1 Kɔrèn 9 - Ikan feg

Inug ne bəd koʼi ni ghì abə bədtɔm Kristo tì ighi ne bədtɔm Kristo beri ni fàʼ

¹ Imbə̀ʼ mo we amə ane ìmə ighəm? Mo kə kayi wə̀dtɔm Kristo? Imbə̀ʼ mə fə bàra Yeso, ìwa Anɔŋisəg? Imbə̀ʼ mbə̰ fə bḛ Anɔŋisəg imbə̀ʼ icheg ne mə fàʼà ane ìmə fìŋ ijìm?

² Ka chəyi bəd mɔ̀ʼɔ bḛ gha mo ya wə̀dtɔm Kristo, mə kyèri gha mbə̰ bḛ. Aneni ni chwi gha mo ya wə̀dtɔm Kristo ya icheg ne mbə̀ yaʼi ane ifɔti tì Anɔŋisəg.

³ Bəd mbe bìre gha mə kə yaʼi wə̀dtɔm Kristo iye? Anug ne mə̀ biri biri inɔb ya azo̰:

⁴ Àkə kayi àza ati ni gha mbə̀ naʼa tijəg fɔrɔ mənoʼ ina?

⁵ Àkə kayi àza ati ni bə nam àyi ne nɔŋi ibḛfiŋ igun Yeso Kristo bə̀ ya yḛ̀ tì məd icheg bədtɔm mbin, tì məfi ìmbi Anɔŋisəg fɔrɔ Pità.

⁶ Kə̀ àkə məyi mo tì Bànabàs ne beri ni fàʼ ane ìmba ibo bɔŋ se jə̀ghə?

⁷ Àkə sogyì weg ne fàʼà ne chəyi mbe nàʼà ikab àfàʼì ibo? Wə̀d ne ko̰ ìzi mben vayìn ne chəyi məd we jə̀ghə fitam vayìn ane mben ze àkə we? Kə̀ wə̀d ne kwèrè nyam ne chəyi tì wì nèg ìwi nyɔd igun nyam te àkə we?

⁸ Mə wa kə ghàmà inug mbo̰ inən ane tikɔndi wə̀d-aku? Imbə̀ʼ à ya bə̀ anug ne mə̀nɔ̀ʼɔ̀ Muse gha?

⁹ Mbe ŋwàʼrì inga mə̀nɔ̀ʼɔ̀ Muse gha, “Imbə̀ʼ wə̀d kɔ̀rɔ yi ichug pɔ̀ŋ anyumə̀ ne ze chùʼə kyìkɔ̀ʼ.” Ìngam gho̰ wa kə Ŋwiye ghàmi imbə̀ʼ pɔ̀ŋ?

¹⁰ Imbə̀ʼ à ya imbə̀ʼ awa ne Ŋwiye ghàmi ìngam gho̰? E! À ya imbə̀ʼ awa ne Ŋwiye ghàmi ìngam gho̰. Wə̀d ne nyɔ̀ʼɔ̀ kyì we nyɔ̀ʼɔ̀. Wə̀d ne mòʼò kyì we bə̀ mòʼò. Mbɔb məjìm ya nɔ̀ŋɔ̀ ikɔndi ni jəg ane ighi mbe.

¹¹ Tì mə nyɔ̀ʼ ighi ne Azwighi Ŋwiye nàʼi ina inga ìwən ìtḛ̀, à wa kə anug ne faŋi ako ni gha tì bə fòʼ ighi ane inən?

¹² Bəd ndəŋ mə̀ kə̀ bèrì ati ni biri ighi mbo̰ inən, nji mba bèrì ati ze chè awɔb. Anug ne angu ya gha, chəyi te nḛ̀ igun ighi mbe ne mbə̀ beri ni nàʼ ina. Tè nyìʼ tiku inug ijìm ni ghì gha imbə̀ʼ tì nɔ̀ʼ yaʼ akən ane ikən chɔm imbə̀ʼ Kristo ne tì gha inən.

¹³ Imbə̀ʼ mbə̰ kyeri àzən aghi gha bəd ne fàʼà inga mbàn Ŋwiye ya jə̀ghə inga mbàn Ŋwiye, bəd ne fàʼà igun ikwijə̀ŋ àfàtì ya bə̀ jə̀ghə ane ighi mbe ne mbe nàʼà ane ighi àfàtì?

¹⁴ À ya bə̀ icheg ne Anɔŋisəg fə gha gha, bəd mbe ne chètè ikən chɔm imbə̀ʼ Kristo, mbe jəg ane ikən chɔm we.

¹⁵ Si ya gha, chəyi mə̀ nɔŋi fìŋ igun ighi mbe ne ya àmə ati ni biri. Chəyi mə̀ ŋwàʼri inug mbo̰ tì ikɔndi mɔ̀ʼɔ gha mbə naʼa ighi mɔ̀ʼɔ inum. Sɔ̀mɔ ane mə̀ sami anug ni kɔ̀m igo imbə̀ʼ awən, mə ku. Anug ne mə kɔ̀mɔ̀ igo ya gha, mə chètì ikən chɔm imbə̀ʼ Kristo inən ne chəyi mbə̀ nàʼi aghi mɔ̀ʼɔ inum.

¹⁶ Tesiʼ ya gha, chəyi tì mə kɔ̀m igo imbə̀ʼ icheg ne à ya àfàʼì ne mə mə̀nyiʼ fàʼ. Àmə chəyi mə̀ chètì ikən chɔm imbə̀ʼ Kristo, ngəʼ kyen biri nyi igun inum.

¹⁷ Àmə yaʼ aghi ne mə chètè ikən chɔm imbə̀ʼ Kristo ane ìmə ighəm, nji mə biri kə̀b gha mbə naʼa chùd inum. Àmə yaʼ aghi ne kayi ane ìmə ighəm ne mə chètè ikən chɔm, nji mə ya fàʼà yaʼ anug ne Ŋwiye zi inum ikye ibo.

¹⁸ Ane, àmə chùd kə iye? À ya gha mə chètì ikən chɔm ne chəyi wə̀d nàʼi aghi mɔ̀ʼɔ inum, ne chəyi mə̀ bə nèn igun àmə ati ze ne bəd beri ni nàʼ ighi inum.

¹⁹ Ka mə yaʼ amə ane ìmə ighəm, ne mo kayi àbòʼì abə wə̀d mɔ̀ʼɔ, mə fə niŋ ìmə nyɔd ane àbòʼì abə bəd məjìm ni ghì gha bəd nɔʼ nɔʼ bḛ Kristo.

²⁰ Anyumə̀ ne mə̀ yaʼi inga mə̀Ju, mə̀ ya ghìyə̀ inug icheg wə̀d abɔ̀ʼ inɔb ni ghì gha mə̀Ju bḛ Kristo. Mo kayi wə̀d ne nɔ̀ŋɔ̀ mə̀nɔ̀ʼɔ̀ Muse, si ya gha, anyumə̀ ne mə̀ yaʼi inga bəd ne nɔ̀ŋɔ̀ mə̀nɔ̀ʼɔ̀ Muse, mə̀ ya ghìyə̀ inug icheg wə̀d abɔ̀ʼ inɔb ni ghì gha mbe bḛ Kristo.

²¹ Anyumə̀ ne mə̀ yaʼi tì bəd ne kayi mə̀Ju, ne chəyi mbi kyeri mə̀nɔ̀ʼɔ̀ Muse, mə̀ ya ghìyə̀ inug icheg wə̀d abɔ̀ʼ inɔb ni ghì gha mbe bḛ Kristo. Kayi ni gha chəyi mə zùgrə mə̀nɔ̀ʼɔ̀ Ŋwiye. Mo ya kwàʼ wə̀d ne zùgrə mə̀nɔ̀ʼɔ̀ Kristo. Mə ya zùgrə mə̀nɔ̀ʼɔ̀ Kristo ni ghì gha bəd ne chəyi mbi beri mə̀nɔ̀ʼɔ̀ mbe pum.

²² Anyumə̀ ne mə̀ yaʼi abɔ̀ʼ bəd ne ìwɔb ibḛfiŋ bɔri, mə̀ ya icheg wə̀d abɔ̀ʼ inɔb ni ghì gha mbe bḛ Kristo. Ane, mə fə bə̀ŋə̀ ane iku ighi ijìm abə bəd məjìm, imbə̀ʼ chè ane mənɔnjì nɔʼ nɔʼ ni ghì gha inun bəd mɔ̀ʼɔ pum.

²³ Mə ya ghìyə̀ inug mbo̰ anìŋ məyi ni chètì ikən chɔm we ni ghì gha mo inum biri bə̀ bèrì àbɔrɔ̀bɔd.

²⁴ Mbə̰ kyèri àzən aghi gha, bəd ne nyi inga ànòtì ya nɔ̀ʼɔ, si ya gha, wə̀d ne nìŋə ineʼi wə̀d mbègtog ya məyi imɔʼ. Ane, mbə̀ noto icheg bəd ne biri niŋ ineʼi wə̀d mbègtog.

²⁵ Wə̀d ijìm ne chùʼrə nyɔd ni nòtò ya ghìyə̀ inug icheg ne mə̀nɔ̀ʼɔ̀ ànòtì chwi imbə̀ʼ niŋ ineʼi wə̀d mbègtog. Ineʼi ne mbe nàʼà ibo ya ineʼi ne chəyi we tà̰. Àsi awa, ineʼi ne te nḛ̀ ni niŋ ya ineʼi ne biri yaʼ ane ighə̀m imɔʼ.

²⁶ À ya aton ne chəyi mə̀ nòtò angu angu. Chəyi mə bə̀ zɔ̀ŋɔ̀ icheg wə̀d ne kɔ̀mɔ̀ asiŋi ako.

²⁷ Mə ya nyìmbe ìmə nyɔd, ghìyə̀ gha wi yaʼ àbòʼì inum, imbə̀ʼ mə nɔ̀ʼ ghà ikən chɔm abə bəd ndəŋ si chè sam ineʼi we.