1 Kɔrèn 2 - Ikan feg

Anug imbə̀ʼ Kristo ne mbi ya kɔ̀mbi igun azed abaʼri

¹ Ìmbum məfi fɔrɔ ìtum njàbi, anyumə̀ ne mə̀ ya yeʼe ni ghàm inug mbe ne yaʼi inə̀mbi imbə̀ʼ Ŋwiye inən, chəyi mə̀ ya ghàmi inug mbe ane tìngam kyen kyen kə̀ ane iwe kyen.

² Aton ya gha, anyumə̀ ne mə̀ ya yaʼi abɔ̀ʼ inən, mə ya nɔ̀ŋì inum inga fìŋ gha, chəyi mə̀ biri gha anug ndəŋ chèyi ane anug imbə̀ʼ Yeso Kristo fɔrɔ anug imbə̀ʼ icheg ne mbi ya kɔ̀mbì aməd igun azed abaʼri wì ku.

³ Anyumə̀ ne mə̀ ya yeʼe inən, chəyi mə̀ ya kòʼi ane wə̀d ne tì mə ghàm inən. Ibɔ ya ghì mə binde gha chəyi mə̀ biri fàʼ icheg chɔm.

⁴ Chəyi mə̀ ya ghàmi inug mbo̰ inən ane iwe fɔrɔ ane ìngam nəmi nəmi. Mə yaya ghàmà məyi icheg ne Azwighi Ŋwiye yaya nàʼà ika inum.

⁵ Mə yaya ghìyə̀ ane ni gha mbə̀ nɔŋi ìwən ibḛfiŋ igun ika Ŋwiye, kayi igun iwe wə̀d-aku.

Iwe ne Ŋwiye we nàʼà

⁶ Anyumə̀ ne tì yaʼi tì bəd ne fə təmi kà inga anug Kristo, tì ya ghàmà ane iwe. Si ya gha, ìwa iwe kayi iwe ne bəd inga isəg beri, kə̀ ne itog bəd ne sàʼa isəg gho̰ beri, ne ìwɔb ìfɔ̀n biri mèg.

⁷ Tì ya ghàmà yaʼ ane iwe we ne Ŋwiye we nàʼà. Iwe we ya yaʼ inə̀mbi. À ya iwe ne bɔŋ Ŋwiye ya se tànga isəg, məd ya fə nɔŋi ni nàʼ ina. Wì ya ghì ane ni gha tì beri ighumni.

⁸ Chəyi wə̀d mɔ̀ʼɔ abɔ̀ʼ itog bəd mbe ne tùmbə̀ bəd inga nyùmə̀ isəg gho̰ ya kyeri anug azo̰. Àkə aghi ne mbi ya kyeri, nji chəyi mbɔb ya niŋi Anɔŋisəg ne bəd mbe ghùmnə ghò kɔ̀mbì igun azed abaʼri.

⁹ Mbe ŋwàʼrì inga Àŋwàʼrì Ŋwiye gha, “Anug ne chəyi wə̀d kə kweʼì bàd, ne chəyi wə̀d kə̀ kweʼì zug, kə̀ bì kweʼì kɔ̀ndi inga fìŋ, à ya anug ne Ŋwiye fə chuʼri nɔ̀ŋì abə bəd mbe ne kɔ̀ŋɔ̀ aməd.”

¹⁰ Ŋwiye fə chwi anug ze ne wì ya chuʼri nɔ̀ŋì ina anjìm Azwighi məd. Azwighi Ŋwiye ze twèʼrè inug ijìm. Ka à ya bèyi inug imbə̀ʼ Ŋwiye ne yaʼi inə̀mbi, məd we twèʼrè chwìye ina.

¹¹ À ya məyi azwighi wə̀d ze kyère inug ijìm imbə̀ʼ aməd. À ya bə̀ ane ne Azwighi Ŋwiye ze kyère inug ijìm imbə̀ʼ Ŋwiye.

¹² Amad anìŋ, Azwighi ze ne tì beri ze nɔ̀ʼ yaʼ abə Ŋwiye kayi inga isəg. À ya Azwighi ze ze wètè awa gha tè kyeri tineʼi te ne Ŋwiye fə nàʼi ina.

¹³ Chəyi te ghàmà inug mbo̰ ane tìngam ne beri iwe wə̀d-aku. Tì ya ghàmà yaʼ tìngam tesiʼ ne Azwighi Ŋwiye chwiti ina. Tì ya tòʼrò tìngam te abə bəd mbe ne Azwighi Ŋwiye yaʼi inga inɔb.

¹⁴ Wə̀d ne chəyi Azwighi Ŋwiye yaʼi inga məd, chəyi we bḛ inug mbe ne Azwighi Ŋwiye ze chwìte. Aton ya gha tiku inug te ya inug anen abə tengàŋ. Chəyi atog məd biri nɔ̀ʼ zen imbə̀ʼ inug mbe. À ya məyi Azwighi Ŋwiye ze ghìyə̀ gha itog zen abə bəd imbə̀ʼ tiku inug ìto̰.

¹⁵ Chəyi tì atog zen abə wə̀d ne chəyi Azwighi Ŋwiye yaʼi inga məd ni ghì gha wì kyeri iku wə̀d ne wə̀d ne beri Azwighi Ŋwiye wì yaʼi ìwiwən.

¹⁶ A ze inga Àŋwàʼrì Ŋwiye gha, “Wə̀d ne kyeri anug ne Anɔŋisəg we kɔ̀ndɔ ne tì wì nàʼ ikə ibo àkə we?” Àsi mba, tè kyèri inug ne Yeso Kristo we kɔ̀ndɔ.