1 Kɔrèn 14 - Ikan feg

Ineʼi ni ghà ikən Ŋwiye tì ineʼi ni ghàm tìngam iben ndəŋ

¹ Mbə̀ kirə ika ni ya kɔ̀ŋɔ̀ wə̀d imɔʼ imɔʼ. Mbə̀ bə nɔ̀ŋì ìtən fìŋ igun tineʼi te ne Azwighi Ŋwiye ze nàʼà. Mbə̀ ziye atog yaʼ ane ineʼi we ni ghà ikən Ŋwiye.

² Bəd mbe ne ghàmà ìngam aben ndəŋ ya ghàmà abə Ŋwiye, kayi abə bəd, imbə̀ʼ icheg ne chəyi tì wə̀d kyèri anug ne mbe ghà. Mbɔb ya ghàmà tesiʼ we ne yaʼi inə̀mbi icheg ne Azwighi Ŋwiye ze nàʼà ika inɔb.

³ Si ya gha, bəd mbe ne ghà ikən Ŋwiye ya ghàmà abə bəd ni nə̀rì ìtɔb fìŋ bə̀ ghìyə̀ gha mbe təm kà bə̀ ghì gha ìtɔb fìŋ zutə.

⁴ Bəd mbe ne ghàmà tìngam iben ndəŋ ya wètè məyi ìwɔb nyɔd ni təm kà. Àsi bəd mbe ne ghà ikən Ŋwiye, mbɔb ya wètè ifeti bəd Kristo ijìm gha we təm kà.

⁵ Mə kɔ̀ŋ gha mbə̰ məjìm ya ghàmà ane tìngam iben ndəŋ. Si ya gha, anug ne mə̀ taŋ kɔ̀ŋ ya gha mbə̀ ya ghà ikən Ŋwiye. Ze bɔ̀ŋ ane imbə̀ʼ icheg ne wə̀d ne ghà ikən Ŋwiye wè chè wə̀d ne ghàmà tìngam iben ndəŋ, kirənde wə̀d mɔ̀ʼɔ we angu ni tòʼrì anug ze ne məd we ghà ni ghì gha ifeti bəd Ŋwiye ijìm we təm kà.

⁶ Ane, ìmbum məfi fɔrɔ ìtum njàbi, mə mə̀ yèʼe abɔ̀ʼ inən pè se ghàmà inga ìngam ne chəyi mbə̰ mbe zùghə, àze biri wetì awən iye? Chəyi ze biri wètì awən ka, kirənde mə tòʼro tesiʼ we ne yaʼi inga ikən Ŋwiye inən, kə̀ bə̀ ghà anug ne Ŋwiye kə̀bi gha mbə̀ kyeri, kə̀ ghà ikən Ŋwiye inən, kə̀ bə̀ chwìti inug inən.

⁷ Mbə̀ niŋ ka bèyi ighi abin icheg ikəʼ kə̀ ngɔ̀m ne kayi ighi izɔm, tì wə̀d kyeri ikyeg ne mbe zə̀ʼə̀ ne chəyi gì imɔʼ imɔʼ du zen?

⁸ Kə̀ wə̀d we ne fə tàŋ mə chəyi wì fə ane gì ne bəd biri kyeri gha wì ya ghàmà imbə̀ʼ ibid, wə̀d ne biri chuʼri nyɔd ni dù ghò ane ibid àkə we?

⁹ À ya ane ne mbə̀ bə yaʼ. Wə̀d mə ya ghàmà abə bəd ane ìngam ne chəyi bəd mbe zùghə, mbi kə si chè iye ni kyeri anug ne wì ya ghà? Wì biri ya ghàmà yaʼ ati ako.

¹⁰ Mbə̰ kyèri àzən aghi gha tìngam nɔʼ nɔʼ ti igun isəg. Chəyi ìngam mɔ̀ʼɔ igun isəg ne mbe ghàmà ne chəyi bəd mbe zùghə kyère anug ne we ghà.

¹¹ Si ya gha, mə mə̀ chəyi mə̀ kyeri ìngam ne wə̀d mɔ̀ʼɔ we ghàmà, mo ya wə̀d tìsɔ̀ʼ abə wə̀d ne ghàmà, məd bə̀ yaʼ wə̀d tìsɔ̀ʼ inum.

¹² Icheg ne mbə̰ mbe kə̀bə̀ ni beri tineʼi te ne Azwighi Ŋwiye ze nàʼà, mbə̀ kirə ika ijìm ni taŋ bèrì yaʼ tineʼi te ne biri wètì gha ifeti bəd Kristo ijìm təm kà.

¹³ Bəd mbe ne ghàmà tìngam iben ndəŋ mənyìʼ chàʼra Ŋwiye gha wì naʼa ika inɔb ni tòʼrì anug ne mbɔb mbe ghà.

¹⁴ Aton ya gha, mə mə̀ ya chàʼrà Ŋwiye ane tìngam iben ndəŋ, àmə azwighi biri ya chàʼrà Ŋwiye, si ya gha, chəyi mə̀ kyère anug ne mə̀ ghà.

¹⁵ Aghi ne mə̀ beri ni ghì amad anìŋ àkə aghə? Mə biri ya chàʼrà Ŋwiye ane àmə azwighi, bə̀ chàʼrà Ŋwiye ane ìngam ne mə zùghə. Mə biri ya zə̀ʼə̀ ikyeg ane àmə azwighi bə̀ zə̀ʼə̀ ikyeg ane ìngam ne mə zùghə.

¹⁶ Mbə̰ mə̀ ya nàʼà məyakà abə Ŋwiye məyi ane àzən azwighi, wə̀d ne yaʼi abɔ̀ʼ inən ne chəyi we zùghə anug ne mbə̰ mbe ghà, tengàŋ kə si chè iye ni bḛ gha “À ya ane” ane anug ne mbə̰ mbe ghà?

¹⁷ Wə̀d biri ya chàʼrà Ŋwiye kwàʼ icheg chɔm, si ya gha, chəyi ze biri wètì bəd ndəŋ gha mbe təm kà ne chəyi mbe zùghə anug ne wì ya ghà.

¹⁸ Mə nàʼ məyakà abə Ŋwiye gha mə we ghàmà inga tìngam iben ndəŋ chè awən mbə̰ məjìm.

¹⁹ Si ya gha, anyumə̀ ne mə̀ yaʼi inga ifeti bəd Ŋwiye, mə biri kɔ̀ŋ ni ghà inug ità̰ yaʼ inga ìngam ne bəd biri zug ne biri wètì bəd gha mbe təm kà, chè icheg ni ghàm inug chuʼ ìghum ane tìngam iben ndəŋ ne chəyi bəd biri zug.

²⁰ Ìmbum məfi fɔrɔ ìtum njàbi, imbə̀ʼ mbə̰ ya kɔ̀ndɔ awən inug icheg bɔn kwa. Àmə se ane inug tibɔ̀ŋ, mbə̀ yaʼ awən abəŋ icheg bɔn kwa. Mbə̀ yaʼ icheg bɔn kwa, si ya gha, mbə̀ se kɔ̀ndɔ inug icheg bəd kyen.

²¹ A ze inga Àŋwàʼrì Ŋwiye gha, “Anɔŋisəg gha, mə biri chè inga bəd ne ghàmà ane tìngam iben ndəŋ bə̀ chè inga bəd tìsɔ̀ʼ ni ghàm abə bəd mbo̰, si ya gha, chəyi mbɔb biri bḛ anug ne mə ghà.”

²² Ane, tìngam iben ndəŋ ya aneni abə bəd ne chəyi mbi bḛ Ŋwiye kayi abə bəd ne bḛ Ŋwiye. Àsi anug ni ghà ikən Ŋwiye ya abə bəd ne bḛ Ŋwiye kayi abə bəd ne chəyi mbi bḛ Ŋwiye.

²³ Ane, bəd ne chəyi mbi bḛ Ŋwiye mə̀ yèʼe inga ìwən ifeti pè bàd gha mbə̰ məjìm mbe ghàmà ane tìngam iben ndəŋ, ne chəyi bəd mɔ̀ʼɔ abɔ̀ʼ inən mbe zùghə, imbə̀ʼ mbi biri se kɔ̀ndɔ gha mbə̰ fə be?

²⁴ Anyumə̀ ne mbə̰ mbe ghà ikən Ŋwiye, wə̀d mɔ̀ʼɔ ne kayi wə̀d Kristo, kə̀ wə̀d ne chəyi wì kyeri inug mbo̰, mə̀ yèʼe, wì biri zug anug ne mbə̰ mbe ghà. Wì mə zug, fìŋ məd biri se sàʼa aməd imbə̀ʼ inug tibɔ̀ŋ məd. Bəd məjìm biri bə bḛ gha tengàŋ ya wə̀d inug tibɔ̀ŋ.

²⁵ Tikɔndi te ne yaʼi ibo inga fìŋ biri dù asaŋ. Ane, àze biri ghì gha wì gughə aseg se ghùmnə Ŋwiye gha, “Kwàʼ tesiʼ, Ŋwiye we kwàʼ tì inən.”

Ikuchèg ne bɔŋi ni ghumni Ŋwiye

²⁶ Ìmbum məfi fɔrɔ ìtum njàbi, tì kə ywìrè gha? Anyumə̀ ne mbə̀ fɔti asiŋi afibì ni ghumni Ŋwiye; Wə̀d ne beri ikyeg wì zəʼə. Wə̀d ne beri ikə wì naʼa. Wə̀d ne beri anug ne Ŋwiye chwi ibo, wì toʼro. Wə̀d ne chàʼrà Ŋwiye ane tìngam iben ndəŋ, wì chaʼra. Wə̀d ne tòʼrò tìngam te, wì toʼro. Inug mbo̰ ijìm mənyìʼ yaʼ ni ghì gha bəd inga ifeti bəd Ŋwiye mbe təm kà.

²⁷ Bəd mə ya ghàmà ane tìngam iben ndəŋ, imbə̀ʼ mbi che awɔb bəd məbe kə̀ mətad. Wə̀d imɔʼ ya ghàm, nàʼ apan, wə̀d ndəŋ tòʼrì anug ne wì gha.

²⁸ Àmə chəyi wə̀d ni tòʼrì anug ne wə̀d we ne ghàmà ane tìngam iben ndəŋ we ghà, tengàŋ chim tizi inga ifeti bəd Kristo, si ghàm məyi məd tì Ŋwiye.

²⁹ Bədkə̀n məbe kə̀ mətad, mbe gha ikən Ŋwiye, mə̀mbin si taŋ nèn anug ne mbe ghà.

³⁰ Ŋwiye mə chwìti anug mɔ̀ʼɔ abə wə̀d ne yaʼi aseg ichughi, wə̀d ne kə̀ yaʼi itəmi ghàmà, wì chim tizi.

³¹ Wə̀d ijìm we tì wì niŋ apan ghà ikən Ŋwiye nàʼ apan abə wə̀d ndəŋ. Àze biri ghì bəd nani inug imbə̀ʼ Ŋwiye bə̀ nə̀ri fìŋ abə bəd.

³² Bəd mbe ne beri ineʼi ni ghà ikən Ŋwiye mbe tì mbi chuʼri icheg ni ghàm angu.

³³ Mbə̀ ya ghìyə̀ ane imbə̀ʼ icheg ne chəyi Ŋwiye we ghìyə̀ inug inga àbùrì. Ŋwiye ya kə̀bə̀ gha bəd chughi ane àbɔrɔ̀bɔd. Icheg ne ze yaʼi inga tifeti bəd Kristo tijìm,

³⁴ chəyi àyi beri ni ghàm anug mɔ̀ʼɔ inga ifeti bəd Kristo. Àyi bèrì ni swi ìwi nyɔd aseg, chim tizi inga ifeti icheg ne mə̀nɔ̀ʼɔ̀ mə̀Ju gha.

³⁵ Wì mə kə̀b ni kyeri anug mɔ̀ʼɔ, wì biri abə ìwi inɔm inɔb inga nəb imbə̀ʼ icheg ne à ya tìnìrètog abə àyi ni ghàm inga ifeti bəd Ŋwiye.

³⁶ Àkə inən ne Ìngam Ŋwiye ya ko? Kə̀ àkə məyi inən ne ìngam we ya yeʼe?

³⁷ Wə̀d mɔ̀ʼɔ mə̀ kɔ̀ndi gha zìye ya wə̀dkə̀n Ŋwiye, kə̀ wə̀d ne gha Azwighi Ŋwiye nàʼ ineʼi ibo, məd kyeri gha anug azo̰ ne mə ghà inən ya ikə ne Anɔŋisəg nàʼi inum.

³⁸ Wə̀d mɔ̀ʼɔ mə̀ wèg anug azo̰, Ŋwiye biri bə wèg məd.

³⁹ Ane, ìmbum məfi fɔrɔ ìtum njàbi, mbə ziye atog ni ghà ikən Ŋwiye. Imbə̀ʼ mbə̰ kə̰ awən anug ni ya ghàmà ane tìngam iben ndəŋ.

⁴⁰ Si ya gha, mbə̀ ya fàʼà ighi ijìm ane icheg ne koʼi bə̀ bɔ̀ŋ.