Mateo 8 - U Maganda A Baheta Ni Jesu-Cristo

Pinagpiyya ni Jesus U Essa a Tolay a te Ketong

¹ Nadid nikuna natapos dán ti Jesus a nagtoldu ay dinumegson siya tu badit a buked. Sakay inunonod siya nu makpal a tolay.

² Tapos ay te bigla a ummadene ni Jesus a essa a tolay a te saket a ketong. Sakay dimmapa u tolay tu atubang ni Jesus a nákkekagbi “Panginoon, ni gustuwán mo ay mapagpiyyaák mo. Pagpiyyaánnák muped.”

³ Kanya kinahap siya ni Jesus sakay kinagi na, “Gusto ta ka a pagpiyyaán. Nadid ay magpiyya ka dán.” Sakay pagdaka a nawan u ketong nu tolay.

⁴ Káttapos kinagi ni Jesus nikuna, “Dyan mo ibaheta iye maski ni ti deya man. Pero angay mu pa ipaileng tu saserdote u nangyari niko. Káttapos, bilang pangpatunay tu tolay hide a nagpiyya ka dán ay mangatád ka nikuna ti iyalay na ayun tu inyutus ni Moises tu itod pa.”

U Pánnampalataya nu Essa a Kapitan nu Sundalo Hide a Taga Roma

⁵ Nadid káddemát ni Jesus tu banuwan a Capernaum ay immadene u essa a kapitan nu sundalo hide a taga Roma sakay nákkekagbi nikuna.

⁶ Sakay kinagi na “Panginoon, u utusan ko a anak ay te katdug dálla tu bilay ko. Awan siya makaahikad. Grabe a tahod u pághirap na. Pagpiyyaán mu ped siya.”

⁷ Timmábbeg ti Jesus “Sige angay ku siya pagpiyyaán.”

⁸ Pero timmábbeg u kapitan, “Panginoon awanák karapatdapat para umangay ka tu bilay ko. Ikagi mu dálla he sakay magpiyya dán siya hod.

⁹ Tukoy ko a magimet mo ina dipo te mas mataas a nangsakup nikán sakay te nasakupanák be. Ni iyutus ko tu essa tu sundalo ko a ‘Angay ka hod,’ ay angay siya a pagdaka. Ni utusan ku be u essa a ‘Angay ka he,’ ay angay be siya a pagdaka. Sakay ni utusan ku be u utusan ko a ‘Gimitán mo iye,’ ay talaga a gimitán na itod. Kaya maski ikagi mu la he ay magpiyya dán siya hod.”

¹⁰ Nikuna nasaneg iye ni Jesus ay nagtaka siya tu kapitan. Sakay kinagi na tu tolay hide a umunonod nikuna “Kagiyán ku nikam a awanák padla naketa ti Israelita a kapareho nikuna a kadakál ti pánnampalataya.

¹¹ Sakay kagiyán ku pa nikam a tu Aldew nu Pághatul ay makpal a tolay a gábwat ti ibaiba a bansa u makaguman nu nunu tam hide a di Abraham, Isaac sakay Jacob tu dakál a handaan ni maghare dán u Diyos.

¹² Pero makpal tu Israelita hide a dapat a mesali ay awan mesali tu handaan. Hod hide a iyangay ti impiyerno. Hod hide a magsanget sakay maghirap a tahod.”

¹³ Sakay kinagi ni Jesus tu kapitan “Maari ka dán a sole tu bilay moy. Nangyari dán u inaged mo dipo naniwala ka.” Sakay nagpiyya ngane u utusan na ti itona be a odas.

Makpal a Pinagpiyya ti Jesus

¹⁴ Nadid nikuna immangay ti Jesus tu bilay ni Pedro ay netan na a te katdug u katugngan a bábbey ni Pedro dipo grabe u ladu na.

¹⁵ Kinahap ni Jesus u kamát na sakay naibut u ladu na. Tulos a inumikat u bábbey sakay sinerbiyan na ti Jesus ti makan.

¹⁶ Nikuna a gibi dán ay inyangay nu tolay hide ni Jesus u makpal hide a hinayup. Essa na la a utos ay pinalakad na u mágkadukás hide a ispirito sakay pinagpiyya na u te saket hide.

¹⁷ Nangyari iye para matupad u hula ni propeta Isaias tu itod a “Siya u nangibut tu sakisaket tam sakay pinagpiyya na kitam.”

U Magduwwaduwwa Hide a Magin Disepulus ni Jesus

¹⁸ Nadid tu essa aldew, nikuna napansin ni Jesus a makpal dán a tahod a tolay a umadene nikuna ay inutusan na u disepulus na hide a iyahabes di siya tu dibilew nu minalno.

¹⁹ Pero bagu hide a nakaahabes ay inadeniyan siya nu essa a maisto nu Kautusan. Kinagi na ni Jesus “Maisto, kumuyugák niko maski hadya u angayan mo. Gusto ko a magin disepulus mo.”

²⁰ Timmábbeg ti Jesus nikuna “U aso ay te págyanan sakay u manok hide ay te lobun pero hikán a Anak nu Tolay ay awan ti bilay a sadili a págkatdugan oni maimangan.”

²¹ Sakay nagtanung u essa pa a disepulus ni Jesus, “Panginoon, gusto ko a kumuyog niko, pero maariyák pa beman a soli tu bilay me tánni ilábbáng ko u ama ko?”

²² Pero tinábbeg siya ni Jesus “Kumuyog ka dán nikán nadid, ipabahala mu dálla u páglábbáng tu awan naniwala tu awan labe naniwala tu Diyos.”

Pinaimang ni Jesus U Mabegsák a Pahás

²³ Káttapos ay sinumakay ti Jesus tu abang sakay u disepulus na hide. Inahabes de u minalno.

²⁴ Tu pággahabes de ay bigla a te dummemát a mabegsák a pahás kanya tinapuhan hide nu tagmák. Pero ti Jesus ay tidug la.

²⁵ Angay siya nilukag nu disepulus na hide sakay kinagi di nikuna “Panginoon tulungan mo kami. Malimás kami.”

²⁶ Timmábbeg siya “Bakin a manteng kam? Dapat a kabadit u pánniwala moy.” Inumikat siya sakay inutusan na u pahás a umimang sakay u tagmák a lumantap. Pagdaka a nasunud u utus na. Nawan u pahás sakay u tagmák.

²⁷ Nagtaka u atanan a hod tu abang sakay namagtanungan hide “Anya a kalase a tolay iye a maski u pahás sakay tagmák ay sumunud nikuna?”

Pinalakad ni Jesus u Demonyo Hide tu Duwwa a Hinayup

²⁸ Nadid nikuna dimmemát hide tu dibilew nu minalno, tu lugar nu taga Gadara hide ay tinagbu siya nu duwwa a hinayup a lallake. Mágyan hide tu kuwe-kuweba a páglábbángngan nu tolay hide. Matapang hide a tahod kaya awan ti maare a tumaleb hod.

²⁹ Pagdaka hide a pinumakhaw “Anak nu Diyos ánya u gimitán mo nikame? Inumangay ka beman he para parusaan kami maski awan padla odas nu pághirap me?”

^30-31 Nákkekagbi u demonyo hide “Dipo palakadán mu kami ay lalabba a utusan mu kami a somdáp ti babuye hide.” Dipo hod tu adeni de ay te makpal a babuy a manabsab.

³² Kanya inutusan hide ni Jesus a “Hala sige, umangay kam hod tu babuy hide.” Kanya linakaden de u duwwa a lállake sakay inumangay hide tu babuy hide. Káttapos ay mabilis u babuy hide a ginuminan tu pengpeng sakay natápduk hide tu dinom. Nalimás u atanan a babuy.

³³ Nikuna netan iye nu tagaalaga hide tu babuy ay ginuminan be hide a tamo tu banuwan de. Imbaheta de u atanan a nangyare pate u nangyare tu hinayup hide.

³⁴ Nikuna nasaneg nu katolayan u nangyare ay linumuwas hide tu banuwan de para tagbuwán de ti Jesus. Inuhon de ti Jesus a lakaden na u lugar de.