3 Yohana 1 - Ala Ya Salatikan Kula Kitabu

¹ Ǹe min yi limaniyajama ɲamɔɔ le, ǹ'i lɛtɛlɛ min lataala ǹ diyananmɔɔ Gayusi le ma, ǹ'i min kanula bɛlɛbɛlɛ kɛ.

² Ǹ diyananmɔɔ, ǹ'i Ala dalila fɔsa iya ko bɛ la yi sawati, ani i kɛnɛyanin yi to, iwo i josokun kɛnɛyanin teme.

³ Ǹ ka sawa bubale, mɔ badenma dɔlu ka na waate min nɔ ka seleya di ka bɛn i bolo kɛɲa ma tuɲa la, ani i taamaɲa ka bɛn tuɲandeya ma.

⁴ K'a mɛn ko ǹ dennu yi taamana ka bɛn tuɲandeya ma, foi tɛ ǹ lasawala ka timin wo la.

Matɔɔli ka bɛn Gayusi ma

⁵ Ǹ diyananmɔɔ, i yi ko ko si kɛla mɔ badenma minu yɛ, hali i ma minu lɔn, wolu bɛ iya lanandeya jiyala.

⁶ Ai ka seleya di limaniyajama ɲakɔlɔ ka bɛn iya kanundeya ma. Ni i k'ai madɛmɛn aiya taama lɔ boloɲa dɔ ma min yi kɛ Ala buɲako le, wo yi bɛnne feu.

⁷ Kamasɔlɔn ai yi taama min na Masa Tɔɔmasenin tɔɔ le lɔ. Ai do tɛ ai bolo siila limaniyabalilu ya madɛmɛlifen foi kɔlɔ.

⁸ Wo ma, ǹu le ka kan ka mɔ bolo sii mɔɔ suu wolu kɔlɔ, fɔsa m'i kɛ ai baalekɛɲɔɔ le tuɲa lasenko lɔ.

Diyotɛlɛfu ni Demetiliyusi

⁹ Ǹ na sɛvɛ dɔ lataala limaniyajama ma, kɛɛ do, Diyotɛlɛfu min yi ɲamɔɔya ɲaɲininna, wo mako pa tɛ mɔ la.

¹⁰ Wo le y'a ma, m̀'ɛ sena je, ǹ kɛtɔ a kɛkolu labɔla gbɛ la, a yi mɔ mafinna teme kuma yonnu le. Komi wo tɛ a wasala, wo le y'a kɛla, a bannin mɔ badenmalu jiyako ma, ani a vɛ dɔlu dansiila minu y'a fɛ ka lona wolu jiya, hali a vɛ ai gbɛnna limaniyajama tɛma!

¹¹ Ǹ diyananmɔɔ, i k'i bila koyon fɛ, mafɔ koɲuma. Mɔɔ min yi koɲuma kɛla, wo tii yi Ala ta le le. Kɛɛ mɔɔ min yi koyon kɛla, wo tii ma Ala lɔn feu.

¹² Demetiliyusi vɛ seleyakan ɲuma sɔlɔn, mɔɔ bɛ yi min fɔla. Hali tuɲa gbu diɲanin wo ma. Ǹu gbu yi maa seleyakan lala wo kɔkan, ado i k'a lɔn ko maa seleyakan yi tuɲa le le.

Folikan laban

¹³ Ko siyama le tɛɛ ǹ fɛ k'a fɔ i yɛ, kɛɛ ǹ t'a fɛ ka wo bɛ kɛ sɛvɛ ni kala le.

¹⁴ Ǹ jii yi ǹ nako ma i fɛlɔ jona, ado mɔ kɛtɔ kumala ɲa ni ɲa.

¹⁵ Ala i josolajii. Mɔ tɔvalu i fola. I yi mɔ tɔva kelenkelenna bɛ fo ǹ yɛ.