2 Tesalonica 2 - U Maganda A Baheta Ni Jesu-Cristo

U Kássole nu Panginoon

¹ Nadid, kákkapatkákka me hide, tungkul be tu kássole nu Panginoon a ti Jesu-Cristo ay maipun kitam a tumagbu nikuna, kaya ipákkekagbi ko nikam,

² diyan kam manteng oni mabalisa tu mabaheta moy a dumemát dán u Panginoon. Diyan kam maniwala maski ni kagiyán de a kinagi nide nu Banal a Ispirito, oni nabaheta de oni nabasa de tu essa a sulat a gábwat kan nikame.

³ Diyan kam magpalinlang nide maski ni ánya man a kaparaan. Dipo u aldew nu káddemát nu Panginoon ay awan dumemát mentaras awan magsapul u páng-adi nu tolay hide tu Diyos, sakay awan palla dummemát u tolay a masássuwayán a netakda tu awan ti kahád a kaparusaan.

⁴ Kalabanán na u atanan a sássambaán sakay diyos nu tolay hide, sakay ilangkaw na u sadile na. Mággetnod siya tu disalad nu Templo nu Diyos sakay ikagi na u sadile na a siya u Diyos.

⁵ Awan beman kinagi ko dán iye hide a bagay nikuna a kagumanák moy palla hina?

⁶ Sakay tukoy moy a kaya awan palla mangyare ay te mangpugád palla nikuna a lumuwas. Pero tu netakda a panahun, ay lumitaw a talaga i itona a tolay a masássuwayán.

⁷ Nadid, u tarabaho ni itona a masássuwayán, ay nagsapul dán ti lihim. Pero siya a mismo ay awan palla pimmeta, ta awan palla naibut ti munduway u mangpugád nikuna.

⁸ Pumeta siya kapag naibut dán u mangpugád nikuna. Pero tu káddemát nu Panginoon Jesu-Cristo, ay bunuwán na i tolayan iye a masássuwayán. Puksaán na iye tu pamamag-itan la nu angás na. Sakay tunawán nu makasile a demlag a katoy nikuna tu káddemat na.

⁹ Pumeta i tolayan iye a madukás a tehhod a kapangyariyan ni Satanas. Maggimet siya tu himala hide sakay tu atanan a bagay a makataka-taka para linlangan na u tolay hide.

¹⁰ Gimitán na u sari-sare a paraan a pagkamaliyan nu tolay hide a mepahamak. Mepahamak hide dipo umád de a pahalagaan u tatahoden a makapángligtas nide.

¹¹ Dipo umád de a tanggapán u tatahoden ay pabayan dálla hide nu Diyos tu kákkalinlang de para maniwala hide tu kakabuliyan.

¹² Kaya maparusaan u atanan a awan maniwala tu tatahoden, dipo u gugusto de ay u gimet a madukás.

Pinile hide nu Diyos Para Maligtas

¹³ Kákkapatkákka ko hide, lagi kame a magpasalamat tu Diyos dipo nikam a mahal nu Panginoon. Sakay dapat la a magpasalamat kame, dipo sapul pa tu sapul ay pinile kamon nu Diyos a maligtas tu pamamag-itan nu Banal a Ispirito a mangpabanal nikam, sakay tu pamamag-itan nu pánnampalataya moy tu Tatahoden.

¹⁴ Dinulaw kam nu Diyos tu pamamag-itan nu Maganda a Baheta a intoldu me nikam, para makaguman moy be u Panginoon tam a ti Jesu-Cristo tu kaluwalhatiyan na.

¹⁵ Kanya nadid, kákkapatkákka me hide, manatile kam a matatag a tumáttawed tu intoldu me nikam tu pággupos man oni tu sulat.

¹⁶ Paha-pahaán kam nakwa nu Panginoon tam a ti Jesu-Cristo sakay u Diyos tam a Ama a magmahal nikitam. Sakay tu pamamag-itan nu kagbi na, ay inatadden na kitam ti awan magbabagu a begsák ni isip sakay matibay a pag-asa.

¹⁷ Atádden kam nakwa nu Diyos ti matatag a kaluuben para mepahayag moy sakay megimet u atanan a mágkaganda.