Galatiyakalu 3 - Ala Ya Salatikan Kula Kitabu

Seliya latelenko ni limaniya

¹ Àilu Galatiyaka hangilindannu! Jene n'ài hangili ɲaamina? Masa Tɔɔmasenin Isa gbaannin kɔlɔman ma kun min na, ǹ na wo lagbɛla ài yɛ kɔlɔman ne.

² Ǹ'a fɛ k'ài maɲininga ko kelen min na, wo le ne: Ài na Nii Sɛnɛyanin sɔlɔnna ka bɛn àiya seliya latelenko le ma, baa ài na Samakan Kein le mɛnna ka limaniya a ma?

³ Mindɛ lɔ ài vɛ kɛ hangilindan ne tan? Ài na ko min daminala Nii Sɛnɛyanin ya see lɔ, jalasa ài y'a fɛ ka wo laban àilu gbu ya see le lɔ?

⁴ Ài na timinna ko minu bɛ lɔ, jalasa wo bɛ yi kofuun ne le? Ai tɛ kofuun ne feu!

⁵ Ala min yi Nii Sɛnɛyanin dila ài ma ka kawanankolu labaale ài tɛma, jalasa a yi wo kɛla ka bɛn àiya seliya latelenko le ma, baa ài na Samakan Kein le mɛnna ka limaniya a ma?

⁶ Wo boloɲa ma, Nabi Ibulahima ya ko sɛvɛnin kitabu kɔnɔ, ko: «Ibulahima ka limaniya Ala ma, ado Ala k'a jate telenmande le.»

⁷ Wo lɔ saa, ài y'a lɔn ko mɔɔ minu vɛ limaniya Ala ma, wolu yi Ibulahima bɔzɔn ne le.

⁸ A sɛvɛyine kitabu kɔnɔ kɔlɔkɔlɔ le ko Ala kɛtɔ siboloma gbɛlɛ mɔɔlu jatela telenmande le ka bɛn limaniya le ma. Wo lɔ, Samakan Kein la ka se Ibulahima ma jani wo waate tɛɛ se, ko: «Siboloma bɛ kɛtɔ balaka sɔlɔnna ile le fɛ.»

⁹ Ka bɛn wo ma, ni mɔɔ minu ka limaniya, wolu kɛtɔ balaka sɔlɔnna Ibulahima le fɛ, min tɛɛ limaniyamɔɔ le.

¹⁰ Mɔɔ minu bolomalanin seliya latelenko ma, wolu bɛ daanyine. Kamasɔlɔn a sɛvɛnin kitabu kɔnɔ, ko: «Mɔɔ minu tɛ ko bɛ latelenna minu sɛvɛnin seliya kitabu kɔnɔ, wolu bɛ daanyine.»

¹¹ A lagbɛyine ko mɔɔ foi tɛ se jatela telenmande le Ala ɲakɔlɔ ka bɛn seliya latelenko ma, kamasɔlɔn a sɛvɛnin kitabu kɔnɔ, ko: «Mɔɔ telennin kɛtɔ niimaya kɛla limaniya le boloma.»

¹² Kɛɛ seliya jusiinin tɛ limaniya kɔkan, kamasɔlɔn a yi seliya kitabu kɔnɔ, ko: «Ni mɔɔ min ka ko minu latelen, wo tii kɛtɔ niimaya kɛla ka bɛn wolu le ma.»

¹³ Masa Tɔɔmasenin ka mɔ kunmaka ka mɔ bɔ seliya ya daan kɔlɔ, kamasɔlɔn a k'a jɛlɛ bila daan kɔlɔ maa ko le lɔ, iwo a sɛvɛnin teme kitabu kɔnɔ, ko: «Mɔɔ mɔɔ si su dɛnnin kɔlɔman na, wo tii daanyine.»

¹⁴ A na mɔ kunmakala fɔsa Nabi Ibulahima balaka yi la siboloma gbɛlɛ mɔɔlu kɔkan Masa Tɔɔmasenin Isa sabu la, ani ǹu gbu yi Nii Sɛnɛyanin sɔlɔn limaniya fɛ, min lahedi tanin Ala bolo.

Seliya ni salatikan

¹⁵ M̀ badenmalu, ǹ'a fɛ ka misali di ka bɛn maa laanalu le ma. Ni mɔɔ dɔ ka salatikan sɛvɛ ladan k'a to a kɔ, mɔɔ gbɛlɛ tɛ se wo tiɲala, kumatɛ k'a dɔ la wo kɔkan.

¹⁶ Ado Ala ka lahedi ta Nabi Ibulahima ni a bɔzɔn ne yɛ. Wo lɔ, a sɛvɛnin tɛ kitabu kɔnɔ ko: «a bɔzɔnnu,» ka kɛ iwo mɔɔ siyama, mafɔ a sɛvɛnin ko: «a bɔzɔn,» min taanin kɛla Masa Tɔɔmasenin ne.

¹⁷ Ǹa kuma kɔlɔ le min ne: Nabi Musa ya seliya min dinin tɛɛ sanji kɛmɛ naani ni sanji bisawa (430) le Ala ya lahedi ta kɔ Ibulahima yɛ, wo ma se salatikan kunfɔlɔ wo tiɲala, kumatɛ ka Ala ya lahedi tanin lɔsa.

¹⁸ Kamasɔlɔn ni Ala ya nɛɛma jusiinin seliya latelenko le kɔkan, wo vɛ kɛla, a jusiinin tɛ lahedi kɔkan butu. Kɛɛ Ala ka nɛɛma wo di Ibulahima ma ka bɛn lahedi le ma.

¹⁹ Wo lɔ saa, seliya kun yi mindɛ le? Seliya wo ka kafon Ala ya lahedi kɔkan ka kɛ mɔɔlu jobaliyala, haan fɔɔ Ibulahima bɔzɔn tɛɛ na, min ya lahedi tanin. Ado seliya wo lajiinin mɛlɛkalu le bolo Nabi Musa ma, min tɛɛ mɔɔluwotɛmɔɔ le.

²⁰ Kɛɛ Ala ka lahedi ta Ibulahima yɛ waate min nɔ, a mako tɛɛ tɛ mɔɔluwotɛmɔɔ ko la, kamasɔlɔn Ala kelenpesa le.

²¹ A yi di wo lɔ? Jalasa seliya nanin Ala ya lahedilu le kanma? Wo tɛ dɛ! Ni seliya dɔ tɛɛ vɛ dila min tɛɛ se niimaya dila, wo vɛ kɛla, telenmandeya tɛɛ sɔlɔnne ka bɛn seliya labatoko ma.

²² Kɛɛ a sɛvɛnin kitabu kɔnɔ ko dunuɲa bɛ yi julumbu ya fanga le kɔlɔ. Wo le y'a ma, Ala na ko min lahedi tala, wo yi dile limaniyamɔɔlu ma ka bɛn aiya limaniya ma Masa Tɔɔmasenin Isa ma.

²³ Jani limaniya waate tɛɛ se, mɔ tɛɛ seliya ya jɔnya le lɔ. Mɔ ka to wo boloɲa ma limaniya makɔnɔna min natɔ bɔla gbɛ la.

²⁴ Wo ma, seliya tɛɛ mɔ kunmafɛlɛnba le le haan fɔɔ Masa Tɔɔmasenin tɛɛ na, alako mɔ tɛɛ jate telenmande le Ala ɲakɔlɔ ka bɛn limaniya ma.

²⁵ Kɛɛ komi limaniya waate vɛ se, wo lɔ, mɔ tɛ kunmafɛlɛnba wo fanga kɔlɔ butu.

²⁶ Kamasɔlɔn ài bɛ yi Ala den ne le ka bɛn limaniya ma Masa Tɔɔmasenin Isa ya kafonɲɔɔya lɔ.

²⁷ Àilu minu vɛ makoli sɔlɔn ka don Masa Tɔɔmasenin ya kafonɲɔɔya lɔ, ài vɛ ài masili Masa Tɔɔmasenin kɛɲa la iwo faani.

²⁸ Wotɛbɔli tɛ Jahudiya ni siboloma gbɛlɛ mɔɔlu wotɛ, niwotɛ jɔn ni hɔlɔlu, niwotɛ kɛ́ ni mosolu, kamasɔlɔn ài bɛ yi kelen ne le Masa Tɔɔmasenin Isa ya kafonɲɔɔya lɔ.

²⁹ Ni ài ka kɛ Masa Tɔɔmasenin ta le, wo vɛ kɛla, Ibulahima bɔzɔn ne ài le. Ado Ala na lahedi min tala Ibulahima yɛ, ài y'ài ta sɔlɔnne lahedi wo lɔ.