2 Timote 1 - Ala Ya Salatikan Kula Kitabu

¹ Ǹe Pɔli le yi lɛtɛlɛ min sɛvɛla, ǹe min kɛnin Masa Tɔɔmasenin Isa ya keladen ne ka bɛn Ala sawo ma, ani ka bɛn niimaya lahedi ma, niimaya min yi sɔlɔnna Masa Tɔɔmasenin Isa ya kafonɲɔɔya lɔ.

² Ǹ'i lɛtɛlɛ min lataala ile Timote le ma, ǹ diyanan den. Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ i yɛ, ka hena i la, ani k'i josolajii.

Pɔli ya balikabɔ Ala yɛ ka bɛn Timote ma

³ M̀'ɛ kɛla Ala dalila waate o waate, ǹ hangili yi tola i lɔ su ni tele. Ado ka bɛn iya ko ma, ǹ'i balika bɔla Ala yɛ, ǹ'i baale kɛla min yɛ jososɛnɛyanin boloma iwo m̀ bemanu tɛɛ a kɛla teme.

⁴ Ǹ hangili toyine iya kasi lɔ mɔ falan waate i ɲɔɔ ma, ado i yenlɔɔ yi ǹ na kosɛvɛ fɔsa ǹ josola yi fa sawa le.

⁵ Ǹ hangili toyine iya limaniya bɛlɛbɛlɛ lɔ, min ɲɔɔzii tɛɛ i mama Loyise ni i ba Yunise bolo kunfɔlɔ le, ado ǹ layine a la ko limaniya kelen wo le yi ile fana bolo hali bi.

⁶ Wo le y'a kɛla, ǹ'i hangili bilala k'a fɔ ko i yi Ala ya senko labaale a ɲa gbugbu ma, i na min sɔlɔnna ǹa bololankan sabu la.

⁷ Kamasɔlɔn Ala na Nii Sɛnɛyanin min dila mɔ ma, wo tɛ mɔ kɛla jiitɔ le feu, mafɔ a yi fanga le dila mɔ ma, ani kanundeya, ani jɛlɛlɔmina.

⁸ Wo le y'a ma, i kà maloya ka bɛn mɔ Tii ya seleya diko ma, niwotɛ ǹa ko ma, hali ǹ'i kaso le la yi ne ka bɛn aa ko ma. Kɛɛ fɔ i fɛ yi kɛ ǹa tɔlɔyalu la ka bɛn Samakan Kein ya ko ma, Ala fanga sabu la,

⁹ min na mɔ lakisila, ka mɔ kili ka mɔ kɛ aa mɔɔ sɛnɛyaninnu le. Wo do ma kɛ ka bɛn mɔ kɛkolu ma, mafɔ a jɛlɛkanu ya kolatɛɛnin ma, ani aa nɛɛma min dinin mɔ ma Masa Tɔɔmasenin Isa ya kafonɲɔɔya lɔ, jani dunuɲa tɛɛ dan.

¹⁰ Tandainɔ, nɛɛma wo la vɛ nkɛnɛmaya ka bɛn mɔ Lakisiba Masa Tɔɔmasenin Isa nako ma, min na see sɔlɔnna saya ma k'a fanga bɔ a bolo, ka niimaya banbaliko labɔ gbɛ la Samakan Kein sabu la.

¹¹ Ala na ǹ lɔla ka ǹ kɛ Samakan Kein min kawanilikɛba le le, ani keladen, ani kalanmɔɔ.

¹² Wo le n'a kɛla, tɔlɔya min bɛ na m̀ masɔlɔnna. Kɛɛ wo maloya tɛ ǹ na, kamasɔlɔn ǹ ka ale lɔn, ǹ limaniyanin ale min ma. Ado ǹ layine a la feu ko a na ko min kalifala ǹ na, a see y'a yɛ ka wo lakana haan fɔɔ a nalon.

¹³ Ǹa misali ta ka bila kuma sɔvɛlu kɔ, i na minu mɛnna ǹ da, ka kɛ taamana limaniya ni kanundeya boloma Masa Tɔɔmasenin Isa ya kafonɲɔɔya lɔ.

¹⁴ Kalan ɲuma minu kalifanin i la, i yi wolu lakana Nii Sɛnɛyanin sabu la, min sawatinin mɔ josokun nɔ.

¹⁵ I k'a lɔn ne ko limaniyamɔɔ minu yi Esiya koovi lɔ, wolu bɛ vɛ ai kɔdon ǹ na, Fijɛli ni Helimojɛni bɛlɛbɛlɛ le.

¹⁶ Mɔ Tii yi hena Onesifɔli ya bonnamɔɔlu la, kamasɔlɔn a vɛ ǹ sɛmɛdon siɲa siyama le. A do ma maloya ǹa ko lɔ, hali ǹ silinin ka kɛ jɔlɔkɔ la yi ne.

¹⁷ A se Lɔmu so kɔnɔ, a ka to ǹ dingila ɲininna haan fɔɔ a ka ǹ ye.

¹⁸ Mɔ Tii yi hena a la kiyamalon. Ile gbu k'a lɔn ne feu a na ko minu bɛ kɛla ǹ yɛ Ɛfɛsi so kɔnɔ.