1 Jɔn 3 - Ikan feg

Bəd Kristo ya Bɔn Ŋwiye

¹ Mbə nḛ ikuchèg ne ìwa Mbaʼ taŋ kɔ̀ŋi awa! Wì taŋ kɔ̀ŋ awa ghì mbi se kàrà awa ane bɔn Ŋwiye. Tesiʼ ya gha, mba ya bə̀ kwàʼ bɔn Ŋwiye. À ya aton ne chəyi bəd inga isəg gho̰ mbe kyère awa. Chəyi mbe kyère awa imbə̀ʼ icheg ne chəyi mbi ya bə kyèri Ŋwiye.

² Ìmbum mə̀sə̀ʼ ne mə̀ taŋ kɔ̀ŋ, amad anìŋ, mba ya bɔn Ŋwiye. Chəyi tì kiri kyeri icheg ne tì biri ghum yaʼ. Si ya gha, tè kyèri gha anyumə̀ ne Yeso yèʼe tì biri yaʼ icheg məd imbə̀ʼ icheg ne tè bàd aməd icheg ne wì yaʼi.

³ Wə̀d ijìm ne nɔŋi ikɔndi igun məd tengàŋ ya ghìyə̀ ìwi ikuchèg wi zḛ bə̀ kwàʼ icheg ne Kristo bə zen.

⁴ Wə̀d ijìm ne ghìyə̀ inug tibɔ̀ŋ ya gùghə̀ mə̀nɔ̀ʼɔ̀, imbəʼ icheg ne, chəyi mə̀nɔ̀ʼɔ̀ bḛ gha bəd ghiyə inug tibɔ̀ŋ.

⁵ Mbə̰ kyèri gha Kristo ya yeʼe ni chì ìmba inug tibɔ̀ŋ. Mbə̰ bə̀ kyèri gha chəyi anug tibɔ̀ŋ mɔ̀ʼɔ yaʼi inga məd.

⁶ Ane, chəyi wə̀d ne chùghə ane ifɔti tì məd ne chè imbìghè ni ghì inug tibɔ̀ŋ. Wə̀d ne chè imbìghè ni ghì inug tibɔ̀ŋ, chəyi tengàŋ kyèri aməd kə̀ kyeri iku wə̀d ne məd yaʼi iwiwən.

⁷ Ìmbum bɔn ne mə̀ taŋ kɔ̀ŋ, imbə̀ʼ mbə̰ saŋa awən gha wə̀d mɔ̀ʼɔ febre awən. Wə̀d ne ghìyə̀ inug ne təmi kòʼ, tengàŋ ya wə̀d ne bə̀ təm kòʼ icheg ne Kristo bə̀ təm kòʼ.

⁸ Wə̀d ne ghìyə̀ inug tibɔ̀ŋ ya wə̀d Debrə̀ imbə̀ʼ icheg ne Debrə̀ ya ko se ghìyə̀ inug tibɔ̀ŋ kwàʼ ane nyumə̀ ne Ŋwiye ya tangi isəg. Aton ne Ŋwan Ŋwiye ya yeʼe inga isəg ya ni chìkì àfàʼì Debrə̀.

⁹ Chəyi wə̀d ne yaʼi ŋwan Ŋwiye biri chè imbìghè ni ghì inug tibɔ̀ŋ imbə̀ʼ icheg ne ikuchèg Ŋwiye fə se inga tengàŋ. Chəyi wì biri chè imbìghè ni ghì inug tibɔ̀ŋ imbə̀ʼ icheg ne Ŋwiye ya se mbaʼ məd.

¹⁰ Icha ane bɔn Ŋwiye tì bɔn Debrə̀ kə iye? Wə̀d ijìm ne chəyi we fàʼà anug ne təmi kòʼ kayi ŋwan Ŋwiye. Wə̀d ne chəyi wì bə kɔ̀ŋ ìwi ifi kayi bə̀ ŋwan Ŋwiye.

Anug ni kɔ̀ŋ mə̀mbin

¹¹ Ikən we ne mbə̀ ya zughi kwàʼ ane nyumə̀ ne mbə̀ ya bḛ Yeso Kristo ya gha; tì ya kɔ̀ŋɔ̀ mə̀mbin.

¹² Imbə̀ʼ mbə̰ yaʼ awən icheg Ken ne ya yaʼi wə̀d ìwi Wə̀d Tibɔ̀ŋ bə̀ zwèti ìwi ifi, Abè. Aton ne wì ya zweti ìwi ifi àkə gha? À ya imbə̀ʼ icheg ne tìghinùg ifi məd ya təm kòʼ imbìghè abə Ŋwiye, ìti məd bə.

¹³ Ìmbum məfi fɔrɔ ìtum njàbi, imbə̀ʼ anug chè yi awən gha bəd inga isəg mbe pàbà awən.

¹⁴ Tè kyèri gha tì fə kɔpɔ dù inga inug mbe ne ghìyə̀ bəd kùyə nìme si yaʼ inga inug mbe ne ghìyə̀ bəd jəghə ìtḛ̀. Tè kyèri ane imbə̀ʼ icheg ne tì we kɔ̀ŋɔ̀ mə̀mbin. Wə̀d ne chəyi wì ya kɔ̀ŋɔ̀ mə̀mbin ya wə̀d ne kiri yaʼi inga inug mbe ne ghìyə̀ bəd kùyə nìme.

¹⁵ Wə̀d ne pàbà wə̀d ya icheg wə̀d ne zwète bəd. Mbə̰ bə̀ kyèri àzən aghi gha chəyi ìtḛ̀ ighə̀m imɔʼ yaʼi inga wə̀d ne zwète bəd.

¹⁶ Tì kə kyère aghi ne àkɔ̀ŋì yaʼi àzewən iye? Yeso Kristo fə chwi àkɔ̀ŋì ze ina icheg ne wì ya nàʼi ìwi ìtḛ̀, ku igun azed abaʼri imbə̀ʼ awa. Ane, tè bə̀ kòʼ ni nàʼ ìwa ìtḛ̀ atog abə bəd ndəŋ.

¹⁷ Wə̀d ne beri ighi ne chəyi wì ya wètè bəd ne chəyi àzɔb, chəyi tì tengàŋ gha zìye kɔ̀ŋ Ŋwiye.

¹⁸ Ìmbum məfi ne mə̀ taŋ kɔ̀ŋ, imbə̀ʼ tì kɔŋɔ awa bəd məyi ane ìngam ichug. Tì ya chwìye gha tè kɔ̀ŋ bəd ane ìta tìghinùg fɔrɔ ane icheg ne te ghà tesiʼ.

¹⁹ Tì kə kyère iye gha tesiʼ we inga ina bə̀ bèrì fìŋ chùghi inyeʼ imbìghè abə Ŋwiye?

²⁰ Tì ya kyère icheg ne ìta fìŋ te sàʼa awa inga. Tè kyèri gha Ŋwiye chè ìta fìŋ, wì bə̀ kyèri inug ijìm.

²¹ Ìmbum mə̀sə̀ʼ ne mə̀ taŋ kɔ̀ŋ, àmə chəyi ìta fìŋ te sàʼa awa inga, tì kyeri gha tì we tì tì təm imbìghè abə Ŋwiye ne chəyi te bìnde.

²² Ŋwiye we nàʼà ighi ijìm mbe ne te kə̀bə̀ ina imbə̀ʼ icheg ne tì we zùgrə mə̀nɔ̀ʼɔ̀ məd bə̀ fàʼà inug ijìm ne bɔŋi ibo.

²³ Ikə ne məd nàʼi ina ya gha: Tì ziye ibḛfiŋ inga Ŋwan məd, Yeso Kristo, bə̀ ya kɔ̀ŋɔ̀ mə̀mbin icheg ne məd gha.

²⁴ Wə̀d ne zùgrə tikə Ŋwiye ya chùghə ane ifɔti tì məd, məd bə̀ chùghə ane ifɔti tì tengàŋ. Tì kə kyère iye gha Ŋwiye we ane ifɔti tì ina? À ya Azwighi məd ze ne wì nàʼi ina ze ghìyə̀ tì kyère.