Zaburi 83 - KITABU KITAKATIFU

Ulwimbu Zaburi ya Asafu.

¹ O Nyasaye, u ta kiring'ana: U ta kunika munwa, kandi u ta sosa, O Nyasaye.

² Kigira, henza, avasigu vovo va kola liyoga; Na yava ava ku dunyira va gingi mutwe.

³ Va kolanga ubugeeri bwobugadi ku avandu vovo, Nokuvolerana ku avaviswa vovo.

⁴ Va vola, Gendi, ku va kalage, va vule kuva ihiri Lieta lya Israeli li vule kwidzolitswa mihiga nemihiga.

⁵ Kigira va volerana nomwoyo mulala; Va kolanga lilagana ku ive:

⁶ Mahema ga Edom na Vaishmaeli Moabu, na Vahagari;

⁷ Gebali, na Amon, na Amaleki; Filistia, na avamenyi mu Turo:

⁸ Asuria kandi va hambana navo; Va konyi avana va Loti. [Selaha

⁹ U va kolere kuli wa kolera Midiani, Kuli ku Sisera, na kuli ku Jabin ha mugera gwa Kishon;

¹⁰ Ava diva ha Endoru, Ava gwa kuli amavululi ku lirova.

¹¹ U kole avanene vavo kuva kuli Orebu na Zeebu; Yee, avanene vavo vosi va ve kuli Zeba na Zalimuna;

¹² Ava vola, Ku vugule kwinye avene Ubumenyo bwa Nyasaye.

¹³ O Nyasaye wange, u va kole va ve kuli ulugukyi mu kihudzu dzi Na kuli mavivi imbiri wembuudza.

¹⁴ Kuli muliru gu sambanga mulitu Na kuli ulumemo lwaakidza vigulu,

¹⁵ U va kunge nekihudzidzi kikyo, Na u va tihidze nekikugutikikyo.

¹⁶ Wizulitse mmoni mwavo tsisoni, Va duke kwenya lieta lilyo, O Yahova.

¹⁷ Va leganywe na va hende mwoyo mihiga nemihiga; Yee, va legererwe na va dive;

¹⁸ Va duke kumanya ive u veye weng'ine, welieta lilyo li veye Yahova, U Veye Weigulu Ligali ku lirova lyosi.