1 Kɔrèn 4 - Ikan feg

Mba ya bədtɔm Kristo

¹ Bəd beri ni niŋ awa icheg bəd àfàʼì abə Kristo ne Ŋwiye ghì gha tì gha inug tesiʼ mbe ne yaʼi inə̀mbi.

² Anug ne mbe kə̀bə̀ abə bəd mbe ne mbi zi àfàʼì inɔb ikye abo ya gha mbe ya fàʼà icheg chɔm ane ìzɔb fìŋ ijìm.

³ Inum ya gha, kə̀ àkə mbə̰ mbe sàʼa amə, kə̀ àkə bəd ndəŋ bə chùghi aseg ni saʼ amə, àze kayi anug mɔ̀ʼɔ inum. Tesiʼ ya gha, chəyi mə sàʼa àmə nyɔd.

⁴ Chəyi mə̀ wendi anug tibɔ̀ŋ mɔ̀ʼɔ ne mə̀ ghi. Si ya gha, chəyi ze chwi gha, chəyi mə̀ ghi anug tibɔ̀ŋ. À ya Anɔŋisəg we sàʼa mə.

⁵ Ane ya gha, imbə̀ʼ mbə̰ sɔbɔ awən isaʼi igun wə̀d ne chəyi nyùmə̀ kiri koʼi. Mbə̀ ghɔmɔ. Anyumə̀ ne Anɔŋisəg biri yeʼe, wì biri chì inug ne yaʼi inə̀mbi inga fìŋ abə bəd fɔrɔ tikɔndi bəd gwè asaŋ. Anyumə̀ we, Ŋwiye biri ghumni wə̀d imɔʼ imɔʼ icheg ne àfàʼì məd chwi.

⁶ Amad anìŋ, ìmbum məfi fɔrɔ ìtum njàbi, mə ya ghà inug mbo̰ inən ni gha mbə̀ niŋ amə tì Àpolòs ane aneni anug si bèrì iwe. Mbə̰ mə̀ zug inug mbo̰, mbi biri wètì awən ni kyeri aton imbə̀ʼ ìngam we ne gha, “Imbə̀ʼ àghò fàʼà awe chè anug ne mbi ŋwàʼri inga Àŋwàʼrì Ŋwiye.” Ane, imbə̀ʼ mbə̰ kɔmɔ awən igo imbə̀ mɔ̀ʼɔ, se kə̀nə̀ ìywin.

⁷ Wə̀d ne gha inən gha wə̀d mɔ̀ʼɔ chè ìywin àkə we? Àkə aghə ne mbə̀ beri ne kayi Ŋwiye nàʼi inən? Aton ne Ŋwiye nàʼi ighi inən mbə se kɔ̀mɔ̀ igo icheg ni gha kayi Ŋwiye nàʼi inən àkə gha?

⁸ Imbə̀ʼ mbə̰ fə bèrì ìmbən ighi ijìm kə̀ kayi ane? Imbə̀ʼ mbə̰ fə bèrì ikab? Imbə̀ʼ mbə̰ fə si məfɔn atog inən ka chəyi awa? Mə taŋ kɔ̀ŋ kwàʼ tesiʼ gha mbə yaʼ məfɔn ni gha mba biri bə yaʼ məfɔn abɔ̀ʼ inən.

⁹ Àze chwi inum gha, Ŋwiye fə nɔ̀ŋì awa mba bədtɔm gha tì yaʼ bəd ne si nwḭ̀yḛ̀. Mba ya icheg bəd ne mbi fə niŋi isɔbi isaʼi ni zweti awa imbìghè abə mbè angirə̀ fɔrɔ bəd məjìm igun isəg.

¹⁰ Mba ya inen imbə̀ʼ icheg ne tì yaʼi bəd àfàʼì Kristo. Àsi awən, mbə̰ ya bəd iwe imbə̀ʼ icheg ne mbə̀ yaʼi ane ifɔti tì Kristo. Tè bɔd, mbə̰ si kà. Bəd mbe wèghè awa se ghùmnə awən.

¹¹ Tì we amad anìŋ chəyi tijəg, chəyi mənib ni no. Tì we zìyè ichəʼ ndwi. Bəd mbe bə̀ sɔ̀mɔ awa. Chəyi tì bə bèrì asiŋi chughi.

¹² Tì ya zìyè atog fàʼà ane ìmba ibo. Anyumə̀ ne bəd zɔmbi awa, tì ya chàʼrà Ŋwiye zìyè àbɔrɔ̀bɔd igun inɔb. Anyumə̀ ne bəd mbe chɔ̀ʼɔ ìmba ibɔʼì ighog, tì ya nyìʼè.

¹³ Anyumə̀ ne bəd mbe chìkə̀ ìwa ikum, tì ya ywìtè ane ìngam chɔm. Ni pè amad anìŋ, mba ya icheg imbirì ighi inga isəg. Mba ya bə̀ icheg bəd ne fə bə mànì abə bəd inga isəg.

¹⁴ Chəyi mə ŋwàʼrà anug azo̰ anìŋ ni zì tìnìrètog igun inən. Mə ya ghàmà ìngam gho̰ ni kə awən, mbə̰ ìmbum bɔn ne mə̀ taŋ kɔ̀ŋ.

¹⁵ Ka mbə bèrì bəd chuʼ ìghum ne chwìte inug imbə̀ʼ Kristo inən, tesiʼ ya gha, chəyi mbə̀ beri mə̀mbaʼ nɔʼ nɔʼ. Icheg ne mə̀ ya gha ikən chɔm inən, mo ya ìwən mbaʼ icheg ne tì yaʼi ane ifɔti tì Yeso Kristo.

¹⁶ Ane, mə we bòʼo ibo inən gha mbə̀ yḛ igun ìmbum ibɔʼì ighog.

¹⁷ À ya aton ne mə cha Timotì abɔ̀ʼ inən. Məd ya ìmə ŋwan ne mə̀ taŋ kɔ̀ŋ. Məd we fàʼà abə Anɔŋisəg ane ìzi fìŋ ijìm. Məd biri ghì mbə wendi icheg ne mə̀ yaya ghìyə̀ inug anyumə̀ ne mə̀ ya bḛ Yeso Kristo. À ya bə̀ anug ne mə chwìte isiŋi ijìm inga tifeti bəd Kristo tijìm.

¹⁸ Bəd mɔ̀ʼɔ abɔ̀ʼ inən mbe se ghàmà nɔ̀rɔ̀ nyɔd imbə̀ʼ icheg ne mbe kɔ̀ndɔ gha chəyi mə̀ biri ywiri yeʼe abɔ̀ʼ inən.

¹⁹ Tesiʼ ya gha, Anɔŋisəg mə̀ bḛ, nji chəyi agha biri sà mə ywìrì yèʼe abɔ̀ʼ inən. Mə mə̀ yèʼe, mə biri pè nwèndi inug mbe ne bəd mbe ne ghàmà nɔ̀rɔ̀ nyɔd mbe ghà, bə̀ nwèndi ika we ne mbɔb beri.

²⁰ Anug ìfɔ̀n Ŋwiye ya kayi məyi ìngam ichug. À ya anug imbə̀ʼ ika ni ghì inug mbe ne Ŋwiye kə̀bi.

²¹ Anug ne mbə kə̀bi kə azeg? Mbə wa kɔ̀ŋ gha mə yeʼe tì fìngwàn ni ywiri awən angu? Kə̀ mə yeʼe tì àkɔ̀ŋì fɔrɔ fìŋ bɔ̀ti bɔti?