Zaburi 88 - KITABU KITAKATIFU

Ulwimbu Zaburi ya avana va Kora ku Munene Wetsinyimbu Lyegidza lya Heman Muezarahi

¹ O Yahova, Nyasaye wobuhonnyi bwange, Nzaniye imbiri wowo mbasu no budiku

² Lisaala lyange li duke imbiri wowo; U yekidze ugutu gugwo ku lilira lyange

³ Kigira mwoyo gwange gwizuye kivi, Na livamwoyo lyange lyesundanga ku Kihadisi

⁴ Mbalidzeywi halala na yavo avikanga mu bogo; Mbeye kuli mundu u ta li nobukonyi,

⁵ Nsikiseywi hagati ha vakudzu, Kuli aviitwa ava gonanga mu kilindwa Ava wa vula kuvidzulitsa kandi, Navo va kalageywi kutwula ku mukono gugwo.

⁶ U mbiki mu bogo bwa hasi ligali, Mu kisundi, nomu luliva.

⁷ Ubutima bubwo bu mminanga ligali, Na u nkupidza kivi neviguvuli vivyo vyosi. [Selaha

⁸ U viki avalina vange ihale ku inze; U nkoli kuva ubudamano kuvo: Mboheywi, si nyala kutwula.

⁹ Imoni yange i duvuki kigira lidambidzwa lyange: Nzaniye ku ive, O Yahova, madiku gosi; Nnyiye makono gange ku ive.

¹⁰ Ive u la kolera avakudzu vyokugenya vivyo? Avakudzi va la vula kwidzominya ive? [Selaha

¹¹ Tsimbabasi tsitsyo tsi la volerwa mu kilindwa? Kinga ubusuuvirifu bubwo mu budivi?

¹² Vyokugenya vivyo vi la manvekana mu kisundi? Na ubulungi bubwo mu kivala kyobwiviriri?

¹³ Navutswa ku ive, O Yahova, nzaniye; Na mugamba lisaala lyange li la duka imbiri wowo.

¹⁴ Yahova, kigira ki u tedzanga mwoyo gwange? Kigira ki u visanga ku inze mmoni mumwo?

¹⁵ Nkupidzangwa kivi na nzetegeki kukudza kutwula bwana buke: Lwa ng'inganga litibwa lilyo mbenda mwoyo.

¹⁶ Ubutima bubwo bululu bu vita ku inze Vyokutihidza vivyo vi ndividzi.

¹⁷ Vi nkumbiridza mbasu bei kuli amadzi; Vi nkumbiridza halala.

¹⁸ U viki hale ku inze muyanze na wakye wange, Na mulina wange a veye mu kisundi.