Gimet 8 - U Maganda A Baheta Ni Jesu-Cristo

Pinahirapan ni Saulo u Mánnampalataya hide

¹ Nadid, ti Saulo ay kaguman tu pángbuno de ni Esteban. Ti itod a aldew a nagsapul u mahigpit a págpahirap tu mánnampalataya ti Jerusalem. Kanya kimmalat u atanan nu mánnampalataya hide ti Judea sakay ti Samaria. U apostol la hide u nawahak ti Jerusalem.

² Inlábbáng nu mánnampalataya hide u bangkay ni Esteban sakay sinangitan de ti husto.

³ Pero tu pagkagusto ni Saulo a sidaán u mánnampalataya hide ay sináddáp na u bila-bilay sakay dinakap na u mánnampalataya hide sakay inkulung na, bábbey man oni lállake.

Imbaheta de ti Samaria u Maganda a Baheta

⁴ U namághiwewalay a mánnampalataya u nagtoldu tu Maganda a Baheta. Maskin hádya hide keangayan ay ibaheta di pade.

⁵ Immangay ti Felipe tu essa a banuwan ti Samaria sakay intoldu na hod u tungkul ni Cristo.

⁶ Nikuna masaneg nu tolay hod hide u toldu ni Felipe sakay netan de u makataka-taka hide a ginimet na ay pinakasaneg de ti mapiyya u atanan a kákkagiyán na.

⁷ Maski u mágkadukás hide a Ispirito ay lummakad tu tolay hide a hinayup, sakay makán pakhawán a paluwas. Sakay makpal a lopog sakay pilay u nagpiyya.

⁸ Kanya nagkahod ti dakál a kasayaan ti banuwanan itod.

⁹ Pero ti lugaran itod ay te essa a lállake, a u ngahan na ay ti Simon. Tu itod ay páppahangaán na u Samaritano hide tu pamamag-itan nu salamangka. Ipágmadakál na a tehhod siya a kapangyariyan.

¹⁰ Sanigán be siya nu tolay hide, sapul tu mágkataas hide a tolay hanggan tu mágkababa a tolay. U kagi di pa ay “Lállakiyan iye u tehhod a dakila a kapangyariyan, u kapangyariyan nu Diyos.”

¹¹ Nalay dán a panahun a pináppaniwala na hide tu pamamag-itan nu págsalamangka na, kaya tulos-tulos hide a mágsaneg nikuna.

¹² Pero nikuna impangaral ni Felipe u Maganda a Baheta tungkul tu pághare nu Diyos sakay tungkul ni Jesus-Cristo ay summampalataya sakay nagpabawtismo u lállake hide sakay u bábbey hide.

¹³ Simmampalataya be ti Simon sakay nikuna mabawtismuwan ay pirme dán siya a mákkuyoyog ni Felipe. Sakay nikuna netan na u makataka-taka hide ay himmanga siya.

¹⁴ Nikuna nabaheta nu apostol hide a mámmágyan ti Jerusalem a tinanggap nu Samaritano hide u Upos nu Diyos ay inutusan de a angay hod di Pedro sakay ti Juan.

¹⁵ Káddemát di hod ay impagdasal de u Samaritano hide para matanggap di be u Banal a Ispirito,

¹⁶ dipo awan palla ti timmanggap ti iye maskin deya nide, nabawtismuwan la hide tu ngahan nu Panginoon a Jesus.

¹⁷ Intupo di Pedro sakay ti Juan u kama-kamát de tu ulo nu mánnampalataya hide sakay tinanggap de u Banal a Ispirito.

¹⁸ Netan ni Simon a natanggap de u Banal a Ispirito tu pamamag-itan nu págtupo nu apostol hide tu kamát de. Kanya inupaan na ti pilak di Pedro sakay ti Juan.

¹⁹ Kinagi na, “Atáddinák moy ti konna he a kapangyariyan, para ni ti deya man u tupuwan ko ti kamát ay makatanggap be ti Banal a Ispirito.”

²⁰ Tinábbeg siya ni Pedro, “Mepahamak ka a kaguman ni pilak muwe, dipo u akala mo ay mabale mo ti pilak u kaluub nu Diyos.

²¹ Tukoy nu Diyos a madangát u puso mo, kanya awan ka ti karapatan oni bahagi ti gawainan iye.

²² Pagsisiyan mo u mágkadukás mo hide a gimet sakay magdasal ka tu Panginoon a patawadán naka nakwa tu balak mo a madukás.

²³ Dipo tu pangileng ko ay sumene ka a tahod sakay alipin kapade nu kasalanan.”

²⁴ Kinagi ni Simon, “Idasalák moy ped tu Panginoon, tánni awan ko sapitán u konna tu kinagi moy hide.”

²⁵ Matapos a nagpatunay di Pedro ay ti Juan, sakay nangaral tu Upos nu Panginoon tu banuwan ni Samaria ay nagsole hide ti Jerusalem. Intoldu di be u Maganda a Baheta tungkul tu Panginoon tu tinaleban de a babaryo ti Samaria.

²⁶ Káttapos ay inutusan be nu anghel nu Panginoon ti Felipe, “Angay ka a agad ti sahámman tu dilan a paangay ti Gaza, gábwat ti Jerusalem.” (Iye a dilan ay katoy tu Parang.)

²⁷ Immangay ngane hod ti Felipe. Pademát be u taga-Etiopia a pinuno. Siya u tagapamahala tu kayamanan nu Candace oni reyna ti Etiopia. Gábwat siya ti Jerusalem ta summamba tu Diyos.

²⁸ Pasole dán siya sakay nakasakay tu kalesa na sakay mágbasa tu libro ni Prupeta Isaias.

²⁹ Sakay kinagi nu Banal a Ispirito ni Felipe a, “Máksabay ka ran ti sasakyanan itona.”

³⁰ Kanya gummággenan a immadene ti Felipe, nasaneg na a basaán nu puno u libro ni Propeta Isaias. Tinanung ni Felipe u puno, “Maintendiyan mo beman i bábbasaán muwe?”

³¹ Timmábbeg siya, “Kodya ko iye a maintendiyan ni awan ti mángpaliwanag nikán?” Pinasakay na ti Felipe tu kalesa na sakay nágsadát hide a nággetnod.

³² Iye u parte nu libro a bábbasaán na: “Kumán siya a essa a tupa a netakda a bunuwán Oni konna tu kordero a awan lumaban maski ni gapasan sakay awan ti kákkagi.

³³ Binadit-badit de siya, pinahirapan sakay inape. Awan ti makapángkagi tungkul tu sumunud a lahe na hide dipo binuno de siya.”

³⁴ Kinagi nu pinuno ni Felipe, “Kagiyán mo ped nikán ni ti deya u páppatungkulan na he, u sadile na beman oni agum?”

³⁵ Nadid, impaliwanag ni Felipe u gusto a kagiyán nu binasa nu pinuno sakay intoldu na u Maganda a Baheta tungkul ni Jesus.

³⁶ Nagtulos-tulos hide tu páglakbay de hanggan nakademát tu lugar a tehhod a dinom. Kinagi nu pinuno, “Tehhod he a dinom, maariyák mu dán beman a mabawtismuwan?”

³⁷ Kinagi nikuna ni Felipe, “Maare taka a bawtismuwan ni tunay u pánnampalataya mo tu Panginoon Jesu-Cristo.” Timmábbeg siya, “Maniwalaák a ti Jesu-Cristo u anak nu Diyos.”

³⁸ Pinaimang nu pinuno u kalesa na sakay immogsad hide a duwwa tu dinom sakay binawtismuwan siya ni Felipe.

³⁹ Káawas de tu dinom ay inalap nu Ispirito nu Panginoon ti Felipe. Awan dán siya netan nu pinuno, nag tulos-tulos la siya tu páglakbay na a tehhod a kasayaan.

⁴⁰ Namalayan dálla ni Felipe a katoy dán siya ti Azoto. Intoldu na hod u Maganda a Baheta tungkul ni Jesus sakay tu atanan a lugar a tinaleban na hanggan makademát siya ti Cesarea.