1 Pità 2 - Ikan feg

¹ Mbə̀ waʼ inug tìbɔŋ ijìm, bə̀ waʼ anug ni tambi bəd. Mbə̀ bə waʼ anug ni fùbrì inug, bə̀ waʼ anug ni ghì àdeg fɔrɔ anug ni chìkì tikum bəd.

² Mbə̀ niŋ ìwən nyɔd icheg bɔn bɔd ne kiri nyɔŋɔ ibən. Mbə̀ kəbə yaʼ ibən zḛ zḛ we ne Azwighi Ŋwiye ze nàʼà. Mbə̰ mə̀ nyɔŋ ibən we, mbə biri təm kà icheg ne Ŋwiye fə pumni awən.

³ Mbə̀ ghiyə ane imbə̀ʼ icheg ne mbə̰ fə zweʼri bə̀ kyèri gha Anɔŋisəg bɔ̀ŋ.

Iteg we ne yaʼi izɔm tì bəd mbe ne Ŋwiye chɔ̀ʼi

⁴ Mbə̀ yèʼe abɔ̀ʼ məd, məd we ne yaʼi iteg we ne yaʼi izɔm. Bəd ya to̰ awɔb məd, si ya gha, Ŋwiye ya chɔʼ aməd. À ya iteg ne taŋ bɔ̀ŋ imbìghè abə Ŋwiye.

⁵ Mbə̰ ya kwàʼ icheg ateg ne yaʼi izɔm ne Azwighi Ŋwiye niŋ awən bɔm Mbàn Ŋwiye. Àze ghì mbə̰ si yaʼ bəd mbàn Ŋwiye ìzḛzḛ ne se chè anjìm Yeso Kristo nàʼà ighi àfàtì abə Ŋwiye icheg ne Azwighi Ŋwiye ze chwìye inɔnjì inən.

⁶ A ze inga Àŋwàʼrì Ŋwiye gha, “Mbə̀ nḛ! Mə we zèghè iteg a Zayɔ̀n. À ya iteg ibug nəb ne taŋ bɔ̀ŋ ne mə̀ ya chɔʼi nɔ̀ŋì. Wə̀d ne nɔŋi ibḛfiŋ igun məd chəyi wì biri nɔʼ bèrì tìnìrètug.”

⁷ Inən mbə̰ mbe ne nɔŋi ibḛfiŋ igun məd, iteg we taŋ bɔ̀ŋ. Àsi abə bəd mbe ne chəyi mbi nɔŋi ibḛfiŋ igun məd, “Iteg we ne bəd ne kɔ̀rɔ nəb ya to̰ awɔb, wi fə bə̀ŋə̀ ane iteg ibug nəb.”

⁸ A ze bə̀ inga Àŋwàʼrì Ŋwiye gha, “Iteg gho̰ ya we ne biri ghì bəd tə̀ngə̀. À ya bə̀ igho ne biri ghì bəd gùg.” Mbɔb biri gùg imbə̀ʼ icheg ne chəyi mbɔb bḛ ìngam we. À ya icheg ne Ŋwiye ya fə nɔ̀ŋì gha ze biri yaʼ.

⁹ Àsi awən, mbə̰ ya inəbi ne Ŋwiye chɔ̀ʼi. Mbə̰ ya bəd Mbàn Ŋwiye ne fàʼà abə Ŋwiye, ìwən ifɔn. Mbə̰ ya aben bəd ne zḛ. Mbə̰ ya kwàʼ bəd Ŋwiye. Wì chɔʼ awən gha mbə̀ chete inug yeti yeti ne wì fə ghi. À ya Məd ya chɔʼi awən chì inga isəg afub si zì inga ìzḛzḛ chɔm chɔm məd.

¹⁰ À ya yaʼ anyumə̀ mɔ̀ʼɔ, chəyi mbə̀ ya yaʼi bəd Ŋwiye. Àsi amad anìŋ, mbə̰ ya si bəd Ŋwiye. À ya yaʼ anyumə̀ mɔ̀ʼɔ, chəyi Ŋwiye ya kiri digri igun inən. Àsi amad anìŋ, wì fə dìgrì igun inən.

Mbə̀ chughi icheg ne bəd àfàʼì Ŋwiye koʼi ni chughi

¹¹ Ìmbum məfi fɔrɔ ìtum njàbi ne mə̀ taŋ kɔ̀ŋ, mbə̰ ya bəd tìsɔ̀ʼ inga isəg gho̰ ne bə yaʼ mə̀nɔʼɔ. Ane, mə we bòʼo ibo inən gha mbə̀ chìye ìfən ifeg ane inug tibɔ̀ŋ mbe ne nyàmnyɔd ze ghə̀ʼrə̀. À ya inug tibɔ̀ŋ mbe ya màʼà ibid inən inga fìŋ.

¹² Mbə̀ bere ikuchèg chɔm inga bəd mbe ne kayi mə̀Ju. Ane, anyumə̀ ne bəd gha mbə̰ mbe ghìyə̀ inug tibɔ̀ŋ, mbi biri bàd ìwən ikuchèg chɔm, si ghùmni Ŋwiye ane aneg ze ne wì biri ywiri yeʼe.

Anug ni zugri itog bəd

¹³ Icheg ne mbə̀ bḛ Anɔŋisəg, mbə̀ zugri itog bəd ijìm mbe ne mbi nɔŋi igun inən gha mbe ya tùmbə̀ awən: Kə̀ àkə ifɔn kyen we ne yaʼi atog abə məfɔn mbin,

¹⁴ kə̀ mə̀gɔbnà mbe ne ifɔn kyen we chɔʼi chà gha mbe ya chə bəd mbe ne ghìyə̀ inug tibɔ̀ŋ. Mbə̀ bə ghùmni bəd mbe ne ghìyə̀ inug chɔm.

¹⁵ Ŋwiye kə̀b gha mbə̀ ya ghìyə̀ inug ne koʼi imbə̀ʼ kubri tichug abə bəd mbe ne ghàmà inug ne chəyi mbi kyeri. Bəd mbo̰ ya bəd ne chəyi mbi beri iwe.

¹⁶ Mbə̀ chughi icheg bəd ne yaʼi awɔb ane ìwɔb ighəm ne kayi ìbòʼì. Si ya gha, imbə̀ʼ mbə̰ si niŋ awən icheg ne mbə̰ mbe chùghə ane ìwən ighəm ni ghì inug tibɔ̀ŋ. Mbə̀ chughi icheg ne bəd àfàʼì Ŋwiye beri ni chughi.

¹⁷ Mbə̀ ghumni bəd məjìm bə̀ kɔ̀ŋ ìmbən məfi fɔrɔ ìtən njàbi te ne bḛ Kristo. Mbə̀ bɔ Ŋwiye bə̀ ghùmni ifɔn kyen.

Anug ni zugri mə̀mbaʼ àfàʼì tì anug ni zən ngəʼ icheg Yeso

¹⁸ Mbə̰ mbe ne yaʼi bəd àfàʼì, mbə̀ zugri ìmbən mə̀mbaʼ àfàʼì bə̀ ghùmni awɔb kwàʼ icheg chɔm. Imbə̀ʼ mbə̰ ghumni awən məyi mbe ne beri fìŋ chɔm ne bɔ̀tɔ. Mbə̀ ghumni fɔrɔ mbe ne tɔ ane fìŋ.

¹⁹ Ŋwiye biri zì àbɔrɔ̀bɔd igun wə̀d ne nyìʼè fìŋ, zùghə tibuʼ bə̀ zə̰ ngəʼ ne chəyi wì gùghi anug məyi imbə̀ʼ icheg ne tengàŋ kyeri anug ne Ŋwiye kə̀bi.

²⁰ Ze kə wètè awe iye anyumə̀ ne àghò gùghi anug, mbi chə awe, àghò nyìʼ fìŋ? Mbi mə̀ chə wə̀d ne ghi anug chɔm, wì nyìʼ fìŋ, Ŋwiye biri zì àbɔrɔ̀bɔd igun məd.

²¹ À ya imbə̀ʼ iku ngəʼ gho̰ ne Ŋwiye ya kàri awən gha mbə̀ yaʼ ane ifɔti tì məd. Mbə̀ kyeri gha Yeso Kristo ya bə̀ zə̰ ngəʼ imbə̀ʼ awən. Wì yaya chwìye inug mbo̰ inən icheg aneni ni gha mbə̀ gwe inug kwàʼ igun ibɔʼì ighog məd.

²² Chəyi wì ya gùghi anug. Chəyi wì ya bə ghà anug ako mɔ̀ʼɔ.

²³ Anyumə̀ ne mbi ya zɔ̀mbi məd, chəyi wì ya ywìti. Anyumə̀ ne wì ya zə̰ ngəʼ, chəyi wì ya sìbi wə̀d. Wì ya nɔ̀ŋì fìŋ yaʼ igun Ŋwiye we ne sàʼa bəd ane icheg ne koʼi.

²⁴ Kristo zìye ya bèʼì ìmba inug tibɔ̀ŋ igun ìwi nyɔd anyumə̀ ne wì ya yaʼi igun azed abaʼri. Wì ya niŋ ìmba inug tibɔ̀ŋ ni ghì gha, imbə̀ʼ tì ywiri ghiyə awa inug tibɔ̀ŋ. Tì se ghìyə̀ yaʼ inug ne təmi kòʼ. Ina̰ mbe ne məd ya bèʼi fə ghì ìmbən ighɔn mèg.

²⁵ Mbə̰ ya yaʼ icheg njə̀g te ne ya fèbe. Àsi amad anìŋ, mbə̰ fə ywìrì bə̀ndì ghò abɔ̀ʼ Àjənjə̀g, ne yaʼi Wə̀d we ne kyèʼrè awən.