1 Kɔrèn 5 - Ikan feg

Pɔl gaŋ imbə̀ʼ ifanì inug inga ifeti bəd Kristo

¹ Mə zug gha bəd mɔ̀ʼɔ mbe abɔ̀ʼ inən ne ghìyə̀ ifanì inug. Iku àfànì we bə, fɔrɔ bèyi abə bəd ne chəyi mbi kyeri Ŋwiye. Mə fə zug gha wə̀d mɔ̀ʼɔ abɔ̀ʼ inən we nɔ̀kɔ̀ iweg mbaʼ məd.

² Mbə̀ kə che iye se kɔ̀mɔ̀ igo ane anug ne nji mbə̰ mbe sɔ̀mnɔ̀? À ya anug ne nji mbə̰ kə̀ chì iku wə̀d we inən inga fìghàra.

³ Ka chəyi mə̀ yaʼi abɔ̀ʼ inən, mbə kyeri gha àmə azwighi ze abɔ̀ʼ inən. Ane, mə fə sɔb isaʼi igun tengàŋ icheg ni gha mə we abɔ̀ʼ inən.

⁴ Anyumə̀ ne mbə̀ fete aseg ane ikum Anɔŋisəg Yeso Kristo, àmə azwighi ze abɔ̀ʼ inən, ika we ne Anɔŋisəg Yeso nàʼi inən we bə̀ abɔ̀ʼ inən.

⁵ Mbə̀ saŋa mbaŋà ze ikye abo abə Sàtàn, ni gha Sàtàn chikə nyàmnyɔd məd. Àze biri nàʼ apan abə azwighi məd ni pum igun aneg ze ne Anɔŋisəg biri ywiri yeʼe.

⁶ Aghi ze ne mbə̰ mbe kɔ̀mɔ̀ igo igun, mbə kyeri gha chəyi ze bɔŋi. Àkə chəyi mbə̀ kyeri gha iki àfòrì kwa kwa ya nyḭ̀yḛ inga aburi ngə̀ŋ mə̀kara ghìyə̀ ngə̀ŋ ijìm kɔ̀ʼɔ?

⁷ Ikuchèg tibɔ̀ŋ we ya àfòrì anun. Mbə̀ chìye kwàʼ ajìm. Àze biri ghì gha mbə̀ zen mànì. Tesiʼ ya gha, mbə̰ ya bəd ne zḛ mànì icheg aburi ngə̀ŋ feg ne chəyi àfòrì inga. Mbə̰ ya bəd ne zḛ mànì imbə̀ʼ icheg ne Ŋwiye ya nàʼ Kristo ane aghi àfàtì imbə̀ʼ ìmba inug tibɔ̀ŋ. Kristo ya icheg ŋwan njə̀g we ne mə̀Ju mbe kyème ane Iteri Chègun.

⁸ Ane, imbə̀ʼ tì jəg awa Iteri Chègun we tì ngə̀ŋ ne àfòrì yaʼi inga. Àfòrì anun ze ya inug tibɔ̀ŋ tì inug izəg. Tì jəg Iteri we yaʼ tì ngə̀ŋ mə̀kara ne chəyi àfòrì inga. Tì jəg ngə̀ŋ ze tì ìza fìŋ ijìm bə̀ se ghà inug tesiʼ.

⁹ Mə ya ghà inga àŋwàʼrì ze ne mə̀ ya ŋwàʼri inən gha, imbə̀ʼ mbə̰ ya jə̀grə awən tì bəd mbe ne ghìyə̀ ifanì inug.

¹⁰ Chəyi mə ghàmà yaʼ imbə̀ʼ bəd ne chəyi mbi bḛ Ŋwiye ne ghìyə̀ ifanì inug, kə̀ bəd ne ghə̀ʼrə̀ ighi ijìm, kə̀ məji, kə̀ bəd ne ghùmnə mə̀ŋwiye. Àkə ane, nji mbə̰ bèrì ni fə dù inga isəg gho̰.

¹¹ Anug ne mə ghà ya gha, imbə̀ʼ mbə̰ ya jə̀grə awən tì wə̀d ne gha zìye ya wə̀d Kristo bə̀ ywìrè kiri ghìyə̀ ifanì inug, kə̀ ghùmnə mə̀ŋwiye, kə̀ chìkə̀ tikum bəd, kə̀ no be, kə̀ bə̀ jìye, kə̀ bə̀ ghə̀ʼrə̀ ighi bəd ndəŋ. Imbə̀ʼ mbə̰ bi chughi awən aseg ni jəg tì iku wə̀d we.

¹² À wa kə àmə ati ni saʼ bəd ne chəyi awɔb inga ifeti bəd Kristo? Imbə̀ʼ mbə̰ bèrì ni saʼ yaʼ bəd ne yaʼi inga ifeti bəd Kristo?

¹³ À ya Ŋwiye biri saʼ bəd mbe ne chəyi awɔb inga ifeti bəd Kristo. A ze inga Àŋwàʼrì Ŋwiye gha, “Mbə̀ kamni bəd mbe ne ghìyə̀ inug izəg chì abɔ̀ʼ inən.”