2 Piyɛli 1 - Ala Ya Salatikan Kula Kitabu

¹ Ǹe Simɔn Piyɛli le yi lɛtɛlɛ min sɛvɛla, ǹe min yi Masa Tɔɔmasenin Isa ya bɔiden ni aa keladen ne. Ǹ'a lataala àilu le ma minu vɛ limaniya kulugbɛlɛn sɔlɔn iwo ǹu, ka bɛn mɔ Tii Ala ni Lakisilikɛba Masa Tɔɔmasenin Isa ya telenmandeya ma.

² Nɛɛma ni josolajii yi kɛ ài yɛ kosɛvɛ ka bɛn Ala ni mɔ Tii Isa lɔnko ma.

Ala na limaniyamɔɔlu kilila baale min kanma

³ Aa foniseleya vɛ wo bɛ di mɔ ma, mɔ mako yi minu la niimayakɛko ni Ala ya siya lataamanko lɔ, ka bɛn a lɔnko ma mɔ bolo, ale min na mɔ kilila a jɛlɛkanu ya magbiliyali ni aa ɲumaya fɛ.

⁴ Ka bɛn ko wolu ma, a na lahedi kulugbɛlɛn babalu tala mɔ yɛ, fɔsa lahedi wolu fɛ, ài yi kisi ka bɔ dunuɲa kolɔtiɲalu lɔ minu yi nala niikanuko yonnu fɛ, ani ài y'ài ta sɔlɔn Ala ya foniseleya lɔ.

⁵ Ka bɛn wo gbugbu ma, ài y'ài lɔja ka ɲumaya la àiya limaniya kɔkan, ka lɔnni la àiya ɲumaya kɔkan,

⁶ ka jɛlɛlɔmina la àiya lɔnni kɔkan, ka sawali la àiya jɛlɛlɔmina kɔkan, ka Alaɲasiyanɲɛ la àiya sawali kɔkan,

⁷ ka badenmaya la àiya Alaɲasiyanɲɛ kɔkan, ani ka kanundeya la àiya badenmaya kɔkan.

⁸ Ni dajoo minu ka to ài la, ani k'ai sawati ài lɔ, ài tɛnala kɛla mɔɔ fofo ni nafandan ne mɔ Tii Masa Tɔɔmasenin Isa lɔnko lɔ.

⁹ Kɛɛ ni mɔɔ min dɛsɛnin ka kɛ ko minu la, wo tii tɛ yeni kɛla kosɛvɛ, a do yi ɲagbɛ le le, kamasɔlɔn a vɛ ɲina ko a la vɛ sɛnɛya ka bɔ aa julumbu kɔlɔlu ma.

¹⁰ Wo le y'a ma, m̀ badenmalu, Ala n'ài kilila k'ài ta ko min kanma, ài y'ài lɔgbeleya k'a dɔ la wo kɔkan. Ni ài do ka wo kɛ, ài sen tɛnala tuula tuun k'ài ben.

¹¹ Wo boloɲa ma, siya yi dile ài ma feu ài donko lɔ mɔ Tii ni mɔ Lakisiba Masa Tɔɔmasenin Isa ya habadan masaya lɔ.

¹² Wo le y'a ma, ǹ totɔle ài hangili bilala ko minu lɔ kudein, hali ni ài bannin ka kɛ ai lɔnna ani k'ài bama tuɲa lɔ, ài na min sɔlɔnna.

¹³ Damanda ǹ'i falikolo min nɔ, a bɛnyine ǹ ɲana ǹ'ài hangili bila ko minu lɔ.

¹⁴ Kamasɔlɔn ǹ k'a lɔn ne ko a lɔ tɛnala mɛnna butu, ǹ kɛtɔ ǹ falikolo bilala, iwo mɔ Tii Masa Tɔɔmasenin Isa n'a lagbɛla ǹ yɛ teme.

¹⁵ Wo lɔ, ǹ kɛtɔ ǹ senko bɛ le kɛla, fɔsa ǹ taa kɔ, ài hangili yi to ko minu lɔ kudein.

Sele minu ka Masa Tɔɔmasenin nɔɔlɔ ye

¹⁶ Mɔ n'ài lalɔnnila mɔ Tii Masa Tɔɔmasenin Isa nalon makawanin na waate min nɔ, mɔ bolomalanin tɛɛ tɛ tali fuunnu ma, mɔ na minu lɔbɛnna mɔ kunfɛ kewuya boloma, mafɔ ǹu gbu le na kɛla sele le ka mɔ ɲa la a nɔɔlɔ kɔkan.

¹⁷ Kamasɔlɔn a na buɲa ni magbiliyali sɔlɔnna mɔ Fa Ala la waate min nɔ, kumakan dɔ ka bɔ Masa Fonisele fɛ k'a fɔ a yɛ, a vɛɛ: «Ǹ diyanan Denkɛ le ne, min yi ǹ kɔnɔlɔdiyala bubale.»

¹⁸ Ǹu gbu ka kumakan wo mɛn ka bɔ sangbolo lɔ, mɔ tɛɛ a dafɛ lɔhɔlɔma tini kɔkan waate min nɔ.

¹⁹ Wo le y'a ma, mɔ layine bubale kuma wo la min fɔnin kelalu bolo. A do yi bɛnne ni àilu fana k'ài hangili to wo lɔ, iwo fitina min yi mɛnɛnna divi lɔ, haan fɔɔ dusa yi gbɛ ani sɔɔmadala loloni ya kɛnɛya yi bɔ ài josokun nɔ.

²⁰ Kɛɛ ài y'a lɔn kunfɔlɔ le ko kelayakuma minu sɛvɛnin kitabulu kɔnɔ, mɔɔ suu suu tɛ se wolu kɔlɔ lɔnna a jɛlɛ ma.

²¹ Kamasɔlɔn kelayakuma foi ma bɔ adamaden sawo lɔ feu, mafɔ mɔɔlu ka Ala kumakannu fɔ iwo Nii Sɛnɛyanin k'ai lɔ a la teme.