Filipos 4 - U Maganda A Baheta Ni Jesu-Cristo

Magsaya Kam tu Panginoon

¹ Kaya ngane mahal ko hide a kákkapatkákka, magpakatatag kam tu pánnampalataya moy tu Panginoon. Mahal takam sakay maammawák nikam hikam u kasayaan sakay gantimpala tu págserbi ko.

² Mákkekakagbiyák nikam Euodia sakay Sintique, a magkasundu kamon a duwwa bilang matkaka tu Panginoon.

³ Sakay ipákkekakagbi ko be niko, tapat ko a kaguman tulungan mo i duwwaán iye a bábbey. Dipo timmulung be hide nikán tu pángpakapospos tu Maganda a Baheta, a kaguman di Clemente sakay tu agum pa a tagapagserbi a konna nikán. U ngaha-ngahan de ay nakasulat tu libro nu biyag.

⁴ Magsaya kam a pirme tu Panginoon. Huwayán ko dámman a kagiyán: magsaya kam!

⁵ Ipeta moy tu atanan a tolay u kabaitan sakay pasensiya moy. Adene dán a dumemát u Panginoon.

⁶ Dyan kam mabalisa tu ánya man a bagay. Nan agidán moy tu Diyos u atanan nu kailangan moy tu pamamag-itan nu págdasal a tehhod a págpasalamat.

⁷ Ni ginimet moy iye, atádden kam nu Diyos ti kapayapaan a siya u mangbantay tu puso sakay tu isip moy dipo tu pákpagkaessa moy ni Cristo Jesus. I kapayapaanan iye ay awan kaya a maabut nu isip nu tolay.

⁸ Nadid kákkapatkákka, iye u kadimodyanan a kagiyán ko nikam: u lagi moy a isipán ay u bagay hide a karapat-dapat sakay kapure-pure: u bagay hide a tatahoden, marangal, matuwid, mágkaganda a gimet, sakay kagalang-galang.

⁹ Igimet moy u atanan a natukuyan moy, natanggap, nasaneg sakay netan moy nikán. Sakay u Diyos nu kapayapaan hod nikam.

Salamat tu Tulung Moy

¹⁰ Tunay i saya kuwáy tu Panginoon dipo huway moy dámman a inpeta u págmalasakit moy nikán, kállipas nu sangan a taon. Tukoy ko a awanák moy nalimu-limunan. Kaya la ay awan kam ti pagkakataun a tumulung nikán.

¹¹ Awan ko iye kagiyán para mák-agidák nikam ti tulung. Dipo natukuyan ku dán a magin kontento ánya man u kalagayan ko.

¹² Naranasan ku dán a maghirap. Naranasan ku dán be a magin sagana. Natukuyan ku dán a magin kontento tu ánya man a kalagayan: u mabássog oni magaláp, u kasaganaan oni lubu-lubus.

¹³ Magimet ku iye a atanan dipo tu begsák a inyatád nikán ni Cristo.

¹⁴ Konna pa man hod ay magpasalamaták a tahod dipo tu pángtulung moy nikán tu pághirap ko.

¹⁵ Sakay tukoy moy labe a taga-Filipos hide, nikuna lummakadák ti Macedonia sakay magsapul palla tu pángpakapospos tu Maganda a Baheta, awan dán ti iba a gurupo ni mánnampalataya a timmulung tu kailangan ko hide nan hikam la.

¹⁶ Dipo maski nikuna katoyák dán ti Tesalonica ay bakán kam la a pepensangan a nagpatawed ti tulung para nikán.

¹⁷ Kinagi ko iye, bakán a dipo gusto ko a tumanggap a pirme tu tulung moy hide, nan u gusto ko ay tumanggap kam ti makpal a gantimpala dipo matáttulungán kam.

¹⁸ Nadid, dipo tu tulung a impatawed moy ni Epafrodito a para nikán ay tehhod dán u atanan a kailangan ko hide sakay subra-subra ngane. Iye hide ay masáppot a alay tu Diyos, alay a katanggap-tanggap sakay makasaya nikuna.

¹⁹ Sakay u Diyos a pagserbiyan ko, siya u mangatád nikam tu atanan a kailangan moy a gábwat tu kayamanan na a awan maubus, dipo tu pákpagkaessa moy ni Cristo Jesus.

²⁰ Puriyán tam u Diyos sakay Ama hanggan-hanggan! Amen!

Dimodyan a Págbate

²¹ Ikumustaák moy tu atanan a pinile hide nu Diyos sakay nanalig hide ni Cristo Jesus, mákkumusta be u kákkapatkákka tam hide a kaguman ko he.

²² Kumusta kam kalla kagi nu kákkapatkákka tam hide he, lalo dán u tagapagserbi hide tu palasyo nu hare.

²³ Pagpalaán kam nakwa nu Panginoon a ti Jesu-Cristo.