1 Kɔrèn 3 - Ikan feg

Bəd àfàʼì Ŋwiye

¹ Ìmbum məfi fɔrɔ ìtum njàbi, chəyi tì mə ya ghàm inən icheg ne tì mə ghàm abə bəd ne zùgrə Azwighi Ŋwiye. Mə ya bèrì ni ghàm inən icheg bəd ne yaʼi inga isəg, kə̀ bə̀ icheg ni gha mbə̰ ya kiri bɔn bɔd inga anug Kristo.

² Inug mbe ne mə̀ ya chwiti inən ya yaʼ icheg ni gha mə yaya nàʼà ibən abə bɔn bɔd. Chəyi mə̀ ya chwiti inug ka ka inən icheg ne mbe nàʼà tijəg ka ka abə bəd kyen. Chəyi mə̀ ya ghi ane imbə̀ʼ icheg ne chəyi mbə̰ ya kiri kòʼi ni kyeri inug icheg mbe. Ka bèyi amad anìŋ, chəyi mbə̀ kiri kòʼi ni kyeri inug ka ka.

³ Aton ya gha, mbə̰ mbe kiri ghìyə̀ inug icheg bəd inga isəg. Mbə̰ mbe kiri ghìyə̀ àdeg igun mə̀mbin bə̀ chɔ̀bɔ mbə̰ mbə̰. Imbə̀ʼ àze ze chwìye gha mbə̰ ya bəd inga isəg? Imbə̀ʼ mbə̰ ya anìŋ ghìyə̀ inug kwàʼ icheg bəd ne chəyi mbi kyeri Ŋwiye?

⁴ Wə̀d mɔ̀ʼɔ kə mə̀ gha, “Mə ya bène abɔ̀ʼ Pɔl.” Ìywin tì wə̀d gha, “Mə ya bène abɔ̀ʼ Àpolòs.” Imbə̀ʼ mbə̰ ya anìŋ ghìyə̀ inug icheg bəd ne chəyi mbi kyeri Ŋwiye?

⁵ Mbə̀ si mə̀ taŋ bìri inən. Àpolòs kə bè we? Kə̀ Pɔl kə bè we? Mba məjìm ya bəd àfàʼì Ŋwiye. Mbə̰ ya chè ina anjìm ni nɔ̀ŋì ìwən ibḛfiŋ igun Kristo. Wə̀d imɔʼ imɔʼ abɔ̀ʼ ina ya fàʼà àfàʼì ne Anɔŋisəg zi ibo ikye abo.

⁶ À ya icheg ni gha mə ya nyɔ̀ʼ ngwèd, Àpolòs si yèʼe chùbrì. À ya Ŋwiye si ghì ighi mbe kweg.

⁷ Ane, chəyi wə̀d ne nyɔ̀ʼɔ̀ kə̀ wə̀d ne chùbrə̀ yaʼ aghi mɔ̀ʼɔ. Wə̀d ne beri ati chè bəd məjìm ya Ŋwiye we ne ghìyə̀ ngwèd ze kwèghe.

⁸ Wə̀d ne nyɔ̀ʼɔ̀ tì wə̀d ne chùbrə̀, mbɔb məjìm ya andəŋ andəŋ. Ane, Ŋwiye biri nàʼ chùd wə̀d icheg ne àfàʼì məd chwi.

⁹ Mba ya bəd àfàʼì ne fɔrɔ fàʼà abə Ŋwiye. Mbə̰ ya icheg mben Ŋwiye. Mbə̰ ya bə̀ icheg nəb ne Ŋwiye kɔ̀ri.

¹⁰ Mə ya fàʼà ane ika we ne Ŋwiye ghi ìchɔ̀mì inum nàʼi inum. Mə ya fàʼà icheg wə̀d ne taŋ kyèri àfàʼì ni zèg ati kwàʼ icheg wə̀d ne zèghè ati nəb. Ane, wə̀d ndəŋ we se kɔ̀rɔ igun ati ze. Si ya gha, wə̀d imɔʼ imɔʼ niŋə nyumə̀ ane icheg ne wì ya kɔ̀rɔ igun ati ze.

¹¹ Ane, chəyi tì wə̀d zèg ati ndəŋ igun àze ne mbi ya fə zèghi. Ati ze ya Yeso Kristo.

¹² Bəd mɔ̀ʼɔ mbe kɔ̀rɔ igun ati ze ane gol. Bəd mɔ̀ʼɔ mbe kɔ̀rɔ ane sibà. Bəd mɔ̀ʼɔ mbe kɔ̀rɔ ane ateg àka inun. Mə̀mbin mbe kɔ̀rɔ ane ized. Bəd mɔ̀ʼɔ mbe kɔ̀rɔ ane agyen. Mə̀mbin mbe kɔ̀rɔ ane izaŋ.

¹³ Àfàʼì wə̀d biri chwi aghi ne ze yaʼi àzewən igun aneg ze ne Kristo biri ywiri yeʼe. Igun aneg ze, iywid biri chwi iku nəb ne wə̀d kɔ̀ri asaŋ. Àfàʼì wə̀d ijìm biri chè inga iywid.

¹⁴ Àfàʼì wə̀d mə̀ chè inga iywid ne chəyi ze bere ajìm, Ŋwiye biri nàʼ chùd abə tengàŋ.

¹⁵ Àfàʼì wə̀d mə̀ bère ajìm inga iywid we, àze chwi gha tengàŋ sam chùd, si ya gha, wì biri jiʼì pum yi. Ane, wì biri pum kwàʼ icheg wə̀d ne nòrò chè inga iywid.

¹⁶ Kwàʼ tesiʼ tesiʼ, àkə chəyi mbə̀ kyeri gha ìtən nyàmnyɔd ya mbàn Ŋwiye. Àkə chəyi mbə bə kyèri gha Azwighi Ŋwiye ze chùghə inga ìtən nyàmnyɔd.

¹⁷ Wə̀d mɔ̀ʼɔ mə̀ chìkì mbàn Ŋwiye, Ŋwiye biri bə chìkì aməd. Aton ya gha mbàn Ŋwiye ya ìzi zḛ zḛ. Ane, mbə̰ ya mbàn Ŋwiye ze.

¹⁸ Imbə̀ʼ wə̀d tàmba yi ìwi nyɔd. Wə̀d mɔ̀ʼɔ abɔ̀ʼ inən mə kɔ̀ndi gha zìye bèrì iwe icheg ne bəd igun isəg mbe nḛ̀ bəd iwe, wì beri ni bə̀ŋə̀ si yaʼ icheg anen imbə̀ʼ bèrì iwe tesiʼ.

¹⁹ Aton ya gha, inug mbe ne bəd igun isəg gho̰ mbe kɔ̀ndɔ gha à ya iwe, Ŋwiye we bàrà gha à ya inug anen. Mbe ŋwàʼrì inga Àŋwàʼrì Ŋwiye gha, “Ŋwiye we gwìyè bəd mbe ne kɔ̀ndɔ gha mbɔb bèrì iwe bə̀ məyi ane ìwɔb iwe.”

²⁰ Mbe bə̀ ywìrì ŋwàʼrì inga asiŋi ndəŋ inga Àŋwàʼrì Ŋwiye gha, “Anɔŋisəg kyèri gha tikɔndi bəd mbe ne kɔ̀ndɔ gha mbɔb bèrì iwe ya kwàʼ ati ako.”

²¹ Ane, imbə̀ʼ wə̀d mɔ̀ʼɔ kɔmɔ yi igo gha zìye ya bène abɔ̀ʼ wə̀d-aku mɔ̀ʼɔ imbə̀ʼ icheg ne Ŋwiye fə nàʼ ighi ijìm inən.

²² Kə̀ àkə Pɔl, kə̀ Àpolòs, kə̀ Pità, kə̀ isəg gho̰, kə̀ ìtḛ̀, kə̀ iwu, kə̀ nyùmə̀ isəg gho̰, kə̀ nyùmə̀ isəg we ne yèʼe, ighi mbo̰ ijìm ya Ŋwiye fə nàʼi inən.

²³ Mbə̰ ya Kristo beri awən. Kristo ya Ŋwiye bə bèrì.