1 Jɔn 2 - Ikan feg

Kristo ya wə̀d ne wètè awa

¹ Ìmbum bɔn ne mə̀ taŋ kɔ̀ŋ, mə ŋwàʼrì inug mbo̰ inən anìŋ ni ghì gha imbə̀ʼ mbə̰ si nɔ̀ʼ ghì anug tibɔ̀ŋ. Si ya gha, wə̀d mɔ̀ʼɔ mə̀ chè ghì anug tibɔ̀ŋ, tè bèrì wə̀d ne bòʼo ibo abə Mbaʼ atog ina imbə̀ʼ ìmba inug tibɔ̀ŋ. Məd ya Yeso Kristo, wə̀d ne təmi kòʼ.

² Məd ya aghi àfàtì ze ne Ŋwiye che anjìm məd waʼ ìmba inug tibɔ̀ŋ. Chəyi Ŋwiye waʼi məyi ìmba inug tibɔ̀ŋ. Wì bə̀ waʼ inug tibɔ̀ŋ abə wə̀d ijìm igun isəg.

³ Tì mə ya zùgrə tikə Ŋwiye, nji ze biri chwi gha tè kyèri aməd.

⁴ Wə̀d ne gha zìye kyeri Ŋwiye ne chəyi məd we zùgrə tikə Ŋwiye, tengàŋ ya wə̀d inug ako. Chəyi məd we ghìyə̀ inug icheg wə̀d ne kyeri tesiʼ.

⁵ Wə̀d ne zùgrə Ìngam Ŋwiye ya wə̀d ne kɔ̀ŋi Ŋwiye mànì. Anìŋ ya icheg ne tè kyère gha tì we ane ifɔti tì Ŋwiye.

⁶ Wə̀d mɔ̀ʼɔ mə̀ gha zìye we ane anug amɔʼ tì Ŋwiye, məd bèrì ni yèn igun ibɔʼì ighog ìmbi Yeso Kristo.

Ikə feg

⁷ Ìmbum mə̀sə̀ʼ ne mə̀ taŋ kɔ̀ŋ, ikə gho̰ ne mə ŋwàʼrà inən anìŋ ya kayi ikə feg. À ya ikə anun ne mbi ya fə chwiti inən anyumə̀ ne mbə̀ ya bḛ Kristo. À ya ikə anun we ne mbə̀ ya fə zughi.

⁸ Tesiʼ ya gha, ikə gho̰ ne mə ŋwàʼrà inən anìŋ ya kwàʼ ìwi feg. Bəd mbe bàrà tesiʼ we ne yaʼi inga ikə gho̰ ane icheg ne Yeso Kristo yaya ghìyə̀ inug fɔrɔ ane icheg ne mbə̰ mbe bə̀ ghìyə̀ inug. À ya ane imbə̀ʼ icheg ne inug afub mbe se chè mèghè, ìzḛzḛ tesiʼ we fə se zùʼə.

⁹ Wə̀d ne gha zìye fə se yi inga ìzḛzḛ bə̀ kiri ya bà̰ ìwi ifi, à ya wə̀d ne kiri biri inga isəg afub pè amad anìŋ.

¹⁰ Wə̀d ne kɔ̀ŋɔ̀ ìwi ifi ya wə̀d ne chùghə inga ìzḛzḛ. Ane, chəyi aghi mɔ̀ʼɔ inga məd ne biri ghì gha wì gughə anug.

¹¹ Àsi wə̀d ne bà̰ ìwi ifi ya wə̀d ne kiri yaʼi inga afub. Məd we kiri ghiyə inug afub. Chəyi wì kyèri asiŋi ne we ghò angu imbə̀ʼ icheg ne afub ze fə fə̀ghì aghə ibo.

¹² Ìmbum bɔn ne mə̀ taŋ kɔ̀ŋ, mə̀ ya ŋwàʼrà anìŋ inən imbə̀ʼ icheg ne Ŋwiye fə waʼ ìmbən inug tibɔ̀ŋ anjìm Kristo.

¹³ Mə ya ŋwàʼrà anìŋ inən, mbə̰ mə̀mbaʼ imbə̀ʼ icheg ne mbə fə kyeri aməd we ne ya bi yaʼ bɔŋ Ŋwiye ya se tànga isəg. Mə ya ŋwàʼrà anìŋ inən, mbə̰ ngwàʼ bɔd imbə̀ʼ icheg ne mbə fə màʼ chè Wə̀d Tibɔ̀ŋ we.

¹⁴ Mə ya ŋwàʼrà anìŋ inən, ìmbum bɔn ne mə̀ taŋ kɔ̀ŋ imbə̀ʼ icheg ne mbə fə kyeri Mbaʼ. Mə ya ŋwàʼrà anìŋ inən, mbə̰ mə̀mbaʼ imbə̀ʼ icheg ne mbə fə kyeri aməd we ne ya bi yaʼ bɔŋ Ŋwiye ya se tànga isəg. Mə ya ŋwàʼrà anìŋ inən, mbə̰ ngwàʼ bɔd imbə̀ʼ icheg ne mbə bèrì ika. Ìngam Ŋwiye we bə̀ fàʼà inga inən. Mbə fə bə̀ màʼ chè Wə̀d tibɔ̀ŋ.

Anug ni kɔ̀ŋ isəg

¹⁵ Imbə̀ʼ mbə̰ kɔ̀ŋɔ awən isəg kə̀ inug mbe ne yaʼi inga isəg. Wə̀d mɔ̀ʼɔ mə̀ kɔ̀ŋ isəg, ane ya gha, chəyi tengàŋ kɔ̀ŋi Mbaʼ.

¹⁶ Aton ya gha, inug mbe ne yaʼi inga isəg ijìm: anug ni ghì inug tibɔ̀ŋ mbe ne nyàmnyɔd ze kə̀bə̀, anug ni nḛ̀ ighi ghə̀ʼrì, tì anug ne bəd mbe kɔ̀mɔ̀ igo imbə̀ʼ ìmbɔb àfàʼì. Inug mbo̰ ijìm nɔ̀ʼ abə isəg kayi abə Mbaʼ.

¹⁷ Isəg ijìm fɔrɔ ighi ijìm mbe ne bəd inga isəg kɔŋi ya chè yi che. Àsi wə̀d we ne fàʼà yaʼ anug ne Ŋwiye kə̀bi, tengàŋ biri jəg ìtḛ̀ ighə̀m imɔʼ.

Jɔn pàti bəd imbə̀ʼ Wə̀d ìpàb Kristo

¹⁸ Ìmbum bɔn ne mə̀ taŋ kɔ̀ŋ, nyùmə̀ we ne isəg gho̰ biri nwḭ̀yḛ̀ fə tinde. Mbə̰ ya fə zug gha Wə̀d ìpàb Kristo we yèʼe. Amad anìŋ, bəd ìpàb Kristo nɔʼ nɔʼ fə yeʼe. Àzo̰ fə ghì tì kyèri gha nyùmə̀ we ne isəg gho̰ biri nwḭ̀yḛ̀ fə tinde.

¹⁹ Bəd ìpàb mbo̰ ya yaʼ abɔ̀ʼ ina. Si ya gha, chəyi mbɔb ya yaʼi ane ifɔti tì Kristo icheg ina. Àkə aghi ne mbɔb ya yaʼi ane ifɔti tì Kristo icheg ina, nji chəyi mbɔb ya du. Icheg ne mbɔb du, ze chwi gha chəyi mbɔb ya yaʼi ìmba bəd.

²⁰ Àsi awən, Wə̀d Ìzḛzḛ fə zɔʼ awən icheg ne wì nàʼi Azwighi Ŋwiye inən, mbə̰ məjìm bə̀ kyèri tesiʼ.

²¹ Kayi mə ŋwàʼrà inən imbə̀ʼ icheg ne chəyi mbə̀ kyeri tesiʼ. Mə ya ŋwàʼrà imbə̀ʼ icheg ne mbə̀ kyere tesiʼ fɔrɔ imbə̀ʼ icheg ne mbə̀ kyeri gha chəyi anug ako yaʼi inga tesiʼ.

²² Wə̀d inug ako kə we? À ya wə̀d we ne to̰ yi gha Yeso kayi Wə̀d we ne Ŋwiye zɔ̀ʼi. Wì ya to̰ yi Mbaʼ bə̀ to̰ yi Ŋwan. Iku wə̀d we ya Wə̀d ìpàb Kristo.

²³ Wə̀d we ne to̰ yi Ŋwan, fə bə̀ ton yi Mbaʼ. Wə̀d we ne bḛ Ŋwan, fə bə̀ bḛ Mbaʼ.

²⁴ Àsi awən, inug mbe ne mbə̀ ya zughi anyumə̀ ne mbə̀ ya bḛ Kristo, mbə̀ kirə ika ni nɔ̀ŋì inən inga fìŋ. Mbə̰ mə̀ nɔ̀ŋì inug mbe inən inga fìŋ, mbə biri yaʼ ane ifɔti tì Ŋwan fɔrɔ tì Mbaʼ.

²⁵ Anug ze ne Ŋwan ya kàʼi ni nàʼ ina ya ìtḛ̀ ighə̀m imɔʼ.

²⁶ Mə ya ŋwàʼrà inug mbo̰ inən anìŋ imbə̀ʼ bəd mbe ne kə̀bə̀ ni fèbrì awən.

²⁷ Àsi awən, Azwighi Ŋwiye ze ne Ŋwiye ya nàʼi inən kiri biri inga inən. Chəyi mbə̀ ywirì kòʼ ni gha wə̀d mɔ̀ʼɔ chwiti inug inən. Ane, Azwighi məd ze chwìte inug ijìm inən. Inug mbe ne Azwighi Ŋwiye ze chwìte ya tesiʼ. Ane, mbə̀ chughi ane ifɔti tì Kristo.

²⁸ Ìmbum bɔn ne mə̀ taŋ kɔ̀ŋ, anug ne mə ghà inən amad anìŋ ya gha, mbə̀ che imbìghè ni chughi ane ifɔti tì Kristo. Anyumə̀ ne məd ywirì yèʼe, chəyi tì biri bɔ. Chəyi tì biri bə bèrì tìnìrètog ni təm ibo imbìghè.

²⁹ Mbə̰ mə̀ kyèri gha məd ya wə̀d we ne təmi kòʼ, mbə biri bə kyeri gha wə̀d ne ghìyə̀ inug ne koʼi ya ŋwan Məd.