2 Timoteo 4 - U Maganda A Baheta Ni Jesu-Cristo

¹ Nadid, Timoteo, tu atubang nu Diyos sakay ti Cristo Jesus a mághatul tu biyag sakay tu patay hide, tu kássole na para maghare, ay iyutus ku niko a,

² ipangaral mo u upos nu Diyos maski ánya a pagkakataun. Akitán mo u tolay hide, pagkagiyan sakay pabegsákkán u isip de tu pamamag-itan nu matiyaga mo a págtoldu nide.

³ Dipo dumemát u panahun a awan dán sumaneg u tolay hide tu tama a adal; nan sunudán dilaay ay u kagustuwan de. Mággaehyukán hide ti mangtoldu nide tu gugusto dila a masaneg.

⁴ Sakay awan di dán sanigan u tatahoden, nan paniwalaan diyay ay u bida hide a awan tatahoden.

⁵ Kaya hiko, lagi ka a magpugád ti kada-odas, pagtiisan mo u hirap hide a dumemát niko. Gimitán mo u tungkulin nu essa a mángngaral tu Maganda a Baheta. Tupadán mo u tungkulin mo bilang tagapagserbi nu Diyos.

⁶ Dipo awanák dán magmalay ti lutaán iye, adeniyák dán a matay dipo u biyag ko ay konna tu alay a áinumán a ibulak tu altar nu Panginoon Diyos.

⁷ Ginimet ko u atanan a makaya ko para tupadán u tungkulin a intiwala nikán nu Diyos konna tu essa a mággayam a nagginan ti mahusay hanggan a natapos u karera. Nadid nagimet ku dán u tarabaho a inyatád nikán nu Diyos. Sakay nanatiliyák a tapat tu pánnampalataya ni Cristo.

⁸ Nadid ay matanggap ku dán u kurona nu pagkamatuwid. U Panginoon a makatarungan a maghatul u mangkurona nikán tu káddemát nu aldew a pághatul. Bakán la a hikán nan pati be u atanan a nangmahal ni Jesu-Cristo a maguhay tu kássole Na a huway.

U Dimodyan a Bilin ni Pablo ni Timoteo

⁹ Pilitán mo a makademát ka he a pagdaka.

¹⁰ Dipo linakadinák dán ni Demas, mas minahal na u makamundu hide a bagay, immangay siya nadid ti Tesalonica. Ti Cresente ay immangay be ti Galacia, sakay ti Tito ay immangay dán ti Dalmacia.

¹¹ Ti Lukas dálla i nawahakay a kaguman ko nadid, ehyukán mo ti Markos sakay ikuyog mu he, dipo dakál u metulung na tu pagserbi ku he tu Panginoon.

¹² Pinaangay ko ti Tiquico ti Efeso.

¹³ Káangay mu he ay tawidán pay u alikábkáb ko a newahak ko ni Carpo ti Troas. Páktawed mu ped be u libro ko hide, lalu dán u nalukot a sássulatan nu upos nu Diyos.

¹⁴ Grabi't dukás u ginimet nikán ni Alejandro a mágpanday. U Panginoon dálla u bahala a magparusa nikuna tu ginimet na nikán.

¹⁵ Magingat ka nikuna dipo matindi u págkontara na tu itáttoldu tam.

¹⁶ Awan nikán ti nákkuyog tu purumero de nikán a pángbista. Pinabayanák de a atanan a mágge-essa. Patawadán nakwa hide nu Diyos.

¹⁷ Pero awanák pinabayan nu Diyos, inataddinák na ti begsak isip tánni mepakapospos ko tu Hentil hide a mágsaneg tu upos na. Kaya naligtasák tu hatul nu kamatayan.

¹⁸ U Panginoon u mángligtas nikán tu atanan a mágkadukás sakay ligtasák a iyangay na tu kahariyan na ti langet. Puriyán siya hanggan-hanggan! Amen.

Pangdimodyan a Pángngumusta

¹⁹ Ikumustaák mo dálla tu magkabanga a di Priscila sakay ti Aquila, sakay tu pamilya ni Onesiforo.

²⁰ Nagwahak ti Erasto ti Corinto, sakay ti Trofimo ay inwahak ko ti Mileto dipo te saket.

²¹ Pilitán mo a makademát he bagu a dumemát u amiyan. Mákkumusta niko di Eubulo, Pudente, Lino, Claudia sakay u mánnampalataya hide.

²² Aguman ka nakwa nu Panginoon Diyos sakay pagpalaán na ka.