Gimet 7 - U Maganda A Baheta Ni Jesu-Cristo

U Págpaliwanag ni Esteban

¹ Tinanung nu pinakapuno nu saserdote hide ti Esteban, “Tatahoden beman iye hide a atanan?”

² Timmábbeg ti Esteban, “Kákkapatkákka ko hide sakay dáddakal hide, sanigán moy i kagiyán kuwáy. U dakila sakay u makapangyariyan a Diyos ay pimmeta tu nunu tam a ti Abraham nikuna katoy palla siya ti Mesopotamia bago a nágyan ti Haran.

³ Sakay kinagi nikuna nu Diyos, ‘Lakaden mo u luta mo sakay u kákkapatkákka mo hide sakay angay ka tu lugar a itoldu ko niko.’

⁴ Kanya limmakad siya tu lugar nu Caldeo hide sakay nágyan ti Haran. Kákkatay nu ama na, pinaagton siya nu Diyos ti lugaran iye a páppágyanan moy nadid.

⁵ Pero awan siya inatádden nu Diyos maskin sa ihek a luta, pero impananto na nikuna a magin kao na iye sakay tu magin lahe na maskin awan palla siya ti anak.

⁶ Sakay konna he u kinagi nikuna nu Diyos, ‘U lahe mo hide ay mákpágyan ti iba a bansa. Magin alipin hide hod sakay pahirapan tu alay nu áppat a datos a taon.

⁷ Pero parusaan ko u bansa a mangalipin nide. Lumakad hide hod sakay sumamba hide nikán ti lugaran iye.’

⁸ Sakay inyutus nu Diyos ni Abraham u págture bilang tanda nu kasunduwan na. Kanya nikuna meenak ti Isaac ay tinure na siya tu kawalo a aldew. Konna bi he ginimitay ni Isaac tu anak na a ti Jacob, sakay iye be u ginimet ni Jacob tu sapulo ay ti duwwa na a anak a lállake, a nagin ama nu sapulo ay ti duwwa a lahe.

⁹ Pero, simmene ni Jose u agum na a kákkapatkákka a anak ni Jacob kanya inlako de siya a alipin ti Egipto. Pero konna pa man hod ay awan siya pinabayan nu Diyos.

¹⁰ Nan tinulungan na siya tu atanan a pághirap na. Pinagpala siya nu Diyos sakay pinagkaluuben ti karunungan nikuna umatubang siya tu Faraon, u hare ti Egipto. Sakay ginimet na siya a gobernador ti Egipto sakay namahala tu bilay na.

¹¹ Nagkahod ti sák-alap sakay ti matindi a hirap ti buo a Egipto sakay Canaan, sakay awan ti mapangalapan ti makan u ninuno tam hide.

¹² Kanya nikuna mabaheta ni Jacob a tehhod a lako a trigu ti Egipto ay pinaangay na hod u nuno tam hide sakay iye u kadipalonguwan de a immangay hod.

¹³ Tu kapenduwwa di hod a káangay ay nagpakilala dán ti Jose tu kákkapatkákka na hide, sakay natukuyan ni Faraon u tungkul tu pamilya na.

¹⁴ Sakay pinauwet ni Jose u ama de a ti Jacob sakay tu kákkapatkákka na hide, pitto a pulo ay ti limma hide a atanan.

¹⁵ Immangay ti Jacob ti Egipto sakay hod siya a natay konna bi hod tu nunu tam hide.

¹⁶ U bangkay de hide ay inyangay de ti Siquem sakay inlábbáng de tu páglábbángngan a binale ni Abraham tu anak ni Hamor.

¹⁷ Nikuna adene dán u panahun nu págtupad nu Diyos tu pananto na ni Abraham, ay makpal dán a Israelita ti Egipto.

¹⁸ U hare tu itod ti Egipto ay awan na kilala ti Jose.

¹⁹ Linoko sakay pinahirapan na u ninuno tam hide sakay inyutus na tu nuno tam hide a ibut de u anak de hide tán para matay.

²⁰ Ti itod a panahun ay neenak ti Moises, u anak a kinasayaan nu Diyos. Tállo la siya a bulan a inalagaan tu bilay nu ama na.

²¹ Pero napilitan hide a inyangay de siya tu essa a lugar sakay inwahak di hod. Nadid, nikuna netan siya nu anak ni Faraon a bábbey ay inalap na siya sakay pinadakál a kumán a sadili na a anak.

²² Tinolduwan siya tu atanan a karunungan ti Egipto, sakay nagin malalake siya ti pággupos sakay tu gimet.

²³ Nikuna áppat a pulo dán a taon u idad ni Moises ay naisipan na a angen ilingán u kasa Judio na hide tu páppágyanan de.

²⁴ Netan na a api-apiyán nu essa a taga-Egipto u essa a Judio. Kanya insuhog na siya, pero dipo tu pángsuhog na ay nabuno na u taga-Egipto.

²⁵ Akala ni Moises ay maintendiyan siya nu kasa Judio na hide a tu pamamag-itan na ay iligtas hide nu Diyos pero awan de itod naintendiyan.

²⁶ Tu sumunud a aldew ay tehhod siya a netan a duwwa a Israelita a magdima, nadid pilit na hide a sawayán, ‘kakagumanan ko hide,’ kagi na, ‘Bakin magdima kam? Pareho kam pabe a Israelita.’

²⁷ Pero intoglad siya nu essa a mangpahirap tu kadima na sakay kinagi na, ‘Deya i nángdáttonay niko a magin puno sakay tagahatul me?

²⁸ Gustuwák mo beman a bunuwan konna tu ginimet mo tu apon he tu taga-Egipto?’

²⁹ Nikuna masaneg iye ni Moises ay gimminan siya sakay nágyan siya tu lugar a Midian. Nákkabanga hod sakay nagkahod ti duwwa a anak a lállake.

³⁰ Kállipas nu áppat a pulo a taon ay pimmeta ni Moses u anghel tu pamamag-itan nu maggehab a badit a kayo tu parang a adene tu Buked a Sinai.

³¹ Nagtaka ti Moises tu netan na, nikuna adeniyan na tán ketan na ti mapiyya ay nasaneg na u boses nu Panginoon:

³² Kinagi na, ‘Hikán u Diyos nu ninuno mo hide, u Diyos di Abraham, Isaac sakay ti Jacob.’ Minagpágpág ti Moises ti ánteng sakay awan siya makaileng.

³³ Kinagi nikuna nu Panginoon, ‘Ibutan mo i sinelas muwe dipo banal i págtaknággan muwe.

³⁴ Netan ko u páng-ape nu taga-Egipto hide tu pinile ko hide sakay nasaneg ko u daing de, kayaák a katoy he tánni iligtas ko hide. Nadid maghanda ka ta paangayán taka ti Egipto.’

³⁵ Saiye ti Moises a awan tinanggap nu kasa Israelita na hide a nagkagi, ‘Ti deya u nángdátton niko para magin pinuno me sakay tagahatul me?’ Pero ti Moises u ginimet nu Diyos a puno sakay tagapagligtas tu tulung nu anghel a pimmeta nikuna tu badit a kayo.

³⁶ Siya u nangibut tu kahirapan de. Naggimet siya tu makataka-taka hide a bagay ti Egipto, tu Diget a madideg, sakay tu parang, tu alay nu áppat a pulo a taon.

³⁷ Siya labe u Moises a nagkagi tu Israelita hide, ‘U Diyos ay mangpaangay he nikam ti essa a prupeta a kapareho ko a naggábwat tu lahe moy.’

³⁸ Ti Moises u kaguman nu nuno tam hide tu parang. Siya u nákpágguhon tu anghel a nákpágguhon nikuna sakay tu ninuno tam hide tu Buked a Sinai. Siya u tummanggap tu upos hide a makapangatád ti biyag a gábwat tu Diyos para iyatád nikitam.

³⁹ Pero awan siya sinunud nu ninuno tam hide nan inadiyan di pa ngane, mas gusto di pa a magsole ti Egipto.

⁴⁰ Sakay kinagi de ni Aaron, ‘Panggimet mo kame ti diyos a mángdipalongo nikame, dipo awan me tukoy ni nangánya dán i Moises san itod a nángluwas nikame ti Egipto.’

⁴¹ Kanya naggimet ngane hide ti diyos-diyosan a kumán a bul-o a baka. Piniyesta de itod sakay inalayan de bilang págsamba.

⁴² Dipo tu ginimet de ay inadággen hide nu Diyos sakay pinabayan na a sumamba hide tu awan mabilang a diyos-diyosan konna tu nakasulat tu libro nu prupeta hide: ‘Israel, dipo bakán a hikán u inalayan moy tu alay hide sakay tu hayup hide a binuno ay umalay kam ti áppat a pulo a taon tu parang.’

⁴³ U tatawed moy ay u tolda ni Moloc: ‘Sakay u biton nu diyos-diyosan moy a ti Renfan, Iye hide u letrato hide a ginággimet moy tán sambaán. Kanya ibut takam tu kadilipot pa nu Babilonia.’”

⁴⁴ Nadid, kinagi ni Esteban, “Nikuna katoy tu parang u nuno tam hide ay katoy nide u badit a templo a mángpakapospos nide a kaguman de u Diyos. Ginimet de u Tolda nu Kasunduwanan itod a konna tu sukat sakay idsura a intoldu nu Diyos ni Moises.

⁴⁵ Minana iye nu anak de hide sakay tinawed de nikuna sinakup de u bansa a impatalo nide nu Diyos, tu pangdipalongo nide ni Josue. Tatawed de itod hanggan tu panahun ni David.

⁴⁶ Kinasayaan nu Diyos ti David kaya inaged na a pakultadan na siya a maggimet ti bilay para tu Diyos ni Jacob.

⁴⁷ Pero ti Solomon dán naggimitay ti itod a bilay.

⁴⁸ Konna pa man hod u Kataas-taasan a Diyos ay awan mámmágyan tu bilay a ginimet nu tolay, ayun tu kinagi nu prupeta:

⁴⁹ Kinagi nu Panginoon, ‘U trono ko ay u langet, Sakay u gággemmakan ni tikád kuwáy ay lutaáy, Ánya pa a kabilay i gimitán moyay para nikán, Oni lugar a imangan ko?

⁵⁰ Awan beman hikán u nanggimet ti atananan iye?’

⁵¹ Talaga makásseng ulo moye! Awan palla nabagu i isip moye! Umád moy a sanigán u tatahoden! Ni ánya u ginimet nu dáddakál moy hide, ay itod be i gággimitán moyay. Masássuwayán kam a pirme tu Banal a Ispirito.

⁵² Ti deya beman a prupeta i awanay pinahirapan nu nunu moy hide? Binunu de u nánghula tu káddemát nu Banal a intokyon moy be sakay impabuno.

⁵³ Tinanggap moy u Kautusan a inyatád nu Diyos tu pamamag-itan nu anghel hide, pero awan moy itod sássunudán!”

⁵⁴ Nikuna masaneg iye nu katolayan ay minagngahitáb hide dipo tu iyamut de ni Esteban.

⁵⁵ Pero naputat siya ti Banal a Ispirito, kanya immileng siya ti langet kaya netan na u demlag nu Diyos sakay kaguman na ti Jesus a maghare.

⁵⁶ Kinagi ni Esteban, “Netan ko a nakabukas ti langet, sakay netan ko ti Jesus a anak nu Tolay a katoy tu kawanan nu Diyos.”

⁵⁷ Pinálládden de u talinga de sakay minagpákhawan; káttapos ay sabay-sabay hide a simmunggab nikuna.

⁵⁸ Binehbeh de ti Esteban hanggan tu luwas nu banuwan para batikalán. He di hod siya a binábbatikal hanggan a matay. U tolay hide a nangtistigu ay inuba de u damit de sakay inyatád de ni Saulo.

⁵⁹ Mentras bábbatikalán de ti Esteban ay nagdasal siya ti konna he, “Panginoon Jesus, tanggapán mo ispiritu kuwáy.”

⁶⁰ Sakay limmuhud ti Esteban sakay pimmákhaw, “Panginoon, patawadán mo hide ti kasalanan diyáy a ginimet de nikán!” Káttapos hod ay nahángsatan siya.