1 Piyɛli 1 - Ala Ya Salatikan Kula Kitabu

¹ Ǹe Piyɛli min yi Masa Tɔɔmasenin Isa ya keladen ne, ǹ'i lɛtɛlɛ min sɛvɛla Ala ya mɔɔ taninnu le ma minu siinin lonaya lɔ Pɔndu, Galatiya, Kapadɔsiya, Esiya, ani Bitiniya koovilu lɔ.

² Ka bɛn mɔ Fa Ala ya kojatesiininnu ma, a n'ài tala mɔɔlu tɛma kɔlɔkɔlɔ le k'ài kɛ mɔɔ sɛnɛyanin ne Nii Sɛnɛyanin sabu la, fɔsa ài yi kolo Masa Tɔɔmasenin Isa yɛ k'ài lasɛnɛya ka bɛn a jeli bɔnko ma. Nɛɛma ni josolajii la yi sawati ài yɛ bɛlɛbɛlɛ kɛ.

Jeisii ɲɛnɛma

³ Tanuli yi Ala yɛ, min yi mɔ Tii Masa Tɔɔmasenin Isa Fa le! Ka bɛn aa henandeya ba ma, mɔ vɛ sɔlɔn kula kɛ ka jeisii ɲɛnɛma sɔlɔn Masa Tɔɔmasenin Isa lawuliko sabu la ka bɔ saya lɔ.

⁴ Wo ma, Ala yi balayi minu ladalola haijɛnɛ, minu tɛ se tiɲala, niwotɛ ka kɔsɔ, niwotɛ k'a dɔ bɔ ai dalaya la, wolu ladalonin àilu le yɛ,

⁵ àilu minu lakananin Ala ya foniseleya lɔ ka bɛn àiya limaniya ma, fɔsa ài yi kisili sɔlɔn min la kɛtɔ nkɛnɛmayala dunuɲa laban waate.

⁶ Wo le àiya kɔnɔlɔdiya le, hali ni a kɛɲa gbɛlɛ tɛ je, fɔ ài josoma yi kasi waateni kɔlɔ ka bɛn lɔsumali suu bɛ dɔ ma.

⁷ Ko wolu le yi kɛla sabu le k'a jiya ko limaniya bɛlɛbɛlɛ le y'ài bolo, min kulugbeleyanin sanu le, sanu min yi fen tiɲata le, ani min lɔ yi sumala taa bolo. Wo do nafa kɛtɔ kɛla matɔɔli ni magbiliyali ni buɲali le le ài yɛ Masa Tɔɔmasenin Isa lankɛnɛmaya lon.

⁸ Ài ma Isa ye ba bene, kɛɛ ài y'a kanula. Ài do ɲa t'a la yi ne, kɛɛ ài limaniyanin a ma. Wo ma, àiya kɔnɔlɔdiya magbiliyaɲa jate ɲa tɛ se fɔla,

⁹ kamasɔlɔn ài àiya limaniya kɔjavi sɔlɔnna, min kɛnin ài nii lakisiko le.

¹⁰ Kelalu tɛɛ kisiko wo le ɲaɲininna k'a lakɔlɔsi kobɛn, ani ai tɛɛ kelaya kɛla ka bɛn nɛɛma wo ma min ditɔ ài ma.

¹¹ Ai tɛɛ ai lɔjala k'a lɔn ko wolu kɛtɔ kɛla waate min nɔ, ani ai kɛtɔ ɲa min ma, Masa Tɔɔmasenin Nii sabu la min tɛɛ ai josokun nɔ. Kamasɔlɔn wo tɛɛ seleya dila ka bɛn ko minu ma jani ai kɛ waate tɛɛ se, a vɛ ai lalɔnnila ka bɛn Masa Tɔɔmasenin ya tɔlɔya ni aa magbiliyali natɔlu ma.

¹² A do la ka nkɛnɛmaya ai yɛ k'a fɔ ko ai tɛɛ tɛ kelaya kɛla ai jɛlɛ yɛ, mafɔ àilu. Wo lɔ saa, kelalu tɛɛ kumala ka bɛn ko minu ma, àilu gbu vɛ wo ɲɔɔzii le mɛn yi ne Samakan Kein lasenbalu da, minu tɛɛ kawanili kɛla ài yɛ Nii Sɛnɛyanin sabu la, min lajiinin ka bɔ haijɛnɛ. A lɔɔ yi mɛlɛkalu gbu la ka ko wolu ɲaye.

Limaniyamɔɔlu taamaɲa ka kan ka sɛnɛya

¹³ Wo ma yi ne, ài y'ài hangili sii k'ài kɛ jɛlɛlɔminamɔɔlu le. Ài y'ài jei sii nɛɛma wo la kosɛvɛ, min ditɔ ài ma Masa Tɔɔmasenin Isa la vɛ nkɛnɛmayala waate min nɔ.

¹⁴ Àilu den koloninnu, ài kà taama ka bɛn ài niikanuko yonnu ma ài tɛɛ minu lɔ àiya kolɔnbaliya waate lɔ,

¹⁵ mafɔ ài yi sɛnɛya ài kɛkolu bɛ lɔ iwo Ala sɛnɛyanin teme min n'ài kilila.

¹⁶ Kamasɔlɔn Ala n'a fɔla kitabu kɔnɔ, ko: «Ài yi sɛnɛya, kamasɔlɔn ǹ sɛnɛyayine.»

¹⁷ Àiya madailikannu lɔ, ài y'a fɔla Ala ma ko mɔ Fa, ale min yi mɔɔ kelenkelenna bɛ ya kiti tɛɛla telenmandeya boloma ka bɛn ai kɛkolu ma. Wo lɔ saa, ài yi taama Alaɲasiyanɲɛ boloma àiya lonaya waate lɔ dunuɲa min nɔ.

¹⁸ Ài y'a lɔn ko ài kunma ma ka ka bɔ ài bemanu ya namun fuunnu ma fen tiɲata sabu la iwo wɔligbɛ ni sanu,

¹⁹ mafɔ Masa Tɔɔmasenin jeli kulugbɛlɛn min kɛnin iwo saa bolan salaka, fɛɛ tɛ min na, kumatɛ kɔsɔ ma.

²⁰ Wo la tɛɛ vɛ tɛɛ Masa Tɔɔmasenin ma jani dunuɲa tɛɛ dan, kɛɛ a la vɛ nkɛnɛmaya waate laban min nɔ ka bɛn àilu le ma.

²¹ Ale le kɛnin àiya limaniya sabu le Ala ma, min n'a lawulila ka bɔ saya lɔ ka magbiliyali di a ma, fɔsa àiya limaniya ni ài jeisii yi kɛ Ala le.

²² Komi ài vɛ ài jɛlɛ lasɛnɛya ka bɛn tuɲa labatoko ma, fɔsa ài yi se i ɲɔɔ kanula badenmaya ni josolɔgbɛya boloma, wo le y'a ma, ài y'ài ɲɔɔ kanu kosɛvɛ ài josokun bɛ le.

²³ Kamasɔlɔn ài ma sɔlɔn kula kɛ sɛnɛfensi tiɲata sabu la, mafɔ sɛnɛfensi tiɲabali, min kɛnin Ala kumakan ɲɛnɛma le, min yi je kudein.

²⁴ A do sɛvɛnin kitabu kɔnɔ tan ne, ko: «Mɔɔnivinnu bɛ kɛyine iwo bin, ai do dalaya kɛyine iwo bin feele. Bin yi jala, a do feele yi benna,

²⁵ kɛɛ mɔ Tii kumakan yi je kudein.» Kumakan wo yi Samakan Kein ne le, min la ka se ài ma.