Lɔmukalu 3 - Ala Ya Salatikan Kula Kitabu

¹ Wo lɔ saa, nafa mindɛ le yi Jahudiyaya la? Tɔnɔ suu mindɛ le yi kɛnɛkɛko la?

² Tuɲa le, wo nafa walanin boloɲa bɛ le ma! A kunfɔlɔ le, Ala na aa samakan kalifala Jahudiyalu le la.

³ Kɛɛ ni ai dɔlu ka kɛ lanandeyabali le do? Jalasa wo le kɛtɔ Ala ya lanandeya tiɲala?

⁴ Ɛnɛn dɛ! Fɔ m'a lɔn Ala yi tuɲande le le, hali ni adamaden bɛ tɛɛ kɛ faɲafɔba le. A do sɛvɛnin tan ne kitabu kɔnɔ, ko: «Jo yi di i ma i kumakannu lɔ, i do yi see sɔlɔn iya kiti lɔ.»

⁵ Kɛɛ ni maa telenbaliya vɛ kɛla sabu le ka Ala ya telenmandeya lagbɛ, m'i mindɛ le fɔ wo lɔ? Jalasa ǹ'i kuma mɔɔnivinya boloma k'a fɔ ko jo tɛ Ala bolo ka aa mɔnɛya lajii mɔ kanma?

⁶ Ɛnɛn dɛ! Ni Ala tɛɛ ma kɛ telenmande le, a tɛɛ se dunuɲa kitila di wo lɔ?

⁷ Kɛɛ do, ni ǹa faɲafɔko ka kɛ sabu le k'a dɔ la Ala ya tuɲandeya kɔkan aa magbiliyali lɔ, mindɛ lɔ a yi ǹ jobaliyala bene iwo julumbutɔ?

⁸ Wo lɔ, mindɛ lɔ mɔ t'a fɔla, ko: «M'i koyon kɛ fɔsa koɲuma dɔ yi bɔ a lɔ»? Mɔɔ dɔlu yi tɔɔ lala mɔ la tan ne, ko m'i mɔɔlu kalanna kuma wo le la. Ai kɛtɔ latɔnni sɔlɔnna iwo a bɛnnin ai ma teme.

Mɔɔ foi telennin tɛ

⁹ A yi di vɛ? Jalasa ǹu Jahudiyalu fisayanin ka timin dɔ mɔɔlu la? Wo tɛ dɛ! M̀'ɛ ban a lagbɛla ko Jahudiyalu ni siboloma gbɛlɛ mɔɔlu bɛ yi julumbu ya fanga le kɔlɔ.

¹⁰ A sɛvɛnin kitabu kɔnɔ tan ne, ko: «Mɔɔ foi telennin tɛ, hali mɔɔ den kelen gbu!

¹¹ Mɔɔ foi tɛ ko ɲayena, ani ai suu suu tɛ Ala ɲininna!

¹² Ai bɛ vɛ fili, k'ai kɛ nafandan ne kelen ne. Ai suu suu tɛ kokein kɛla, hali mɔɔ den kelen gbu!

¹³ Ai dalakan kɛwonyayine iwo kabulu dalakanin. Ai y'ai nɛɛ labaalela janvakolu le lɔ. Woloto baa le yi bɔla ai nɛɛ kɔlɔ.

¹⁴ Ai da lafanin daanni ani kuma gbeyanin ne la.

¹⁵ Ai sen latelejanin jeli bɔnko le lɔ.

¹⁶ Ai vɛ timinna tɛɛ o tɛɛ lɔ, tiɲali ni bɔnɔ le yi tola je.

¹⁷ Ai ma josolajii siya lɔn.

¹⁸ Ai tɛ siyanna Ala ɲa feu.»

¹⁹ Mɔ do k'a lɔn ne ko Nabi Musa ya seliya yi min min si fɔla, a yi wolu le fɔla mɔɔlu yɛ minu yi seliya wo kɔlɔ, fɔsa mɔɔ bɛ da la yi tuun, ani dunuɲa bɛ lakafonnin yi don Ala ya kiti kɔlɔ.

²⁰ Wo le n'a kɛla, mɔɔ mɔɔ tɛnala jatela telenmande le Ala ɲakɔlɔ ka bɛn seliya latelenko ma, kamasɔlɔn julumbu lɔnko yi nala seliya le fɛ.

Ala yi mɔɔlu jatela telenmande le teme

²¹ Kɛɛ tandainɔ yi ne, Ala v'a jiya mɔ la a yi mɔɔlu jatela telenmande le teme, hali ni seliya sen t'a lɔ, k'a talan seliya kitabu ani kela dɔgbɛlɛlu ya kitabulu vɛ seleya kelen min di.

²² Wo le k'a fɔ ko Ala yi mɔɔlu kɛla telenmande le ka bɛn limaniya le ma Masa Tɔɔmasenin Isa ma. Wotɛbɔli tɛ je,

²³ kamasɔlɔn bɛ vɛ julumbu ta k'ai fo Ala ya magbiliyali la,

²⁴ bɛ do vɛ jate telenmande le aa nɛɛma dinin sabu la ka bɛn kunmakako ma, Masa Tɔɔmasenin Isa nanin min ne.

²⁵ Ala na ale le bɔla julumbu lɔkoto salaka le ka bɛn a jeli bɔnko ma, min yi se sɔlɔnna limaniya boloma. Wo ka kɛ Ala ya telenmandeya jiyako le lɔ, kamasɔlɔn kɔlɔkɔlɔ le, a tɛɛ a ɲa lagbanna mɔɔlu ya julumbulu kunna ka bɛn aa sawali ma.

²⁶ A na wo kɛla aa telenmandeya jiyako le lɔ waate min nɔ, ani k'a jiya ko telenmande le a le, a do yi mɔɔlu jatela telenmande le minu limaniyanin Isa ma.

²⁷ Mindɛ le tonin mɔ bolo butu, k'a fɔ ko m'i mɔ waso wo la? Foi! Jalasa m'i sene ka mɔ waso ka bɛn maa seliya latelenko ma? Ɛnɛn dɛ! Mafɔ, limaniya dein!

²⁸ Kamasɔlɔn mɔ lanin a la ko Ala yi mɔɔ jatela telenmande le limaniya le fɛ, wo tii ya seliya latelenko tɛ.

²⁹ Niwotɛ, Ala yi Jahudiyalu Tii le le dein? Siboloma gbɛlɛ mɔɔlu fana Tii tɛ Ala le? Wolu fana y'a ta le le jɔ!

³⁰ Komi Ala yi kelen ne le, wo lɔ, a kɛtɔ Jahudiyalu jatela telenmande le limaniya le fɛ, ani siboloma gbɛlɛ mɔɔlu fana.

³¹ Jalasa wo kɔlɔ le ko Nabi Musa ya seliya vɛ kɛ kofuun ne ka bɛn limaniya min ma? Wo tɛ dɛ! Mafɔ, m'i seliya wo lasawatila.