Zefania 3 - KITABU KITAKATIFU

¹ O bayaye ku lidala li veye kuli ukali webaala nokwononnywa lidala lya dambidza

² Si ya hulira mwoyo yigu; si ya bugirira kwegidzwa; si ya suuvira ku Yahova; si yisunda himbi ku Nyasaye wewe.

³ Avanene veve hagati hehe va veye ving'ang'a vi fwumanga; avakalagi veve va veye visalong'ongo vyamgo lova; si va lekanga ki tigala kuduka mugamba kali kilala mba.

⁴ Avaprofeti veve va veye avavutswa, na va tumekira ubugadi; avasalisi veve vononnya hatakatifu, va koleye lilaga kirage.

⁵ Yahova hagati hehe a veye mulungi; si a la kola bwoni mba; mugamba na mugamba a lang'aminyanga likalaga lilye, si a geheranga mba; navutswa uyu mu kyamu si a manya tsisoni mba.

⁶ Ntwulidzi tsihiri; tsimpinga tsyavo tsinene tsi lekeywi hatswa; nkoli amahasi gavo kuva hatswa, si ha veye na u vita ku kali mulala; madala gavo ga dividzeywi, si ha veye nomundu kali mulala, si ha veye nowokumenya mu kali mulala.

⁷ Nda vola, Ligali u ntie; u bugirire kuhebwa mageli; kuduka ubumenyo bwibwe bu la vula kutwu lidzwa, kuli gosi aga nda laga ku makuva gege; navutswa va vuka mabwebwe ni vononnya likola lyavo lyosi.

⁸ Kunangwa mu lindirire inze, Yahova a vola, kuduka ku lidiku lya ndivukira lihima; kigira ndi saaviyi kuvungidza halala avetsihiri, nduke kuvugannya halala ubwami, ntsuke ubutima bwange kuvo, kali ubutima bwange ubululu bwosi; kigira lirova lyosi li la sambwa nomuliru gwelikendeka lyange.

⁹ Kigira inyinga yeyo nda galukidzira avandu ululimi lulahi, vosi va duke kwanira lieta lya Yahova, va mu tumekire neliva lilala.

¹⁰ Kutwula ku vivala vyehale kuvita migera gya Ethiopia, avasaali vange, mukana wa vasalannywa vange, va la leta kihaanwa kyange.

¹¹ Ku lidiku yilyo si u la va isoni mba kigira likola lilye lyosi, vya u nkoleye mu mahyolo; kigira inyinga yeyo nda twulidza hagati hoho avandu vovo aveyidzominyanga nokukola luyai, na ive si u legingira kandi mu kigulu kitakatifu kyange.

¹² Navutswa nda leka hagati hoho avadambidzwa navadaka, na va la suuvira lieta lya Yahova.

¹³ Avatigala va Israeli si va la kola ubudamano mba kinga kuvola ububehi; kinga lulimi lu volanga ububehi si lu la loleka mminwa gyavo mba; kigira va la lia nokugona, na si a la va ho u nyala kuvatihidza.

¹⁴ Wimbe, O mukana wa Zioni; kupa lwanga, O Israeli; u yanze nokusangala nomwoyo gwosi, mukana wa Yerusalemi.

¹⁵ Yahova u mali kutwulidza likalagirwa lilyo, musigu wowo u tebeywi kyova: Mwami wa Israeli, uyu Yahova, a veye hagati hoho; si u la tia ubudamano kandi mba.

¹⁶ Mu lidiku yilyo Yerusalemi li la volerwa, U ta tia mba; O Zioni makono gogo ga ta dendeya mba.

¹⁷ Yahova Nyasaye wowo a veye hagati hoho, wobunyali a la honnya; a la yanza ku ive nelisangala linene; a la sosa mbuyanzi bwibwe; a la sangala ku ive nelyimba.

¹⁸ Nda vungidza yavo ava verereranga livugana litakatifu, ava li avovo; avomusigo gwavo gwa li lilegwa.

¹⁹ Henza, inyinga yeyo nda kola inkuva ku vosi avadambidzanga ive; na nda honnya uyu u segeranga, na ava kungwa nda va vungidza; nda va kola kuva lidzominywa, nelieta avetsisoni tsyavo tsya li mu lirova lyosi.

²⁰ Inyinga yeyo nda leta mwinye ku mwingeridza, inyinga yeyo nda mu vungidza halala; kigira nda mu kolera lieta nelidzominywa mu avandu vetsihiri tsyosi tsyomu lirova, lwa ngalukidza lyadikidzwa lyenyu imbiri wetsimoni tsyenyu, Yahova a vola.