1 Kɔrèn 12 - Ikan feg

Tineʼi te ne Azwighi Ŋwiye ze nàʼà

¹ Ìmbum məfi fɔrɔ ìtum njàbi, mə kə̀b gha mbə̀ kyeri tesiʼ imbə̀ʼ tineʼi te ne Azwighi Ŋwiye ze nàʼà.

² Mbə̀ kyeri gha anyumə̀ ne chəyi mbə̰ ya kiri bḛ Ŋwiye, mbi yaya fèbrè awən ane tinɔnjì nɔʼ nɔʼ ghìyə̀ mbə se ghùmnə mə̀ŋwiye ako ne chəyi mbe ghàmà.

³ Amad anìŋ, mə kə̀b gha mbə̀ kyeri gha chəyi tì wə̀d ne Azwighi Ŋwiye yaʼi inga məd gha, “Ndɔ̀n yaʼ igun Yeso.” Mə bə̀ kə̀b gha mbə̀ kyeri gha chəyi tì wə̀d gha, “Yeso ya Anɔŋisəg,” ne kayi Azwighi Ŋwiye ghi.

⁴ Tineʼi ya aku aku, si ya gha, à ya məyi Azwighi Ŋwiye məd imɔʼ we nàʼà tineʼi te.

⁵ Ìfàʼì ya bə̀ aku aku, si ya gha, à ya məyi Anɔŋisəg we imɔʼ ne nàʼà ìfàʼì mbe.

⁶ Tinɔnjì ni fàʼ te aku aku, si ya gha, à məyi Ŋwiye we imɔʼ ya ghìyə̀ gha wə̀d imɔʼ imɔʼ fàʼà àze àfàʼì ne wì nàʼi ibo.

⁷ À ya Ŋwiye ghi gha wə̀d imɔʼ imɔʼ ya fàʼà àze àfàʼì ne Azwighi Ŋwiye nàʼi ibo imbə̀ʼ ya wètì bəd məjìm.

⁸ Azwighi Ŋwiye ya nàʼà ika ni ghàm ìngam iwe abə wə̀d imɔʼ. À ya bə̀ məyi Azwighi Ŋwiye ze amɔʼ ze nàʼà ika ni kyeri inug abə wə̀d ndəŋ.

⁹ À ya bə̀ məyi Azwighi Ŋwiye ze amɔʼ ze nàʼà ika ni bèrì ibḛfiŋ abə wə̀d imɔʼ, bə̀ nàʼà ika ni ghù ighɔn abə wə̀d ndəŋ.

¹⁰ Azwighi Ŋwiye ze nàʼà ika ni fàʼ iyeti inug abə wə̀d imɔʼ. À ya àzewən ze bə̀ nàʼà ika abə wə̀d ndəŋ ni ghà ikən Ŋwiye. À ya Azwighi Ŋwiye ze bə̀ nàʼà ika abə wə̀d imɔʼ gha wì kyeri icha ne yaʼi inga azwighi chɔm tì azwighi tibɔ̀ŋ. À ya Azwighi Ŋwiye ze amɔʼ ze bə̀ nàʼà ika ni ghàm tìngam iben ndəŋ abə wə̀d imɔʼ. À ya bə̀ məyi Azwighi Ŋwiye ze amɔʼ ze nàʼà ika ni tòʼrì anug ne mbi gha inga tìngam iben ndəŋ abə wə̀d ndəŋ.

¹¹ À ya məyi Azwighi Ŋwiye ze amɔʼ ze ghàpà tineʼi ìto̰ tijìm abə wə̀d imɔʼ imɔʼ icheg ne Azwighi Ŋwiye kə̀bi.

Nyàmnyɔd imɔʼ bèrì isiŋi nyɔd nɔʼ nɔʼ

¹² Nyàmnyɔd wə̀d bèrì isiŋi nyɔd nɔʼ nɔʼ. Ka isiŋi nyɔd jiʼì nɔ̀ʼ, à ya məyi nyàmnyɔd imɔʼ. À ya icheg ne ze bə yaʼ tì nyàmnyɔd Kristo.

¹³ Kə̀ mbə̰ kə mə̀Ju kə̀ bəd ne kayi mə̀Ju, kə̀ məfeg kə̀ bəd ne kayi məfeg, tì ya niŋ mənib anjìm Azwighi Ŋwiye ze amɔʼ. Ane, tì fə fɔti si nyàmnyɔd imɔʼ. Ŋwiye ya zì Azwighi ze amɔʼ inga ina.

¹⁴ Chəyi nyàmnyɔd beri məyi asiŋi nyɔd amɔʼ. Ze bèrì isiŋi nyɔd nɔʼ nɔʼ.

¹⁵ Aghog mə̀ gha, “Chəyi mə̀ yaʼi aba ane nyàmnyɔd imbə̀ʼ icheg ne mo kayi abo.” Chəyi àze biri ghì gha imbə̀ʼ aghog ywiri yaʼ yi aba ane nyàmnyɔd.

¹⁶ Àtɔ̀ŋi mə̀ bə̀ gha, “Chəyi mə̀ yaʼi aba ane nyàmnyɔd imbə̀ʼ icheg ne mo ya kayi ighə.” Chəyi àze biri ghì gha imbə̀ʼ àtɔ̀ŋi ywiri yaʼ yi aba ane nyàmnyɔd.

¹⁷ Nyàmnyɔd ijìm kə mə̀ yaʼ ighə, zì biri se zùghə inug iye? Nyàmnyɔd ijìm kə mə̀ yaʼ àtɔ̀ŋi, zì biri se zùghə ifɔ iye?

¹⁸ Tesiʼ ya gha, Ŋwiye ya tangi nyàmnyɔd tì isiŋi nyɔd nɔʼ nɔʼ. Isiŋi nyɔd ijìm ya igun nyàmnyɔd icheg ne Ŋwiye kə̀bi.

¹⁹ Nyàmnyɔd ijìm kə mə̀ yaʼ məyi asiŋi nyɔd amɔʼ, ze biri yaʼ iye?

²⁰ Tesiʼ ya gha, isiŋi nyɔd nɔʼ, si ya gha, nyàmnyɔd ya məyi imɔʼ.

²¹ Chəyi tì ighə ghà abə abo gha, “Chəyi mə̀ kə̀bi awe.” Chəyi tì atog bə̀ ghà abə aghog gha, “Chəyi mə̀ kə̀bi awe.”

²² Anug ne angu ya gha, chəyi tì nyàmnyɔd fàʼ icheg chɔm ne chəyi isiŋi nyɔd mbe ne bəd mbe nḛ̀ gha mbe bɔd mbi yaʼi.

²³ Isiŋi nyɔd mbe ne chəyi bəd mbe nìŋə ane aghi mɔ̀ʼɔ, ya isiŋi nyɔd mbe ne bəd mbe taŋ ghùmnə. Isiŋi nyɔd mbe ne chəyi mbi bɔŋi ni nèn, à ya mbiwən ne bəd mbe taŋ kyèʼrè.

²⁴ Àsi isiŋi nyɔd mbe ne bɔŋi ni nèn, chəyi bəd mbe taŋ kyèʼrè. À ya Ŋwiye ya fə fɔti isiŋi nyɔd mbe ijìm ane ìmbi imɔʼ, bə̀ nàʼ ighumni kyen abə isiŋi nyɔd mbe ne chəyi bəd mbe nìŋə ane aghi mɔ̀ʼɔ.

²⁵ Ŋwiye ya ghì ane ni gha isiŋi nyɔd imɔʼ imɔʼ ya kyèʼrè mbin, ni ghì gha imbə̀ʼ àghàpì yaʼ yi inga nyàmnyɔd.

²⁶ Asiŋi nyɔd amɔʼ mə̀ ya zə̰ ngəʼ, mbin tì isiŋi nyɔd ijìm mbe bə̀ zə̰ ngəʼ abɔ̀ʼ. Mbi mə̀ nàʼ ighumni abə asiŋi nyɔd amɔʼ, mbin tì isiŋi nyɔd ijìm mbe bə̀ gyènde abɔ̀ʼ.

²⁷ Ane, mbə̰ məjìm ya nyàmnyɔd Kristo. Wə̀d imɔʼ imɔʼ bèrì àze asiŋi inga nyàmnyɔd Kristo.

²⁸ Ŋwiye fə chɔʼ bəd inga ifeti bəd Kristo. Bəd mbègtog ya bədtɔm Kristo. Bəd ne bène abɔ̀ʼ ya bədkə̀n Ŋwiye. Bəd ne pè ane itad ya mə̀chwitinùg. Bɔŋ se nàʼà abə bəd ne ghìyə̀ iyeti inug, tì bəd ne beri tineʼi ni ghù ighɔn, tì bəd ne nàʼà àwètì abə mə̀mbin, tì bəd ne kyeri icheg ni saʼ bəd, tì bəd ne ghàmà ane tìngam iben ndəŋ.

²⁹ Wə̀d ijìm wa kə wə̀dtɔm Kristo? Wə̀d ijìm wa kə wə̀dkə̀n Ŋwiye? Wə̀d ijìm wa kə àchwitìnùg? Wə̀d ijìm wa kə wə̀d ne ghìyə̀ iyeti inug?

³⁰ Wə̀d ijìm wa bèrì ineʼi ni ghù ighɔn? Wə̀d ijìm we wa ghàmà tìngam iben ndəŋ aku aku? Wə̀d ijìm we wa tòʼrò tìngam iben ndəŋ?

³¹ Mbə̀ nɔŋi fìŋ yaʼ igun tineʼi ne che tineʼi ìto̰. Mə biri chwi inɔ̀njì inən ne bɔŋi chè tinɔnjì ijìm.