Zaburi 80 - KITABU KITAKATIFU

Ku Munene Wetsinyimbu Zaburi ya Asafu.

¹ U hulire, O Mwayi wa Israeli, Ive wimiranga Yosefa kuli kyayo kva magondi; Ive wikalanga igulu wa vakerubi u ng'ereng'ane.

² U vukidze tsingulu tsitsyo imbiri wa Efiraim, na Benjamini, na Manase, Udze kukuhonnya.

³ O Nyasaye, u kwirannye U kole mmoni mumwo kung'ereng'ana, na kwinye ku la honywa.

⁴ O Yahova Nyasaye wa mahe, Kuduka inyinga ki u la vihirirwa ku lisaala lya avandu vovo?

⁵ U va lageridzi nobukima bwamaliga U va nwehidzi amaliga gekigero kinene.

⁶ U ku kola kuva lihing'ana ku avatende vetu; Avasigu vetu va ku sekanga hagati havo.

⁷ U kwirannye kandi, O Nyasaye wa mahe; U kole mmoni mumwo kung'ereng'ana, na ku la honywa.

⁸ Ive wa twulidza muzabibu Egepeti: Wa kunga avetsihiri, na u gu simika.

⁹ Wa gu lombera ubwiyangu imbiri wagwo, Gwa vika imiri hasi nokwizulitsa kivala.

¹⁰ Vigulu vya kunikwa nekiriri kya gwo, Na tsisya tsyagwo tsya li kuli mitaragwa gya Nyasaye.

¹¹ Gwa hila tsisya kuduka ku inyanza, Na visibu kuduka ku Mugera.

¹² Kigira ki u tigula tsingaga tsvagwo, Kuduka vosi ava vita ku inzira va gu noga?

¹³ Impidzi yommulitu i gwononnyanga, Na tsinyama tsyombulimu tsyayanga kugwo.

¹⁴ O Nyasaye wa mahe, ku goonya ive, wirane ku kwinye: Wumike ha u veye migulu, u henze, u linde muzabibu yigu,

¹⁵ Musala gwomukono gugwo mulungi gwa simika Na lusya lwa wa lomba kuva netsingulu ku ive mwene.

¹⁶ Gu sambiywi nomuliru, gu temeywi: Va diva mu lilemba lyommoni mumwo.

¹⁷ Mukono gugwo gu ve ku mundu womukono gugwo mulungi, Ku mwana womundu wa welo mbera mwene kuva netsingulu.

¹⁸ Kunangwa si ku lirana inyima kutwula ku ive mba: U ku vukidze, na kwinye ku lanira lieta lilyo.

¹⁹ O Yahova Nyasaye wa mahe, u kwirannye; U kole mmoni mumwo kung'ereng'ana, na kwinye ku la bonywa.