

⁹ Mbə̀ niŋ bəd inga ìmbən ichan ane fìŋ ifibì.

¹⁰ Wə̀d imɔʼ imɔʼ ya wètè mə̀mbin ane ineʼi we ne Ŋwiye ghì ìchɔ̀mì ibo, nàʼ ibo. Wì ya ghìyə̀ ane abə bəd ane ikuchèg ijìm, ane fìŋ ifibì.

¹¹ Wə̀d mɔ̀ʼɔ mə̀ ya ghàmà Ìngam Ŋwiye, wì ya ghà məyi anug ze ne Ŋwiye gha ibo. Wə̀d imɔʼ imɔʼ ya fàʼà abə mə̀mbin icheg ne Ŋwiye we nàʼà ika ibo. Tì mə ghì ane, bəd biri ya ghùmnə Ŋwiye ane inug ijìm anjìm Yeso Kristo. Ighumni ijìm fɔrɔ ka ijìm yaʼ abə Ŋwiye kwàʼ ane ighə̀m imɔʼ. À ya ane.

Wə̀d Kristo bèrì ni zən ngəʼ

¹² Ìmbum məfi fɔrɔ ìtum njàbi ne mə̀ taŋ kɔ̀ŋ, imbə̀ʼ anug si che yi awən gha mbə̰ mbe chè inga ngəʼ ka ka. Ngəʼ ka ka ìto̰ ya ni zweʼri ìwən ibḛfiŋ. Imbə̀ʼ mbə̰ bə kɔndɔ awən gha à ya kwàʼ tìsɔ̀ʼ anug mɔ̀ʼɔ ne dùwə̀ igun inən.

¹³ Mbə̀ ya gyènde gha mbə̰ mbe bə̀ zə̰ ngəʼ icheg ne Kristo ya zə̰ ngəʼ. Ane, anyumə̀ ne Kristo ywirì yèʼe inga ìwi ighumni, igyendi biri sweg inga ìtən fìŋ.

¹⁴ Bəd mə̀ ya zɔ̀mbɔ̀ awən imbə̀ʼ anug Kristo, mbə̀ kyeri gha Ŋwiye biri zì àbɔrɔ̀bɔd igun inən. Àze ya chwìye gha Azwighi ìzḛzḛ ze ne Ŋwiye we nàʼà ze igun inən.

¹⁵ Wə̀d mɔ̀ʼɔ abɔ̀ʼ inən mə̀ ya zə̰ ngəʼ imbə̀ʼ ze yaʼ yi gha à ya imbə̀ʼ icheg ne wì zwèti wə̀d, kə̀ wì ji kə̀ imbə̀ʼ ikuchèg tìbɔŋ ndəŋ mɔ̀ʼɔ kə̀ imbə̀ʼ icheg ne wì zi ìwi ichug inga inug bəd.

¹⁶ Ane, mbə̰ mə̀ ya zə̰ ngəʼ imbə̀ʼ icheg ne mbə̀ yaʼi bəd Kristo, imbə̀ʼ tìnìrètog ghiyə yi awən ka. Mbə̀ ya ghùmnə Ŋwiye gha mbə̰ mbe zə̰ ngəʼ imbə̀ʼ anug Kristo.

¹⁷ Nyùmə̀ kòʼ ne Ŋwiye biri ko ni saʼ bəd. Wì biri ko ni saʼ bəd igun bəd ne yaʼi inga inəbi bəd Ŋwiye. Ŋwiye kə mə ko ni saʼ bəd igun ina, mbə̀ si kɔ̀ndi gha ìnwḭ bəd mbe ne chəyi mbe zùgrə ikən chɔm ne Ŋwiye gha kə ghùm si yaʼ iye?

¹⁸ A ze inga Àŋwàʼrì Ŋwiye gha, “Ze mə̀ ya kà abə bəd mbe ne təmi kòʼ ni dù inga ngəʼ, ze kə ghum si yaʼ iye tì bəd mbe ne ghìyə̀ inug tìbɔŋ tì bəd ne chəyi mbɔb mbe ghùmnə Ŋwiye?”

¹⁹ Ane, bəd mbe ne zə̰ ngəʼ icheg ne Ŋwiye kə̀bi, mbɔb che imbìghè ni ghì inug ne koʼi. Mbɔb naʼa ìwɔb ìtḛ̀ abə Ŋwiye we ne tangi awɔb. Məd we fàʼà inug ijìm ne wì kàʼi.