1 Kɔrèn 16 - Ikan feg

Anug ni chɔ̀pì ikab wètì bəd Ŋwiye mbe a Jèrusalèm

¹ Anug ne mə̀ kəbi ni ghàm amad anìŋ ya anug ni chɔ̀pì ikab wètì bəd Ŋwiye. Mbə̀ ghiyə anug ze ne mə̀ ya gha abə tifeti bəd Kristo te inga Gàlesìyà.

² Anug ne mə̀ ya gha ya gha, ineg Sɔndè ijìm, wə̀d imɔʼ imɔʼ abɔ̀ʼ inən chi inun ikab mɔ̀ʼɔ inga we ne wì fàʼi nɔ̀ŋì, ni gha anyumə̀ ne mə̀ yèʼe, chəyi tì biri ywiri chɔ̀pì ikab we.

³ Anyumə̀ ne mə̀ yèʼe, mə biri ŋwàʼrì àŋwàʼrì imbə̀ʼ bəd mbe ne mbə̀ chɔʼi awɔb gha mbe gho a Jèrusalèm ghò nàʼ ikab we ne mbi chɔpi.

⁴ Ze mə̀ chwi gha mə bə̀ ghò, mbɔb biri yḛ̀ tì inum.

Icheg ne Pɔl ya chuʼri nyɔd nɔ̀ʼ ghò a Kɔrèn

⁵ Mə kə̀b ni yèʼe inən, si ya gha, mə biri chè a Màsèdonìyà bɔŋ se yèʼe imbə̀ʼ icheg ne mə mənyìʼ chè angu.

⁶ Ighəm mɔ̀ʼɔ mə biri chughi abɔ̀ʼ inən ane inun ineg mɔ̀ʼɔ. Kə̀ mə bə̀ chùghi abɔ̀ʼ inən ane nyùmə̀ we ne ifə we taŋ ko ni gha mbə̰ biri wètì ni chà amə ane asiŋi ne mə ghò.

⁷ Chəyi mə̀ kə̀bi ni yèʼe abɔ̀ʼ inən ighəm gho̰ pè chè che. Ane, Anɔŋisəg mə̀ bḛ, mə biri kə̀b ni pè chughi tì inən ane nyumə̀ ne to sàrì.

⁸ Si ya gha, mə biri chughi a Efesùs ghò pè ane nyùmə̀ Pentekɔ̀d.

⁹ Mə biri chughi angu ane imbə̀ʼ icheg ne Ŋwiye fə fìʼì apan chɔm inum ni fàʼ àfàʼì kyen kyen angu. Ŋwiye fìʼì ane, si ya gha, chəyi bəd nɔʼ nɔʼ kə̀bi gha mə faʼa àfàʼì ze.

¹⁰ Timotì mə yèʼe abɔ̀ʼ inən, mbə̀ niŋ aməd nyìmi kwàʼ icheg chɔm imbə̀ʼ icheg ne məd we bə̀ fàʼà abə Anɔŋisəg icheg inum.

¹¹ Ane, imbə̀ʼ wə̀d mɔ̀ʼɔ wèg yi aməd. Anyumə̀ ne məd we bə̀ndə̀ yèʼe abɔ̀ʼ inum, mbə̀ wètì aməd wì yḛ̀ kwàʼ ane àbɔrɔ̀bɔd. Mə we ghɔ̀mɔ̀ aməd gha wì yèʼe abɔ̀ʼ mbin tì məfi mbe ne yaʼi bəd Kristo.

¹² Àsi imbə̀ʼ ìwa ifi Àpolòs, mə fə ghà ibo ywìrì bèʼri gha wì yèʼe inən abɔ̀ʼ mbin tì məfi mbe ne yaʼi bəd Kristo. Si ya gha, chəyi məd kə̀bi ni yèʼe amad anìŋ. Wì biri yeʼe anyumə̀ ne wì beri apan.

Anug ne Pɔl ya si nwḭ̀yḛ̀ ni ghà

¹³ Mbə̀ we awən bə̀ nɔ̀ŋì ibḛfiŋ ne ka igun Kristo. Imbə̀ʼ mbə̰ bɔ awən. Mbə təm kà.

¹⁴ Mbə̀ faʼa inug ijìm ane àkɔ̀ŋì.

¹⁵ Ìmbum məfi fɔrɔ ìtum njàbi, mbə kyèri gha bəd mbègtog ne ya bḛ Kristo a Akìyà ya inəbi Stèfanàs. Mbə̰ bə̀ kyèri gha mbɔb ya fə zì atog ni wètì bəd Ŋwiye. Ane, mə boʼ ibo inən gha,

¹⁶ mbə̀ ya ghìyə̀ inug icheg inɔb. Mbə̀ zugri awɔb bə̀ zùgri bəd məjìm ne zìyè atog ane àfàʼì icheg inɔb.

¹⁷ Mə ya taŋ gyen anyumə̀ ne Stèfanàs tì Fàtùmatùs fɔrɔ Àkàyikùs ya pe abɔ̀ʼ inum. Mə ya gyen imbə̀ʼ icheg ne mbɔb ya fàʼ àfàʼì ze ne àkə aghi ne mbə̀ ya yaʼi aŋa, nji à ya mbə̰ ya beri ni fàʼ.

¹⁸ Mbɔb ya ghì ìmə fìŋ zutì icheg ne mbɔb ya bə̀ ghì ìtən tì fìŋ bə̀ zutì. Ze bɔ̀ŋ gha bəd kyeri gha mbɔb fàʼ àfàʼì chɔm.

¹⁹ Tifeti bəd Kristo te ne yaʼi aba isəg Esìyà te chàʼrà awən. Àkwilà tì Priskà fɔrɔ bəd Kristo mbe ne nyìme ifeti inɔb inga nəb mbe bə̀ chàʼrà awən inga ikum Anɔŋisəg.

²⁰ Bəd məjìm mbe ne bḛ Kristo mbe bə̀ chàʼrà awən. Mbə̀ chaʼra wə̀d imɔʼ imɔʼ kwàʼ icheg chɔm. Mbə̀ chaʼra ane chwi àkɔ̀ŋì ze ne yaʼi inga bəd Kristo.

²¹ À ya mo Pɔl ŋwàʼri ichaʼri gho̰ kwàʼ ane àmə abo.

²² Ndɔ̀n ze igun wə̀d ne chəyi wì kɔ̀ŋi Anɔŋisəg. Ìwa Anɔŋisəg! Àghò yeʼe!

²³ Anɔŋisəg Yeso ghiyə ìchɔ̀mì inən.

²⁴ Mə kɔ̀ŋ awən mbə̰ məjìm icheg ne tì yaʼi ane ifɔti tì Yeso Kristo. À ya ane!