Roma 11 - U Maganda A Baheta Ni Jesu-Cristo

U Kagbi nu Diyos ti Israel

¹ U tanung ko nadid ay: Inadiyan beman nu Diyos u pinile na hide a tolay? Awan! hikán ay Israelita a mismo, gábwat tu lahe ni Abraham sakay kabilang tu lahe ni Benjamin.

² Awan inadiyan nu Diyos u tolay hide a sapul pa tu sapul ay pinile na dán. Awan moy beman tukoy u kinagi na tu Kasulatan tungkul ni Propeta Elias? Dinumaing siya tu Diyos dipo tu gággimitán nu Israelita hide.

³ U kagi ni Elias ay, “Panginoon, binuno di dán u prupeta mo hide sakay hinábba de u págdasalan me niko. Hikán dálla u nabuhay sakay gustuwák di pa a bunuwán.”

⁴ Pero ánya u intábbeg nikuna nu Diyos? Awan dipo tehhod palla a nabuhay a pitto a libu a lállake a awan sinumamba tu diyos-diyosan a ti Baal.

⁵ Konna labe nadid a kasalukuyan, tehhod palla a nabuhay a matapat tu pinile hide nu Diyos, dipo tu habag na.

⁶ Pinile na hide dipo tu habag na, bakán a dipo tu mágkaganda a gimet de hide, dipo ni tu mágkaganda de a gimet ay awan iye mebilang a habag.

⁷ Ánya nadid? Awan natanggap nu Israelita hide u gusto de a mebilang hide nu Diyos a matuwid. U pinile na la hide u nakatanggap ti iye, pero u agum ay pinaigát na u puso-puso de.

⁸ Konna tu nesulat tu Kasulatan, “Ginimet hide nu Diyos a maigát ti pággisipan sakay hanggan nadid ay kumán hide a buhák oni bángngág tu katutuhanan.”

⁹ Kinagi be ni David tungkul nide: U kasayaan de hide nakwa ay siya u magin kumán a sákwat a mang-ekhot nide dipo iye u máng-angay nide tu kapahamakan, kákkasida nu biyag de sakay parusa nide.

¹⁰ Mabuhák nakwa u mata de hide para awan hide maketa sakay nakwa ay magdanas hide ti awan ti kahád a pághirap a konna tu essa a tolay a nagkábbung dán dipo tu dágge nu báklay na.

¹¹ Nesángdul u Judio hide dipo awan hide simmampalataya ni Cristo. U gusto na beman a kagiyán ay tulos dán a mepahamak u Israel? Awan! Pero dipo tu kássuway de ay nagkahod ti pagkakataun u Hentil hide a maligtas. Sakay dipo hod ay sinumene u Judio hide sakay gustuwán di be i kaligtasanan iye.

¹² Nadid, ni u kássuway nu Judio hide sakay u awan de págtagumpay a matanggap u kaligtasan ay nakapangatád ti págpapala tu Hentil hide a tu buo a mundu, sakodya pa wád a kadakál u págpapala a meatád ni makompleto dán u buo a bilang nu Judio hide a manampalataya ni Cristo?

U Kaligtasan nu Judio hide

¹³ Nadid, iye dámman u kagiyán ko nikam a bakán hide a Judio. Ginimiták a apostol nu Diyos para nikam, sakay ikarangal ko i tarabahuwan iye.

¹⁴ Tu pamamag-itan ni iye ay baka sakale la a mapasene ko u kapareho ko hide a Judio tánni sumampalataya u sangan nide sakay maligtas.

¹⁵ Ni u pángpabaya nu Diyos tu Judio hide u nagin dilan tánni sumole nikuna u atanan a tolay ti munduway, awan beman mas lalo a maganda u resulta ni u Judio hide ay huway a tanggapán nu Diyos? Awan beman kumán labe hide a biniyag a huway.

¹⁶ Maare tam a mekompara u Judio hide tu essa a tinapay a inyalay nu Judio hide. Ni nakahandug dán tu Diyos u bahagi nu tinapay, konna labe hod u buo a tinapay. Sakay ni nakahandug dán tu Diyos u gimot nu essa a ponan nu kayo, konna labe hod ay kaguman dán u pinge-pinget na hide.

¹⁷ U Judio hide ay konna tu essa a ponan nu kayo a olibu a kináttol u sangan tu pinget na hide. Sakay hikam a bakán a Judio ay konna tu pinget hide nu olibu a timmubu tu talon a inkabit bilang kapalit tu kináttol a pinget hide. Kanya nakinabang kam tu págpapala nu Diyos a para tu Judio hide.

¹⁸ Pero dyan kam magmadakál a magisip a masmabait kam kasera tu pinget hide a kináttol. Alalahanán moy a pinget kam la, bakán a hikam u mangbiyag tu gimot ni awan u gimot u mangbiyag nikam.

¹⁹ Maare a kagiyán moy a, “Kináttol hide para hikame u mekabit.”

²⁰ Tatahoden ina. Kináttol hide dipo awan hide sumampalataya ni Cristo, sakay hikam ay inkabit dipo nanampalataya kam nikuna. Kanya dyan kam magmadakál, nan magkahod kam ti ánteng.

²¹ Dipo ni nagimet nu Diyos a káttolán u tatahoden a pinget hide, magimet na be a káttolán kam.

²² He tam a ketan u kabaitan nu Diyos sakay ni sakodya siya a kahigpit a maghatul. Mahigpit na a hatulan ti parusa u magkasala hide nikuna. Pero mabait siya nikam ni manatile kam tu kabaitan na, pero ni awan, ay káttulán na kam be.

²³ Sakay ni awan magmaigát u Judio hide nan hide ay sumampalataya, ikabit hide a huway tu ponan, dipo kaya iye a gimitán nu Diyos.

²⁴ Dipo ni hikam a pinget nu olibu a timmubu tu talon ay nekabit tu naalagaan a olibu maski ni awan iye karanyuwan a gággimitán, mas magaan a ikabit a huway nu Diyos u pinget hide a kináttol a gábwat tu date na a ponan.

Kinagbiyan nu Diyos u Atanan

²⁵ Kákkapatkákka ko hide, gusto ko a matukuyan moy u essa a katutuhanan a nadid ko la a ikagi nikam, tánni awan magin mataas u pangisip moy tu sadile moy. U págmaigát nu Judio hide ay pansamantala la, awan habang panahun. Iye ay hanggan a makompleto u bilang nu Hentil hide a manampalataya ni Cristo.

²⁶ Káttapos ni ina, ay maligtas u buo a Israel, konna tu kinagi na tu Kasulatan, “U Tagapagligtas ay gábwat tu banuwan nu Judio hide sakay ibutan na u madukás a gimet tu lahe ni Jacob.”

²⁷ Tu aldew a ibutan ko u kasalanan de, itod dán u katupaden nu pananto ko nide.

²⁸ Dipo inadiyan nu Judio hide u Maganda a Baheta, kanya nagin kadima hide nu Diyos tánni hikam a bakán a Judio ay maatádden ti pagkakataun a maligtas. Pero ni u págpile nu Diyos u págguhunan, mahal pade hide nu Diyos dipo tu ninuno de hide.

²⁹ Dipo u Diyos ay awan magbabagu ti isip tu págpile na sakay págpapala.

³⁰ Tu itod, hikam a bakán a Judio ay masássuwayán tu Diyos, pero nadid ay kinahabagan na kam dipo tu kássuway nu Judio hide.

³¹ Konna labe hod, kagbiyan na u Judio hide maski hide ay masássuwayán, konna tu ginimet na nikam.

³² Kaya atanan a tolay, Judio man oni Hentil, ay pinabayan nu Diyos a manatile hide tu pagkamasássuwayán de para ipeta na nide a atanan u kagbi na.

Papuri tu Diyos

³³ Tunay ti kadakál u kabaitan nu Diyos tu tolay! Awan masukat u karunungan na! Awan tam kaya a intendiyan u plano na sakay pamamaraan!

³⁴ Konna ngane tu kinagi na tu Kasulatan: “Ti deya wád u makaintendi tu isip nu Panginoon? Ti deya wád u makapangpayo nikuna?”

³⁵ Ti deya man a tolay ay awan siya ti mepautang tu Diyos para makagi na a te kailangan a bayaden u Diyos nikuna.

³⁶ Dipo u atanan a bagay ay gábwat nikuna, sakay linalang na iye hide tu pamamag-itan na sakay para nikuna. Puriyán u Diyos a magpakahanggan! Amen.