1 Kɔrèn 6 - Ikan feg

Anug ne bəd Kristo mbe nìŋə mə̀mbin ghò a nəb isaʼi

¹ Anyumə̀ ne wə̀d Kristo beri anug tì wə̀d Kristo ndəŋ, wì ya nìŋə ghò abə bəd ne chəyi mbe ghùmnə Ŋwiye gha mbe saʼ awɔb. Aton àkə gha? Imbə̀ʼ nji wì ya nìŋə ghò yaʼ abə bəd Kristo gha mbe saʼ anug ze?

² Chəyi mbə̀ kyeri gha à ya bəd Kristo biri saʼ tisaʼi bəd inga isəg? Ane, icheg ne mbə̀ biri ghum saʼ bəd inga isəg, àkə chəyi tì mbə̰ saʼ tisaʼi kwa kwa ne dùwə̀ inga ìtən tifeti?

³ Chəyi mbə̀ kyeri gha à ya mba biri saʼ mbè angirə̀? Ze kə se chè awa iye ni saʼ inug imbə̀ʼ bəd inga isəg gho̰?

⁴ Anyumə̀ ne mbə̀ beri tisaʼi kwa kwa icheg ìto̰, mbə̰ ya ghò chɔ̀ʼɔ bəd ne kayi bəd Kristo gha mbe saʼ awən. Aton ne mbə̰ mbe ghìyə̀ ane, àkə gha?

⁵ Mə ya ghà anug azo̰ ni gha mbə bere tìnìrètog. Ze kə chwìye gha chəyi wə̀d mɔ̀ʼɔ abɔ̀ʼ inən ne beri iwe ne tì wì saʼ tisaʼi bəd Kristo?

⁶ Mə we bàrà yaʼ icheg ne wə̀d Kristo we nìŋə wə̀d Kristo ndəŋ ghò yaʼ abə bəd ne chəyi mbi bḛ Kristo gha mbe saʼ awɔb.

⁷ Anug ni ya bèrè tisaʼi inga ìwən ifeti fə chwi gha chəyi mbə̰ mbe ghìyə̀ inug icheg bəd Kristo. Mbə fə gùg. Chəyi tì wə̀d gùg anug inən mbə sàŋì? Chəyi tì wə̀d jəg àzən aghi, mbə sàŋì?

⁸ À ya mbə̰ mbə̰ mbe jə̀ghə ìtən nyàmnyɔd bə̀ ghìyə̀ inug ne chəyi mbi kòʼi abə ìmbən məfi fɔrɔ ìtən njàbi inga ifeti bəd Kristo.

⁹ Àkə Chəyi mbə̀ kyeri gha chəyi bəd ne ghìyə̀ inug izəg biri nyi inga anug ìfɔ̀n Ŋwiye? Imbə̀ʼ wə̀d tàmba yi ìwi nyɔd ka! Chəyi bəd ne fànà biri nyi inga anug ìfɔ̀n Ŋwiye, kə̀ bəd ne ghùmnə mə̀ŋwiye, kə̀ mə̀yi nami ne nɔ̀kɔ̀ mbaŋà ndəŋ fɔrɔ mbaŋà ne nami ne nɔ̀kɔ̀ àyi ndəŋ, kə̀ mbaŋà ne chəyi zi nami ne nɔ̀kɔ̀ àyi, kə̀ mbaŋà ne nɔ̀kɔ̀ mbaŋà,

¹⁰ kə̀ məji, kə̀ bəd ne ghə̀ʼrə̀ ighi, kə̀ bəd ne no be, kə̀ bəd ne chìkə̀ tikum bəd, kə̀ bəd ne pàŋà ighi bəd. Chəyi wə̀d ne fàʼà tiku inug ìto̰ biri nyi inga anug ìfɔ̀n Ŋwiye.

¹¹ Bəd mɔ̀ʼɔ abɔ̀ʼ inən yaya ghìyə̀ inug mbo̰. Si ya gha, ika Anɔŋisəg Yeso Kristo fə chè anjìm Azwighi Ŋwiye sò awən bə̀ zèni awən, ghì mbə təm kòʼ imbìghè abə Ŋwiye.

Mbə̀ ghumni Ŋwiye ane ìtən nyàmnyɔd

¹² Wə̀d we tì wì gha, “Mə we tì mə ghì inug ijìm.” A ze yi ane, si ya gha, chəyi tì inug ijìm wètì wə̀d. Mə kyèri gha, “Mə we tì mə ghì inug ijìm.” Si ya gha, kayi inug ijìm ne tì mə ghì biri wètì amə. Mə we tì mə ghì inug ijìm. Si ya gha, chəyi aghi mɔ̀ʼɔ biri ghì mə bə̀ŋə̀ ane àbòʼì.

¹³ Wə̀d ndəŋ we tì wì gha, “Ighijəg mbe ne bəd mbe jə̀ghə ya chè ghò inga fibum imbə̀ʼ icheg ne fibum ya abə ighijəg.” Tesiʼ ne angu ya gha, Ŋwiye biri zì ìnwḭ ane ighi mbo̰ ibe. Chəyi Ŋwiye ya tangi nyàmnyɔd wə̀d gha mbi ŋa fànà. Tì kòʼ ni niŋ ìta nyàmnyɔd fàʼ abə Ŋwiye. À ya Anɔŋisəg we kyèʼrè ìta nyàmnyɔd.

¹⁴ Ŋwiye we ne ya zwemni Anɔŋisəg biri bə zwemni awa ane ìwi ika.

¹⁵ Àkə chəyi mbə̀ kyeri gha ìtən nyàmnyɔd ya isiŋi nyɔd ane nyàmnyɔd Kristo? Tì wə̀d niŋ aba ane nyàmnyɔd Kristo ghò fɔ̀ti tì nyàmnyɔd àkwàrì? Indèʼ ka!

¹⁶ Chəyi mbə̀ kyeri gha wə̀d ne fɔti ìwi nyɔd tì àkwàrì, tengàŋ fə bə̀ŋə̀ si nyàmnyɔd ifibì tì àkwàrì ze? A ze inga Àŋwàʼrì Ŋwiye gha, “Mbɔb mbe məbe biri fɔti si yaʼ nyàmnyɔd imɔʼ.”

¹⁷ Tesiʼ ya gha, wə̀d ne fɔti ìzi nyàmnyɔd tì Anɔŋisəg, tengàŋ fə se ane anug amɔʼ tì Anɔŋisəg. Azwighi tengàŋ tì Azwighi Anɔŋisəg fə se azwighi amɔʼ.

¹⁸ Mbə̀ noro awən ane anug àfànì! Inug tibɔ̀ŋ ndəŋ mbe ne bəd mbe ghìyə̀ ijìm ya kayi igun nyàmnyɔd wə̀d icheg anug àfànì. Wə̀d ne fànà ya ghìyə̀ anug tibɔ̀ŋ kwàʼ igun ìzi nyàmnyɔd.

¹⁹ Chəyi mbə̀ kyeri gha ìtən nyàmnyɔd ya asiŋi ne Azwighi Ŋwiye ze ne Ŋwiye ya nàʼi inən ze chùghə inga? À ya Ŋwiye beri ìtən nyàmnyɔd, kayi mbə̰.

²⁰ Ŋwiye ya zon awən ane àka inun. Ane, mbə̀ se ghùmnə Ŋwiye ane ìtən nyàmnyɔd.