1 Timoteo 6 - U Maganda A Baheta Ni Jesu-Cristo

¹ Nadid, dapat a igalang nu alipin hide u amo de hide tánni awan mapintasan u ngahan nu Diyos sakay u itattoldu tam.

² Ni u amo nu alipin ay mánnampalataya be ay dapat awan mawanan u alipin ti pággalang ta matkaka labe hide ti pánnampalataya. Nan dapat di pa ngane a husayán a mágserbi dipo u pagserbiyan de ay kapareho de ti pánnampalataya sakay mahal nu Diyos. Itoldu mo sakay ipasunud i bagayan iye hide.

U Liwat a Tagapagtoldu sakay u Tatahoden a Kayamanan

³ Ni deya man u magtoldu ti iba a adal, sakay awan nakaayun tu Upos nu Panginoon tam a ti Jesu-Cristo sakay tu adal hide a magresulta tu makidiyos a kakkabiyag,

⁴ ay maghambug la siya pero i tahoday ay awan ti tukoy. Talaga a ugali na dán i manusutay, sakay mákpagtábbegan tungkul tu kahulugan nu upos hide a magbunga la ti sállapan, kontraan, sestiyan, sakay sihiyan.

⁵ Gugusto na be a mákpágtabbegan tu tolay hide a madukás ti pággisipan sakay umád tu tatahoden. U akala de ay dilan u págsunud tu Diyos para yumaman.

⁶ Tahod ngane dakál pakinabangay tu pannampalataya tu Diyos, basta tukoy la nu tolay a makontento tu kalagayan na.

⁷ Dipo awan kitam ti tawed tu kákkeenak tam ti munduwáy, kaya awan kitam be ti matawed kákkatay tam.

⁸ Kaya ngani, ni tehhod kitamon a makan sakay mesulot ay dapat kitamon a makontento.

⁹ Pero u masoh hide a yumaman tu maski ánya man a paraan ay matápduk tu tokso sakay maekhutan hide nu mágkadukás de a kagustuwan a mángpalulung nide tu kamatayan sakay kapahamakan.

¹⁰ Dipo u págmahal ti pilak ay paggábwatan nu atanan a madukás. Inadággan dán nu agum u pánnampalataya de dipo tu soh de a magkahod ti makpal a pilak pero garabi a kalungkutan u inyatad ni iye nide.

Tama a Ugale nu Tagapagserbi ni Cristo

¹¹ Pero hiko, Timoteo, bilang tagapagserbi nu Diyos, ay umadeyo ka ti iye hide a bagay. Pilitán mo a mabiyag ti matuwid, te kabanalan, pánnampalataya, págmahal, págtiyaga, sakay kahinahunan.

¹² Gimitán mo atanan a makaya mo tu pangpakapos-pos mo tu pánnampalataya mo. Sakay palagi mo a isipan a kaguman ka tu biyag a awan ti kahád dipo ina u nangdulawan niko nu Diyos. Sakay i pannampalataya muwan ina ni Cristo u impakapospos mo tu atubang nu makpal a tistigu.

¹³ Tu ngahan nu Diyos a mangatád ti biyag tu atanan a bagay, sakay tu ngahan ni Cristo Jesus a nagpatunay tu atubang ni Poncio Pilato ay iyutus ko niko

¹⁴ a kailangan a sunudán mo a tehhod a katapatan u inyutus ko hide niko hanggan tu káddemát nu Panginoon a ti Jesu-Cristo.

¹⁵ U aldew nu káddemát na ay intakda dán nu Diyos a tagapagpala sakay makapangyariyan, Hare nu atanan a hare, sakay Panginoon nu atanan a panginoon.

¹⁶ Siya la u awan mata-matay, sakay mágyan tu demlag a awan maláttángngan. Awan ti tolay a naketa oni maketa nikuna. Kao na u karangalan sakay u awan ti katapusan a kapangyariyan. Amen.

Payo tu Mágkayaman

¹⁷ Itoldu mo tu mágkayaman a dyan magmadakál sakay dyan umasa tu kayamanan a lumipas. Nan tu Diyos la a mángngatád tu atanan a bagay a ikasaya tam.

¹⁸ Itoldu mo nide a dapat a u maganda u gimitan de, para yumaman hide tu mágkaganda a gimet. Magin masaya hide a mangatád sakay handa a tumulung tu agum.

¹⁹ Ti konna hod ay makapagipun hide ti kayamanan ti langet a awan mawan para tu tamuwán, sakay magkahod hide ti tatahoden a biyag.

²⁰ Timoteo, pakaingatan mo u nepagkatiwala niko. Sakay adeyuwan mo u awan hide ti pinagseserbiyan a uhunan a awan neayun tu kagustuwan nu Diyos, sakay u pángngatuwiran a liwat, a tu pangileng de ay karunungan.

²¹ Tehhod a tolay a simmunud hide tu liwat a karunungan kaya nelise dán hide tu pánnampalataya. Pagpalaán kam nakwa nu Diyos.