2 Yohana 1 - Ala Ya Salatikan Kula Kitabu

¹ Ǹe min limaniyajama ɲamɔɔ le, ǹ'i lɛtɛlɛ min lataala m̀ badenmamoso ma, Ala na min tala ka kɛ a ta le, ani a dennu, ǹ'i minu kanula bɛlɛbɛlɛ kɛ. Ǹe kelen do ma ai kanu, mafɔ mɔɔ minu bɛ ka tuɲa lɔn fana,

² kamasɔlɔn tuɲa yi mɔ josokun nɔ, a do totɔle mɔ fɛ kudein.

³ Mɔ Fa Ala ni a Denkɛ Masa Tɔɔmasenin Isa yi nɛɛma kɛ mɔ yɛ, ka hena mɔ la, ka mɔ josolajii, tuɲandeya ni kanundeya lɔ.

Tuɲandeya ni kanundeya

⁴ M̀'ɛ sawa bubale, kamasɔlɔn ǹ na i den dɔlu talanna taamana tuɲandeya lɔ, iwo mɔ na jamali sɔlɔnna mɔ Fa la teme.

⁵ Ǹ diyanan badenmamoso, ǹ'i min fɔla i yɛ yi ne lɛtɛlɛ min nɔ, wo tɛ jamali kula le, mafɔ mɔ na min sɔlɔnna ka ta a damina ma, ko ài m'i ɲɔɔ kanu.

⁶ Ǹ'i kanundeya min ya ko fɔla yi ne, wo kɔlɔ le ko fɔ m'i Ala ya jamalilu latelen iwo ài n'a mɛnna teme ka ta a damina ma. Wo lɔ, fɔ ài yi taama kanundeya le lɔ.

⁷ Mɔɔlafilibalu vɛ siyaya dunuɲa yi ne, minu tɛ diɲala k'ai lɔ a la ko Masa Tɔɔmasenin Isa nanin dunuɲa mɔɔnivin falikolo lɔ. Mɔɔ suu wolu yi mɔɔlafiliba le le, ani Masa Tɔɔmasenin kɛlɛkɛɲɔɔ.

⁸ Wo ma, ài y'ài jando ài jɛlɛ lɔ, fɔsa ài kana bɔnɔ ài sɛyɛnɔ la, mafɔ ài àiya balayi dafanin wo sɔlɔn.

⁹ Ni mɔɔ mɔɔ ka taa a kunfɛ, a ma to Masa Tɔɔmasenin ya kalan kɔkan, wo vɛ kɛla, wo tii tɛ Ala ta le. Kɛɛ do, ni mɔɔ min ka to Masa Tɔɔmasenin ya kalan kɔkan, wo tii yi mɔ Fa ni a Denkɛ ta le le.

¹⁰ Ni mɔɔ dɔ ka na ài fɛlɔ min ya kalan bɛnnin tɛ min ma, ài kà wo tii ma jiya, kumatɛ k'a fo,

¹¹ kamasɔlɔn ni mɔɔ mɔɔ k'a fo, wo tii v'a fɛ bila a kɛko yonnu la.

Folikan laban

¹² Kuma siyama yi ǹ fɛ k'a fɔ ài yɛ, kɛɛ ǹ t'a fɛ ka wo bɛ kɛ sɛvɛ ni kala le. Ǹ'a fɛ ǹ'i taa ài fɛlɔ ka kuma ài fɛ ɲa ni ɲa, fɔsa maa kɔnɔlɔdiya da yi fa.

¹³ Ala na i badenmamoso min tala ka kɛ a ta le, wo dennu i fola.