1 Kɔrèn 7 - Ikan feg

Anug imbə̀ʼ inami

¹ Amad anìŋ, mə kə̀b ni ghàm imbə̀ʼ inug mbe ne mbə̀ ya ŋwàʼri bìri inum: Ze bɔ̀ŋ gha imbə̀ʼ mbaŋà nama yi.

² Si ya gha, icheg ne mbaŋà nɔʼ nɔʼ te nɔ̀kɔ̀ mə̀yi abu abu, mə̀yi nɔʼ nɔʼ bə̀ nɔ̀kɔ̀ mbaŋà abu abu, ze bɔ̀ŋ gha mbaŋà beri ìwi iweg, àyi bə bèrì ìwi inɔm.

³ Mbaŋà faʼa inug ijìm mbe ne wì beri ni fàʼ abə ìwi iweg. Àyi bə ghì ane abə ìwi inɔm.

⁴ Nyàmnyɔd àyi ya kayi məyi ibo. À ya ibo tì inɔm məd. Nyàmnyɔd mbaŋà ya kayi məyi ibo. À ya ibo tì iweg məd.

⁵ Imbə̀ʼ wə̀d to̰ yi ni nàʼ ìwi nyɔd abə aywin, chè ni gha, mbə̰ məjìm bḛ ni chughi ane ane iki nyumə̀ mɔ̀ʼɔ imbə̀ʼ chàʼra Ŋwiye. Mbə̰ mə̀ mànì ni chàʼra Ŋwiye, mbə ywìrì fɔti ìwən nyɔd ni ghì gha imbə̀ʼ Sàtàn kwàʼra yi awən imbə̀ʼ icheg ne chəyi mbə̀ kyeri nyimbi nyɔd.

⁶ Àzo̰ ya kayi isɔbi anug ne mə nàʼà inən. À ya ikə ne mə nàʼà.

⁷ Wə̀d ijìm kə icheg inum nji ze bɔ̀ŋ. Si ya gha, wə̀d imɔʼ imɔʼ bèrì ìwi ineʼi ne Ŋwiye nàʼi ibo. Wə̀d bèrì ìwi ineʼi, wə̀d ndəŋ bə̀ bèrì iywi.

⁸ Anug ne mə ghà abə bəd mbe ne chəyi mbi nami fɔrɔ məku àyi ya gha, mbɔb chughi awɔb witì nam icheg inum.

⁹ Si ya gha, àmə chəyi mbɔb kyeri nyimbi nyɔd, ze bɔ̀ŋ gha mbe nam awɔb. Ze bɔ̀ŋ ni nam chè ni chughi ane ne ìwɔb nyɔd we nɔ̀mɔ̀ imbə̀ʼ anug ànɔ̀kì.

¹⁰ Anug ne mə ghà abə bəd mbe ne nami ya gha, imbə̀ʼ àyi duwə yi inam ka. Kayi mo we ghà, à ya Anɔŋisəg.

¹¹ Àmə yaʼ ne gha àyi dù inam, imbə̀ʼ məd ywiri nama yi. Wì fə chùghə yi ane, kə̀ məd tì inɔm məd ywìrì mànì àzɔb achɔb chughi inga inam. Imbə̀ʼ mbaŋà to̰ yi ìwi iweg ka.

¹² Àsi abə mə̀mbin, anug ne mə ghà inɔb ya gha, wə̀d Kristo ne beri iweg ne chəyi wì kiri bḛ Kristo, iweg məd we mə̀ kɔ̀ŋ ni chè imbìghè chughi tì məd, imbə̀ʼ wì to̰ yi aməd. Àzo̰ ya àmə ikɔndi. Kayi anug ne nɔ̀ʼi abə Anɔŋisəg.

¹³ Àyi ne bḛ Kristo mə bèrì inɔm ne kayi wə̀d Kristo ne wì kɔ̀ŋi ni chè imbìghè chughi tì məd, imbə̀ʼ àyi we si duwə yi inam.

¹⁴ Ze yaʼ ane imbə̀ʼ icheg ne mbi biri niŋ mbaŋà ze gha wè təm zen anjìm iweg məd we ne kyeri Ŋwiye. Mbi biri bə̀ niŋ iweg məd gha wè təm zen anjìm inɔm məd we ne kyeri Ŋwiye. Àmə chəyi ane, nji chəyi ìmbɔb bɔn biri zen. Tesiʼ ya gha, mbi biri niŋ mbɔb bɔn gha mbe zen.

¹⁵ Àmə yaʼ aghi ne wə̀d ne kayi wə̀d Kristo kɔ̀ŋi ni sàkì inam, ghò yi, mbe saŋa aməd wì gho yi. Ìywin tì wə̀d bèrì apan ni ywiri nam yi. Ŋwiye kɔ̀ŋ gha bəd chughi ane àbɔrɔ̀bɔd.

¹⁶ Àyi, àghò kyeri gha ighəm mɔ̀ʼɔ à ya àghò biri ghum pumni ìwe inɔm. Àghò mbaŋà, bə kyèri gha ighəm mɔ̀ʼɔ à ya àghò biri ghum pumni ìwe iweg.

Wə̀d imɔʼ imɔʼ chughi məyi icheg ne Anɔŋisəg ghi gha wì chughi

¹⁷ Wə̀d imɔʼ imɔʼ chughi məyi icheg ne Anɔŋisəg ghi gha wì chughi. Wì bə chughi məyi kwàʼ icheg ne Ŋwiye ya kàri aməd. Àzo̰ ya ikə ne mə nàʼà abə tifeti bəd Kristo tijìm.

¹⁸ Wə̀d ne mbi fə ŋwed aməd bɔŋ Ŋwiye ya se kàrà aməd, imbə̀ʼ wì kə̀bə̀ yi ni chì ineni ne chwìye gha mbi fə ŋwed aməd. Wə̀d ne chəyi mbi ya ŋweri aməd bɔŋ Ŋwiye ya se kàrà aməd, imbə̀ʼ wì kə̀bə̀ yi anug ni gha mbe ŋwed aməd.

¹⁹ Kə̀ mbe ŋwed wə̀d kə̀ chəyi, àze kayi anug mɔ̀ʼɔ. Anug ne koʼi ya gha wə̀d ijìm ya nɔ̀ŋɔ̀ tikə Ŋwiye.

²⁰ Wə̀d imɔʼ imɔʼ chughi məyi kwàʼ icheg ne Ŋwiye kàri aməd.

²¹ Wə̀d ne yaʼi àbòʼì bɔŋ Ŋwiye ya se kàrà aməd, imbə̀ʼ wì niŋ yi àze ane anug mɔ̀ʼɔ. Si ya gha, wì mə bèrì apan ni dù ane anug àbòʼì, wì du.

²² Wə̀d ne yaʼi àbòʼì ane nyùmə̀ ne Anɔŋisəg ya kàri aməd, wì fə se yi ane ìwi ighəm icheg ne wì yaʼ ane ifɔti tì Anɔŋisəg. À ya bə̀ ane ne, wə̀d we ne yaʼi yi ane ìwi ighəm anyumə̀ ne Anɔŋisəg ya kàri aməd, wì fə se àbòʼì abə Kristo.

²³ Ŋwiye ya fə zon awən ane àka inun. Ane, imbə̀ʼ mbə̰ si nyi awən ane anug àbòʼì abə wə̀d-aku.

²⁴ Ìmbum məfi fɔrɔ ìtum njàbi, wə̀d imɔʼ imɔʼ chughi məyi icheg ne Ŋwiye ya kàri aməd.

Inug imbə̀ʼ mə̀yi ne chəyi mbi nami tì məku àyi

²⁵ Amad anìŋ, mə kə̀b ni ghàm imbə̀ʼ bɔn àyi mbe ne chəyi mbi kiri nami. Chəyi Anɔŋisəg nàʼ ikə mɔ̀ʼɔ inum gha mə gha inən imbə̀ʼ awɔb. Si ya gha, mə biri nàʼ yaʼ àmə ikɔndi icheg wə̀d ne Anɔŋisəg dìgri igun inum ghì mə yaʼ wə̀d ne tì mə ghà anug mbə bḛ.

²⁶ Mə mə̀ nèn ngəʼ ze ne yaʼi inga isəg amad anìŋ, anug ne mə̀ kɔndi gha ze bɔ̀ŋ ya gha, wə̀d chughi yi icheg ne wì yaʼi.

²⁷ Imbə̀ʼ wə̀d ne fə nami kə̀bə̀ yi ni sàkì inam tì ìwi iweg. Imbə̀ʼ wə̀d ne chəyi wì kiri nami bə̀ kə̀bə̀ yi ni nam.

²⁸ Wə̀d mə nam, chəyi wì gughi anug. Ŋwan àyi ne chəyi wì kiri kyeri mbaŋà mə nam, chəyi wì bə gùg anug. Àsi bəd mbe ne nami, mbi biri chè inga ngəʼ nɔʼ nɔʼ te ne yaʼi inga isəg. Mə ya ghàmà anìŋ inən ni gha imbə̀ʼ mbə̰ nɔ̀ʼ nyi inga ngəʼ.

²⁹ Ìmbum məfi fɔrɔ ìtum njàbi, anug ne mə ghà inən ya gha, nyùmə̀ ne isəg gho̰ biri nwḭ̀yḛ̀ fə tinde. Ni ko amad anìŋ, mbaŋà te ne beri mə̀yi te chughi icheg bəd ne chəyi mbi nami.

³⁰ Bəd ne sɔ̀mnɔ̀ mbe yaʼ icheg bəd ne chəyi mbe sɔ̀mnɔ̀. Bəd ne gyènde mbe yaʼ icheg bəd ne chəyi mbe gyènde. Bəd ne zo̰ ighi mbe yaʼ icheg bəd ne ighi mbe kayi ìmbɔb.

³¹ Bəd ne fàʼà tì ighi igun isəg mbe yaʼ icheg bəd ne chəyi ighi mbe beri aton mɔ̀ʼɔ inɔb. Aton ya gha, isəg gho̰ ne yaʼi anìŋ ya chè yi che.

³² Chəyi mə̀ kə̀bi gha mbə̀ nwiʼe nyɔd. Mbaŋà ze ne chəyi zì nami, zì ya zìyè atog ni fàʼ abə Anɔŋisəg ni gha Anɔŋisəg ya gyènde.

³³ Àsi mbaŋà ze ne nami, zì ya zìyè atog ane ighi igun isəg ni gha ìwi iweg ya gyènde.

³⁴ Ane, ikɔndi məd biri ya sàʼa inug ibe. Àyi ne chəyi wì nami kə̀ ŋwan àyi ne chəyi wì kyeri mbaŋà, wì ya zìyè atog ni fàʼ abə Anɔŋisəg. Ikɔndi məd ijìm ya ni nàʼ ìzi fìŋ ijìm fɔrɔ ìzi nyàmnyɔd ijìm abə Anɔŋisəg. Àsi àyi ne nami, wì ya zìyè atog igun ighi mbe igun isəg gha inɔm məd ya gyènde.

³⁵ Mə ya ghàmà anìŋ ni wètì awən, kayi mə sɔ̀bi sɔbi. À ya ni ghì gha mbə̀ chughi ane icheg ne koʼi bə̀ nɔ̀ŋì fìŋ ijìm igun Anɔŋisəg.

³⁶ Mbaŋà ne chəyi ze ghìyə̀ inug ane icheg ne koʼi tì ŋwan àyi ne wì tàŋi inam imbə̀ʼ icheg ne chəyi mbaŋà ze kyèri nyìmbi ìwi nyɔd, wì chè imbìghè fə nam. Chəyi wì gughi anug. Mbe nam awɔb.

³⁷ Mbaŋà ne nɔŋi inga ìzi fìŋ gha chəyi ziye biri nam ŋwan àyi ne wì ya taŋi inam tì ìwiwən, ne kayi mbi nyəŋi məd, ne bə kyèri icheg ni nyimbi ìwi nyɔd, ne fə bə chuʼri ìzi fìŋ gha chəyi ziye biri nam, wè ghiyə anug ne koʼi.

³⁸ Ane, mbaŋà ze ne nam àyi ne wì ya taŋi inam, wè ghì anug ne bɔŋi. Àsi mbaŋà ze ne chəyi zì nami ŋwan àyi we, wè ghì anug ne bɔ̀ŋi chè.

³⁹ Àyi bèrì ni chughi tì ìwi inɔm anyumə̀ ne inɔm məd kiri biri izɔm. Məd we tì wì nam mbaŋà ndəŋ ne məd kɔ̀ŋi anyumə̀ ne inɔm məd fə ku. Si ya gha, mbaŋà ze mənyìʼ yaʼ wə̀d Kristo.

⁴⁰ Ane àmə ikɔndi, àyi we mə̀ chùghi yi ane, wì biri ya taŋ gyènde chè icheg ne nji wì kə̀ ywìrì nam. Mə kɔ̀ndi gha, à ya Azwighi Ŋwiye ze ne bə yaʼ inga inum ze ghi mə ghàm inug mbo̰.