1 Yohana 2 - Ala Ya Salatikan Kula Kitabu

Masa Tɔɔmasenin ne mɔ makofɔba le

¹ Ǹ dennu, ǹ'i ko minu sɛvɛla ài ma fɔsa ài kana julumbu ta. Kɛɛ ni mɔɔ dɔ ka julumbu ta, mɔ makofɔba yi mɔ Fa le fɛlɔ. Wo le Masa Tɔɔmasenin Isa le, min telennin.

² Ale le na kɛla julumbu lɔkoto salaka le mɔ yɛ. A do ma dan maa julumbulu ma dein, mafɔ dunuɲamɔɔlu bɛ ta.

³ Ni mɔ ka Ala ya jamalilu labato, m'a lɔnna wo le fɛ ko mɔ ka a lɔn.

⁴ Ni mɔɔ min k'a fɔ ko a ka Ala lɔn, k'a talan a tɛ aa jamalilu labatola, wo vɛ kɛla, faɲafɔba le wo tii le, ado tuɲa tɛ wo tii josokun nɔ.

⁵ Kɛɛ mɔɔ min y'a kumakan labatola, Ala ya kanundeya da vɛ fa wo tii josokun nɔ bɛlɛbɛlɛ kɛ. Mɔ do y'a lɔnna min ne ma ko m'i Ala ya kafonɲɔɔya lɔ:

⁶ Mɔɔ min y'a fɔla ko a yi Ala ya kafonɲɔɔya lɔ, fɔ wo tii yi taama iwo Isa gbu tɛɛ taamana teme.

Jamali kula

⁷ Ǹ diyananmɔɔlu, ǹ tɛ jamali kula sɛvɛla ài ma, mafɔ jamali kɔlɔ, ài na min sɔlɔnna ka ta a damina ma. Ài na kuma min mɛnna kɔlɔkɔlɔ le, wo ni jamali min yi kelen ne le.

⁸ Wo bɛ n'a kɛ, ǹ'i jamali kula le sɛvɛla ài ma, Isa taamaɲa ni ài taamaɲa yi min jiyala k'a fɔ ko tuɲa le, kamasɔlɔn divi tununtɔle, ado kɛnɛya bɛlɛbɛlɛ vɛ bɔ butu.

⁹ Ni mɔɔ min k'a fɔ ko a yi kɛnɛya le lɔ, k'a talan a a badenma lagbeyaɲɛla, wo tii yi divi le lɔ hali bi.

¹⁰ Mɔɔ min do y'a badenma kanula, wo tii yi taamana kɛnɛya le lɔ. A tɛnala kɛla sabu le k'a mɔɔɲɔɔ kunnɔtɛɛ.

¹¹ Kɛɛ mɔɔ min y'a badenma lagbeyaɲɛla, wo tii yi divi le lɔ. A do yi taamana divi le lɔ. A m'a taaya lɔn, kamasɔlɔn divi v'a ɲa gbɛ.

¹² Dennilu, ǹ'i min sɛvɛla àilu le ma, kamasɔlɔn àiya julumbulu lɔ vɛ koto ka bɛn Isa tɔɔ ma.

¹³ Falu, ǹ'i min sɛvɛla àilu le ma, kamasɔlɔn ale min yi je ka ta dunuɲa damina waate ma, ài ka a lɔn. Kavelennu, ǹ'i min sɛvɛla àilu le ma, kamasɔlɔn ài vɛ see sɔlɔn Soitana ma.

¹⁴ Dennilu, ǹ'i min sɛvɛla àilu le ma, kamasɔlɔn ài ka mɔ Fa lɔn. Falu, ǹ'i min sɛvɛla àilu le ma, kamasɔlɔn ale min yi je ka ta dunuɲa damina waate ma, ài ka a lɔn. Kavelennu, ǹ'i min sɛvɛla àilu le ma, kamasɔlɔn ài sɛmɛdonnin, ani Ala kumakan sawatinin ài josokun nɔ, ài do vɛ see sɔlɔn Soitana ma.

Dunuɲa kanuko

¹⁵ Ài kà dunuɲa kanu, kumatɛ a kɔnɔlɔkolu ma. Ni mɔɔ min ka dunuɲa kanu, mɔ Fa ya kanundeya tɛ wo tii josokun nɔ.

¹⁶ Kamasɔlɔn ko min bɛ yi dunuɲa kɔnɔ: falikolo niikanukolu o, ɲakulanindeyakolu o, ani fentiiya waso, wo dɔ pa tɛ bɔla mɔ Fa fɛ, dunuɲa ta le wo bɛ le.

¹⁷ Dunuɲa tununtɔle, ani a kɔnɔlɔ niikanukolu, kɛɛ mɔɔ min yi Ala sawo kɛla, wo tii yi niimaya kɛle kudein.

Masa Tɔɔmasenin kɛlɛkɛɲɔɔ

¹⁸ Ǹ dennu, dunuɲa laban waate ma vɛ sulunya. Ài n'a mɛnna ko Masa Tɔɔmasenin kɛlɛkɛɲɔɔ natɔ, ado tandainɔ yi ne, Masa Tɔɔmasenin kɛlɛkɛɲɔɔ siyama vɛ ban nala. Wo le n'a kɛla, mɔ k'a lɔn dunuɲa laban waate ma vɛ sulunya.

¹⁹ Mɔɔ wolu bɔnin mɔ tɛma le, kɛɛ ai fɛ tɛɛ tɛ mɔ la, kamasɔlɔn ni ai tɛɛ kɛ mɔ dɔ le, ai tɛɛ tole mɔ fɛ. Kɛɛ komi ai vɛ bɔ mɔ fɛ, wo v'a lagbɛ ko ai suu suu fɛ tɛɛ tɛ mɔ la.

²⁰ Kɛɛ àilu koni vɛ Nii Sɛnɛyanin sɔlɔn, Ala ya Mɔɔ Sɛnɛyanin na min lajiila ài kɔkan, wo ma, ài bɛ ka tuɲa lɔn.

²¹ Ni ǹ ka sɛvɛ min lataa ài ma, a tɛ k'a fɔ ko ài ma tuɲa lɔn dɛ! Ài ka tuɲa lɔn, wo le y'a ma, ǹ'a lataala ài ma. Ài do k'a lɔn ne ko faɲa foi tɛ bɔla tuɲa lɔ.

²² Jene yi faɲafɔba le ni a tɛ mɔɔ le min y'a fɔla ko Isa tɛ Masa Tɔɔmasenin ne? Wo tii yi Masa Tɔɔmasenin kɛlɛkɛɲɔɔ le le, min n'i banna mɔ Fa ni a Denkɛ lɔ.

²³ Mɔɔ min n'i banna Denkɛ lɔ, wo tii tɛ a Fa ta le. Ni do mɔɔ min k'a bolo sii Denkɛ kɔlɔ, wo tii fana y'a Fa ta le le.

²⁴ Àilu koni, ài na kuma min mɛnna ka ta a damina ma, ài y'ài lɔja fɔsa wo yi sawati ài josokun nɔ. Ài na min mɛnna ka ta a damina ma, ni wo ka sawati ài josokun nɔ, àilu fana yi sawatile mɔ Fa ni a Denkɛ ya kafonɲɔɔya lɔ.

²⁵ Masa Tɔɔmasenin na lahedi min tala mɔ yɛ, wo le min ne: niimaya banbali.

²⁶ Ǹ'i min sɛvɛla ài ma ka bɛn mɔɔ wolu ya ko le ma, minu y'a fɛ k'ài lafili.

²⁷ Wo bɛ n'a kɛ, Masa Tɔɔmasenin n'ài sɔla a Nii Sɛnɛyanin min sɔ, wo le tonin ài fɛ. Ài mako tɛ kalanmɔɔ la, kamasɔlɔn Nii Sɛnɛyanin gbu y'ài kalanna ko bɛ la. Aa kalan do yi tuɲa le le, faɲa t'a lɔ. Wo le y'a ma, ài yi to aa kafonɲɔɔya lɔ iwo Nii Sɛnɛyanin n'ài kalanna teme.

²⁸ Wo lɔ saa, dennilu, ài yi to Masa Tɔɔmasenin ya kafonɲɔɔya lɔ, fɔsa a la vɛ nkɛnɛmayala lon min na, lanaya yi kɛ mɔ josokun nɔ, ani mɔ kana mɔ majaanya a la maloya boloma.

²⁹ Ni ài k'a lɔn ko telenmande le a le, wo lɔ, ài yi la a la ko mɔɔ min yi taamana telenmandeya lɔ, wo tii vɛ sɔlɔn kula kɛ a bolo.