Roma 16 - U Maganda A Baheta Ni Jesu-Cristo

Nákkumusta ti Pablo tu Taga-Roma hide

¹ Nadid, gusto ko a ipatengge nikam u kapatkákka tam a ti Febe. Nagserbi siya tu grupo nu mánnampalataya hide ti Cencrea.

² Tanggapán moy siya bilang kapatkákka tu Panginoon a konna tu dapat tam a gimitán bilang mátkaka tu Diyos. Tulungan moy siya tu ányaman a kailangan na dipo makpal siya a natulungan sakay essaák dán hod.

³ Ikumustaák moy di Priscila sakay ti Aquila, u katarabahuwan ko hide ni Jesu-Cristo.

⁴ Intaya de u biyag de dipo nikán. Dakál u utang ko nide, sakay bakán la hikán ni awan pate atanan nu mánnampalataya hide a Hentil.

⁵ Ikumustaák moy be tu mánnampalataya hide a nagipun-ipun tu bilay de. Ikumustaák moy be tu mahal ko a amigu a ti Epeneto. Siya u dipalongo a nanampalataya ni Jesu-Cristo tu prubinsiya a Asia.

⁶ Ikumustaák moy be ni Maria, a nagsumikap ti husto para nikam.

⁷ Ikumustaák moy be di Andronico sakay Junia, u kapareho ko hide a Judio sakay nakaguman ko tu piresuwan. Dipalongo pa hide a nagin kristiyano kasera nikán, sakay tukoy-tukoy hide nu apostol hide.

⁸ Ikumustaák moy be tu mahal ko a kaibigan tu Panginoon a ti Ampliato.

⁹ Ikumustaák moy be ni Urbano a kapareho ko a manggagawa ni Cristo, sakay konna be tu mahal ko a amigu a ti Estaquis.

¹⁰ Ikumustaák moy be ni Apeles a essa a matapat a magserbi ni Cristo. Ikumustaák moy be tu sabilay ni Aristobulo,

¹¹ tu kapareho ko a Judio a ti Herodion, sakay tu kákkapatkákka tu Panginoon tu sabilay ni Narsiso.

¹² Ikumustaák moy di Tripena sakay Triposa a mágkasipag hide a manggagawa nu Panginoon. Ikumustaák moy be tu mahal ko a kaibigan a ti Persida. Dakál u netulung na tu gawain nu Panginoon.

¹³ Ikumustaák moy be ni Rupo, a essa a mahusay a tagapaserbi nu Panginoon. Ikumustaák mu be tu ina na a kumán ko dán be a ina.

¹⁴ Ikumustaák moy be di Asincrito, Flegonte, Hermes, Patrobas, Hermas sakay tu kákkapatkákka hide a kaguman de.

¹⁵ Ikumustaák moy be di Filologo, Julia, Nereo sakay tu kapatkákka na a bábbey a ti Olimpas, sakay tu atanan nu kákkapatkákka tu Panginoon a kaguman de hide.

¹⁶ Magkumustaan kam bilang mátkaka ni Cristo, tu pamamag-itan nu malinis a ámmo, kákkumustaán kam nu atanan nu mánnampalataya ni Cristo heeh.

¹⁷ Kákkapatkákka ko hide, magingat kam tu tolay hide a maggimet ti pamágguru-gurupo nikam sakay manggággulo tu pánnampalataya moy. Magtoldu hide kontara tu adal hide a natanggap moy nikame. Kanya iwasan moy hide.

¹⁸ U tolay hide a konna hina ay awan magserbi tu Panginoon Jesu-Cristo, ni awan tu sadile de a hangad. Lállokuwán de la u kulang hide ti karunungan tu pamamag-itan nu mágkagaganda de a pággupos.

¹⁹ Nabaheta dán nu atanan u katapatan tu kássunud moy tu Panginoon, sakay masayaák dipo hina. Pero u gusto ko ay magin malalake kam tu bagay hide a maganda sakay awan ti tukoy tu bagay hide a madukás.

²⁰ U Diyos a pinaggábwatan ni kapayapaan ay adene nadán a puksaán u kapangyariyan ni Satanas tu pamamag-itan moy. Pagpalaán kam nu Panginoon Jesus.

²¹ Ti Timoteo a kaguman ko a magserbi tu Panginoon ay mákkumusta be nikam, sakay di Lucio, Jason sakay ti Sosipatro a kapareho ko hide a Judio.

²² Hikán be ti Tercio a mánampalataya be ay mákkumusta be nikam. Hikán u nagsulat ti iye a sulat ni Pablo.

²³ Kákkumustaán kam be ni Gayo. Hikán a ti Pablo ay náktulos tu bilay na, he be a magipun-ipun u mánampalataya he hide. Kákkumustaán kam be ni Erasto a tusurero nu banuwan sakay tu kapatkákka tam a ti Cuarto.

²⁴ [Pagpalaán kam a atanan nu Panginoon tam a ti Jesu-Cristo. Amen.]

²⁵ Sakay nadid, puriyán tam u Diyos a siya u makapangpatibay tu pánnampalataya moy ayun tu Maganda a Baheta a intoldu ko nikam. U Maganda a Baheta a iye ay tungkul ni Jesu-Cristo, a nelihim tu nalay dán a panahun,

²⁶ pero nadid ay nehayag dán tu atanan a tolay tu pamamag-itan nu insulat nu prupeta hide. Iye ay ayun tu utus nu awan ti kamatayan a Diyos, tánni u atanan nu tolay ay manampalataya sakay sumunud nikuna.

²⁷ Puriyán tam u eessa a Diyos u marunung tu atanan. Puriyán tam siya a hangga-hanggan tu pamamag-itan ni Jesu-Cristo! Amen.