Roma 2 - U Maganda A Baheta Ni Jesu-Cristo

Tama u Hatul nu Diyos

¹ Nadid, makay ni kagiyán mo a dapat la a mahatulan i iye a tolay dipo tu kadukássan na. Pero maski hiko a maghatul ay awan ti medahilan. Dipo tu pághatul mo tu iba ay hinatulan mo dán be u sadile mo. Dipo gággimitán mo labe u konna hod a bagay.

² Tukoy tam a makatarungan u hatul nu Diyos tu tolay hide a maggimet ti madukás.

³ Pero ti deya ka a humatul tu iba ni mismo a hiko ay maggimet ti konna hod? Tu palagay mo, makaiwas ka beman tu hatul nu Diyos ni hatulan mo u agum a mággagimitán ti madukás a gággimitán mo labe?

⁴ Oni akala moy beman awan kam parusaan nu Diyos, dipo tunay siya ti bait, mapagpugád sakay mapasensiya? Awan moy beman tukoy a atádden naka ti pagkakataun a magsise sakay magbagu kanya talaga a mabait siya niko?

⁵ Dipo tu kaigáttan ni ulo moye sakay awan págsise ay padággiyán mula u parusa nu Diyos niko, tu aldew a pángpeta nu Diyos tu iyamut na sakay makatarungan a pághatul na.

⁶ Dipo iyatád nu Diyos tu bawat essa u parusa ayun tu ginimet na hide.

⁷ Atádden na ti biyag a awan ti kahád u tolay hide a magsumikap a maggimet ti maganda, a u gusto de ay maalap u karangalan, papure a gábwat tu Diyos sakay biyag a awan ti kamatayan.

⁸ Pero tu agum hide a awan ti áisipán nan u sadile di la sakay umád de a sumunud tu tatahoden nan tu kadukássan ay ipadanas nide nu Diyos u garabi a iyamut na.

⁹ Atanan a tolay a maggimet ti madukás ay parusaan nu Diyos, purumero u Judio hide sakay u bakán hide a Judio.

¹⁰ Pero atádden nu Diyos ti karangalan, papure sakay kapayapaan u atanan a maggimet ti maganda, purumero u Judio hide sakay u bakán a Judio.

¹¹ Dipo pare-pareho u pangileng nu Diyos tu atanan a tolay.

¹² U tolay hide a magkasala a awan makatukoy tu Kautusan ni Moises ay maparusaan, pero u pághatul nide ay bakán a ayun tu Kautusan. Sakay u atanan a magkasala a makatukoy tu Kautusan ay maparusaan labe sakay u pághatul nide ay ayun tu Kautusan.

¹³ Dipo bakán a u magsaneg hide tu Kautusan u ibilang nu Diyos a matuwid nan u sumássunud ti iye hide u ibilang na a awan ti kasalanan.

¹⁴ U Hentil hide ay awan ti tukoy tungkul tu Kautusan. Pero ni maggimet hide ti ayun tu Kautusan ay impeta de a maske awan hide ti tukoy hod ay tukoy de u dapat de a gimitán.

¹⁵ U mágkaganda de a gimet ay mángpeta tu inyutus nu Kautusan ay katoy tu puso de. U konsensiya de u mángpatunay, dipo ni maggimet hide ti madukás ay usigán hide nu konsensiya de sakay ni maggimet hide ti maganda ay tukoy labe nu isip.

¹⁶ Mangyare iye tu aldew a hatulan nu Diyos u atanan a sekreto nu tolay, tu pamamag-itan ni Jesu-Cristo, ayun tu Maganda a Baheta a itáttoldu ko.

U Judio hide Sakay u Kautusan

¹⁷ Nadid, kákkagiyán moy a hikam ay Judio, sakay maniwala kam tu Kautusan sakay ipágmadakál moy u rilasyon moy tu Diyos.

¹⁸ Kákkagiyán moy pa a tukoy moy u kaluuben na sakay tukoy moy u mágkaganda hide a bagay dipo intoldu nikam nu Kautusan.

¹⁹ Sakay tu pangisip mo tu sadile mo ay tagagiya ka tu buhák hide tu katutuhanan sakay demlag ka tu nadiklámman hide ti isip.

²⁰ Sakay dipo hikam u timmanggap tu Kautusan ni Moises ay kákkagiyán moy a tukoy moy dán u atanan, kanya kákkagiyán moy a hikam u tagapagtoldu tu awan hide ti tukoy sakay tagapagtoldu tu anak palla hide ti pákkatukoy tu bagay hide tungkul tu Diyos.

²¹ Táttolduwan moy u agum, pero bakin u sadile moy ay awan moy tolduwan? Mangaral kam kontara tu págtakaw pero bakin mágtakaw kam labe?

²² Sakay ibawal moy u pángngalunya, pero mangalunya kam labe. Maiyamut kam tu diyos-diyosan hide, pero bakin a sumaddáp kam tu templo de para la makapagtakaw tu nágkealay hide tu diyos-diyosan?

²³ Ipágmadakál moy a hod nikam u Kautusan nu Diyos, pero awan moy labe inggagalang u Diyos dipo awan moy sássunudán u kinagi nu Kautusan a dapat a gimitán.

²⁴ Konna tu nesulat tu Kautusan a “U ngahan nu Diyos ay awan igagalang nu bakán hide a Judio dipo nikam.”

²⁵ Hikitam a Judio ay ture dipo sa itod u utus nu Diyos a patunay a hikitam u pinili na a magin tolay na pero awan ti halaga u pagigin ture tam ni awan tam sássunudán u Kautusan na.

²⁶ Ni u hentil a awan nature ay maggimet ti maganda a ayun tu kinagi nu Kautusan, awan beman siya ibilang nu Diyos a ture?

²⁷ Kanya maski hikam a Judio hide sakay nature, patunayan nu bakán hide a Judio a dapat kam a parusaan. Dipo maski awan hide ture sakay awan nide u Kautusan ay sássunudán di labe. Pero hikam a makatukoy tu Kautusan ay lumabag labe ti iye.

²⁸ Dipo bakán a u pagigin Judio oni u pákkature u dahilan para mebilang u essa a tolay a siya ay tolay nu Diyos.

²⁹ U tatahoden a Judio ay u tolay a nabagu u puso tu pamamag-itan nu Ispirito nu Diyos, sakay bakán a dipo nature siya. U papure nikuna ay bakán a gábwat tu tolay nan gábwat tu Diyos.