Filipikalu 1 - Ala Ya Salatikan Kula Kitabu

¹ Ǹe Pɔli ni Timote le yi lɛtɛlɛ min sɛvɛla, ǹu minu kɛnin Masa Tɔɔmasenin Isa ya bɔiden ne. M'a lataala mumininnu ma minu kafonnin Masa Tɔɔmasenin Isa kɔkan Filipi so kɔnɔ, ani limaniyajama kunmafɛlɛnbalu ni ai makoɲabɔbalu.

² Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Pɔli ya Aladali limaniyamɔɔlu yɛ

³ M̀'ɛ m̀ milila ài ma waate o waate, ǹ'i balika bɔla ǹ Tii Ala yɛ.

⁴ Ado m̀'ɛ kɛla Ala dalila ài yɛ kotan, ǹ'i wo kɛla sawa bolo le ma,

⁵ kamasɔlɔn ài na kafonna ǹ kɔkan Samakan Kein lasenko lɔ, ka damina lon kunfɔlɔ ma haan fɔɔ ka na sii bi la.

⁶ Ǹ layine a la bubale ko Ala min na baale ɲuma daminala ài josokun nɔ, a kɛtɔ tola a la haan fɔɔ a v'a dafala Masa Tɔɔmasenin Isa nalon na.

⁷ Ado ǹ jo le a lɔ ka m̀ mili tan ka bɛn ài ma, kamasɔlɔn àiya ko gbaanyine ǹ josokun na. Kamasɔlɔn àilu le ǹ lankan ne Ala ya nɛɛma lɔ, m̀'ɛ kɛla kaso la, niwotɛ m̀'ɛ ǹ lɔla Samakan Kein kɔ kɔlɔ k'a lasawati.

⁸ Ala le ǹ sele le k'a fɔ ko ài lɔɔ yi gbala ǹ na teme ka bɛn Masa Tɔɔmasenin Isa ya kanundeya ma.

⁹ Ǹ'i Ala dalila ài yɛ fɔsa àiya ɲɔɔkanu yi to walala lɔnni ni koɲaye dafanin boloma,

¹⁰ fɔsa ài yi se kobɛlɛ ni koyon wotɛbɔla. Wo vɛ kɛla, ài kɛtɔ mɔɔ sɛnɛyanin ni jalakibali le le Masa Tɔɔmasenin ya lon na,

¹¹ k'ài dafa telenmandeya tɔnɔ la min yi nala Masa Tɔɔmasenin Isa fɛ, fɔsa buɲali ni tanuli yi kɛ Ala yɛ.

Niimaya yi sɔlɔnna Masa Tɔɔmasenin ne fɛ

¹² M̀ badenmalu, ǹ'a fɛ ài y'a lɔn ko tɔlɔya min na m̀ masɔlɔnna, wo le kɛnin sabu le ka Samakan Kein lataa ɲafɛ.

¹³ Jamanatii ya bon lakanalibalu ani jan mɔɔ tɔ bɛ k'a lɔn ko ǹ silinin jɔlɔkɔ le ka bɛn Masa Tɔɔmasenin ya ko ma.

¹⁴ Ado ǹa kasolabilako vɛ kɛ sabu le, mɔ badenma fanba josola vɛ gbeleya mɔ Tii ya ko lɔ. Ai do yi Ala kumakan lasena wakali boloma ka timin a kunfɔlɔ ta la, ai tɛ siyanna.

¹⁵ Tuɲa le, a dɔlu yi Masa Tɔɔmasenin ya ko lasena keleya ni ɲangbeya boloma, kɛɛ a dɔlu y'a kɛla josolɔgbɛya le lɔ.

¹⁶ Dɔ minu do yi kawanili kɛla ka bɛn kanundeya le ma, kamasɔlɔn ai k'a lɔn ko m̀ bilanin kaso la jan, fɔsa ǹ'i ǹ lɔ Samakan Kein kɔ kɔlɔ.

¹⁷ Kɛɛ dɔ wolu tɛ Masa Tɔɔmasenin ya ko lasena josolɔgbɛya lɔ, mafɔ jɛlɛlafisaya. Ai y'ai milila ko a dɔ yi la ǹa tɔlɔya kɔkan kaso la.

¹⁸ Kɛɛ wo tɛ ko le. Min yi kobɛlɛ le, wo le fɔ Masa Tɔɔmasenin ya ko la yi se ɲa o ɲa ma dein. Ni ko wo ka kɛ dailu yon ne niwotɛ dailu bɛlɛ, ǹ sawayine wo bɛ lɔ. Ado ǹ totɔle sawala kudein,

¹⁹ kamasɔlɔn ǹ k'a lɔn ne ko ka bɛn àiya Aladalilu ma, ani madɛmɛli min kɛtɔ nala Masa Tɔɔmasenin Isa Nii Sɛnɛyanin fɛ, ko wolu laban ne kɛtɔ kɛla ǹa kisiko sabu le.

²⁰ Ǹ jii y'a ma le bubale ko foi tɛnala kɛla ǹa maloyako le, mafɔ m̀ wakalinin totɔ feu tandainɔ ani waate bɛ, fɔsa ǹ'i Masa Tɔɔmasenin buɲa ǹ falikolo bɛ le, ǹa niimaya lɔ, niwotɛ ǹa saya lɔ.

²¹ Kamasɔlɔn ǹ'i ǹ nii la Masa Tɔɔmasenin ne yɛ, ni do ǹ ka sa, wo yi nafa le le ǹ yɛ.

²² Ni ǹ ka to ǹ nii la ǹ falikolo lɔ, ǹ'i sene ka baale nafata dɔ kɛ. Wo lɔ, ǹ'i min ta ko fila minu lɔ, m̀ ma wo lɔn!

²³ Ǹ lɔgbɛnɛnin ko fila minu wotɛ. A do lɔɔ yi ǹ na ka bɔ dunuɲa ka taa Masa Tɔɔmasenin fɛlɔ, kamasɔlɔn wo le fisanin bubale!

²⁴ Kɛɛ ka bɛn àiya ko ma, a fisayayine ǹ'i to dunuɲa.

²⁵ Komi ǹ lanin wo le la, wo lɔ, ǹ k'a lɔn ne ǹ kɛtɔ tola ǹ nii la ka kɛ a dɔ kafonna àiya limaniya kɔkan ani aiya sawa kɔkan limaniya lɔ.

²⁶ Wo vɛ kɛla, m̀'ɛ ǹ kɔseila ài fɛlɔ, ǹa ko y'ài ɲalɔkɛnɛyale ka timin a kunfɔlɔ ta la Masa Tɔɔmasenin ya kafonɲɔɔya lɔ.

²⁷ Kɛɛ fɔ ài taamaɲa yi bɛn Masa Tɔɔmasenin ya Samakan Kein ma. Wo vɛ kɛla, ǹ ka na ài fɛlɔ o, m̀ ma na ài fɛlɔ o, ǹ kɛtɔ a mɛnna ko ài lɔnin kili miliya kelen nɔ, ka sɛɛ kɛ i ɲɔɔ fɛ ka bɛn Samakan Kein ma limaniya lɔ.

²⁸ Ài kà diɲa ài juulu y'ài masiyan ko foi lɔ. Wo le kɛtɔ kɛla ài juulu halakiko tɔɔmase le, ani àiya kisiko tɔɔmase ka bɔ Ala fɛ.

²⁹ Kamasɔlɔn Ala ya nɛɛma ma kɛ ài yɛ k'a fɔ ko ài yi limaniya Masa Tɔɔmasenin ma dein, mafɔ ài yi tɔlɔya masɔlɔn fana ka bɛn a ma,

³⁰ ài vɛ sɛɛ kelen wo kɛla, ài na ǹ yena min nɔ kɔlɔman ne, ani ài y'a mɛnna ko ǹ'i min nɔ bi.