1 Kɔrèn 8 - Ikan feg

Anug imbə̀ʼ tijəg ne mbi jə mə̀ŋwiye

¹ Amad anìŋ, mə kə̀b ni ghàm imbə̀ʼ tijəg te ne mbe jə mə̀ŋwiye. Tè kyèri gha, “Mba məjìm bèrì iwe,” icheg bəd mɔ̀ʼɔ mbe ghà. Inug mbo̰ ne tì kyeri mbe ghìyə̀ bəd mɔ̀ʼɔ se nɔ̀ nyɔd. Àsi àkɔ̀ŋì ya kɔ̀rɔ bəd ane mbi imɔʼ ghìyə̀ bəd chùghə ane ichug imɔʼ.

² Wə̀d ne kɔ̀ndɔ gha zìye kyèri anug, wì kyeri gha chəyi wì kiri kyeri anug ze icheg ne wì kə̀ kòʼi ni kyeri.

³ Ŋwiye kyèri wə̀d ne kɔ̀ŋi aməd.

⁴ Ane, ni ghàm imbə̀ʼ tijəg te ne mbe jə mə̀ŋwiye, tè kyèri gha mə̀ŋwiye ya ati ako. Tè bə̀ kyèri gha chəyi Ŋwiye ndəŋ angu. Ŋwiye ya məyi imɔʼ.

⁵ Ka ighi mbe ne yaʼi ikaŋ àbɔ̀ŋɔ fɔrɔ igun isəg ne mbə̰ mbe kàrà ane mə̀ŋwiye jiʼì yaʼ angu, à ya tesiʼ gha “mə̀ŋwiye” nɔʼ nɔʼ fɔrɔ “mbè Anɔŋisəg” nɔʼ nɔʼ mbe angu.

⁶ Ane, tè kyèri gha Ŋwiye məyi imɔʼ ne yaʼi Mbaʼ we ne ya tangi ighi ijìm. À ya məd we nàʼà ìtḛ̀ ina. Anɔŋisəg ya bə̀ məyi imɔʼ. Məd ya Yeso Kristo we ne Ŋwiye che anjìm məd tàngi ighi ijìm. Məd we bə̀ nàʼà ìtḛ̀ ina.

⁷ Si ya gha, chəyi wə̀d ijìm kyèri anug azo̰. Bəd mɔ̀ʼɔ mbe angu ne ya fə mə̀ri tì anug mə̀ŋwiye. Mbɔb mbe kiri gha anyumə̀ ne mbɔb mbe jə̀ghə tijəg te ne mbi jə mə̀ŋwiye gha, à ya aghi àfàtì abə mə̀ŋwiye. Ane, icheg ne ìtɔb fìŋ te sàʼa awɔb, mbɔb mbe kɔ̀ndɔ gha chəyi mbɔb zḛ.

⁸ Tesiʼ ya gha, kayi tijəg te biri ghì gha tì yaʼ bəd chɔm imbìghè abə Ŋwiye. Chəyi tì biri nim aghi mɔ̀ʼɔ anyumə̀ ne chəyi tì jəghi tijəg te. Chəyi tì biri bə bèrì chùd mɔ̀ʼɔ anyumə̀ ne tì jəghi tijəg te.

⁹ Ane, mbə̀ we awən, imbə̀ʼ mbə̰ nɔ̀ʼ niŋ icheg ne chəyi mbə̰ mbe jə̀ghə aghi mɔ̀ʼɔ, kə̀ niŋ icheg ne mbə̰ mbe jə̀ghə aghi mɔ̀ʼɔ si ghì bəd mbe ne ìwɔb ibḛfiŋ bɔri, mbi gùg anug.

¹⁰ Mbə̰ mbe ne gha mbə̰ bèrì iwe, mbə̀ niŋ gha, wə̀d ne ibḛfiŋ məd bɔri wè bàd awən ne mbə̰ mbe jə̀ghə inga jə mə̀ŋwiye, imbə̀ʼ àze biri ghì gha wì se jə̀ghə ane ighi mbe ne mbe nàʼà abə mə̀ŋwiye?

¹¹ Ane ya gha, ifi we ne ibḛfiŋ məd bɔri, ne Kristo ya ku imbə̀ʼ aməd ya anìŋ kùyə imbə̀ʼ icheg ne mbə̰ mbe kɔ̀ndɔ gha mbə̰ bèrì iwe.

¹² Mbə̰ mə̀ ghì ane, à ya anug tibɔ̀ŋ ne mbə̀ ghi abə ìmbən məfi fɔrɔ ìtən njàbi. Ikuchèg gho̰ ya aghi ne zìyè ana̰ inga ìtɔb fìŋ te ne fə bi bɔd. Mbə̀ kyeri gha mbə̰ fə bə̀ gùg anug abə Kristo.

¹³ Ane, aghi ne mə jə̀ghə mə̀ ya ghìyə̀ gha ìmə ifi gughə anug, chəyi mə̀ biri nɔ̀ʼ jəg aghi ze. Ane ya ni ghì gha, imbə̀ʼ ìmə ifi nɔ̀ʼ chè gùg anug.